Allin wakichisqa yachachinapaq
1. ¿Imaraykutaq yachakuq, Bibliap yachachisqanta munakunanpaq, yanapananchik tiyan?
1 Juk runata Bibliamanta yachachinapaqqa, allin wakichisqa kananchik tiyan, Jehovap munayninta ruwananpaq, yanapananchikpaq. Chayrayku Bibliap yachachisqanta munakunanpaq, chaymanjina kawsakunanpaq ima, allinta yanapananchik tiyan, jinamanta yachachinapaq kallpachakusqanchik mana qhasipaqchu kanqa (Deu. 6:5; Pro. 4:23; 1 Cor. 9:26). Chaywanpis, ¿imaynatataq chayta ruwayta atisunman?
2. ¿Imaynatataq wakichikuchkaspa Diosmanta mañakuy yanapawasunman?
2 Diosmanta mañakuy. Yachanchikjina mujutaqa Jehová wiñachin, chayrayku yachachinapaq wakichikuchkaspaqa, Diosmanta mañakunachik tiyan. Chay mañakuypitaq yachakuqpaq, imatachus necesitasqanta ima, mañapuna (1 Cor. 3:6; Sant. 1:5). Jinata ruwayqa, imaynasmantachus runaspa sunqunkuman, Jehovap chiqa yachachiyninwan, chayananchikpaq yanapawasun (Col. 1:9, 10).
3. ¿Imaspi yuyana tiyan yachakuqta yanapanapaq?
3 Yachakuqpi yuyay. Jesusqa, sumaqta yachachinapaq uyariqkunap necesitasqankumanjina yachachina kasqanta, yacharqa. Kaypi tʼukurina; Jesustaqa iskay kutipi jinata tapurqanku: “¿Imatataj ruwasaj wiñay kawsayniyoj kanaypaj?”, nispa. Payqa sapa jukman, wakjinamanta kutichirqa (Luc. 10:25-28; 18:18-20). Chaytaq, wakichikuchkaspaqa, yachakuqpi yuyana kasqanta yachachiwanchik. Tapurikuna: Yachachichkasqachik publicacionpi Bibliamanta pʼitikuna kaqkunamanta, ¿mayqinkunatataq ñawirichinanchik tiyan? ¿Machkhatataq yachachina tiyan? ¿Chay yachachichkanchik chaymanta mayqinkunatataq mana japʼiqayta atinmanchu? Chantapis, ñawpaqmanta imastachus tapunawanchikpi tʼukurisun chayqa, chay tapuykunasninman kutichinapaq wakichisqa kasunchik.
4. ¿Imapitaq wakichikuchkaspa yuyana tiyan?
4 Wakichikuy. Ima publicacionmantachus yachachichkanchik chayta achkha kutitaña ukhunchaspapis, yachakuqpaqqa, ñawpaq kutillaraq kasqanta yuyarikuna. Chayrayku, yachakuqpa sunqunman chayayta munanchik chayqa, sapa kuti yachachinanchikpaq, wakichikuna tiyan. Imaynatachus yachakuq wakichikunanta munanchik, ajinata ñuqanchikpis, chay publicacionta, Bibliamanta pʼikunata maskʼarispa ima, wakichikunanchik tiyan. Chantapis wakichikuchkaspaqa, yachakuqpi yuyana, jinamanta mayqinkunachus astawan yanapananta marcaykuna (Rom. 2:21, 22).
5. ¿Imaynatá Jehovajina ruwayta atisunman?
5 Jehovaqa, yachakuq espiritualmente wiñananta munan (2 Ped. 3:9). Ñuqanchikpis, sapa yachakuqman yachachinapaq wakichikuspaqa, Jehovajina paykunata munakusqanchikta rikuchisunchik.