Bibliap nisqanta entiendenaykipaq
3. Wakkunap yanapayninkuta japʼikuy
Juk runa, Edward John Eyre sutiyuqqa, Nullarbor chʼin pampata purichkaspa, chayniqpi chʼukllitaspi tiyakuqkunamanta yanapata japʼikurqa. Paykunaqa, chay chʼin pampapi imaynatachus yakuta tarinata chayri imaynatachus eucalipto sachʼamanta yakuta urqhunata yachachirqanku, chaytaq chay chʼin pampapi mana wañunanpaq payta yanaparqa.
KAY runap kawsayninqa, imallatapis ruwanapaq wakkunap yanapayninkuta necesitasqanchikta rikuchiwanchik. Jinallataq Bibliata entiendenanchikpaq wakkunap yanapayninkuta necesitanchik.
Jesuspis mana suyarqachu discipulosnin sapallankumanta Diospa Palabranta entiendenankuta. Pay kikin juk kuti, paykunaman “Diosmanta Qhelqasqata sutʼincharqa allinta entiendenankupaj” (Lucas 24:45). Arí, Jesusqa, discipulosnin Diospa Palabranta entiendenankupaq, yanapata necesitasqankuta yacharqa.
¿Maypitaq yanapata tarisunman?
Jesusqa, runasta yanapanankupaq discipulosninta kamachirqa. Niraq janaqpachaman ripuchkaspa, paykunaman nirqa: “Chayrayku rispa, tukuy laya runasta yachachisqasniyman tukuchimuychej, [...] yachachimuychej paykunaman imatachus noqa kamacherqaykichej, chayta paykunapis kasunankupaj”, nispa (Mateo 28:19, 20). Jesús nisqanmanjina, chiqa cristianosqa, runasman Bibliamanta yachachinanku tiyan, Bibliap nisqanta entiendenankupaq, nisqanmanjinataq kawsanankupaq.
Jesús kay kamachiyta qusqanmanta pisi tiempoman imachus pasasqanta qhawarina. Biblia nisqanmanjina juk kuti Etiopiamanta juk eunuco runa, Isaiaspa profeciasninta ñawirichkarqa, chaywanpis wakin pʼitikunata mana entiendeyta atirqachu. Chay pʼitikunapitaq kayjina qillqasqa kachkarqa: “Paytaqa ovejata ñakʼanankupaj jina aparqanku; imaynatachus oveja chʼinllamanta millmanta ruthuchikun, ajinallatataj paypis mana siminta kicharerqachu. Kʼumuykachachisqa kashajtin, paypaj justicia mana karqachu. Pitaj mirayninmanta willayta atinmanri? Kay pachapi qhechorqanku paypa kawsayninta” (Hechos 8:32, 33; Isaías 53:7, 8).
Kay pʼitikunata entiendenanpaq, ¿imatá ruwarqa? Felipep yanapayninta maskʼarqa, imaraykuchus Felipeqa cristiano karqa, Diospa Palabrantataq sumaqta riqsirqa. Felipetataq tapurqa: “Pimantataj profeta chayta nishanri? Pay kikinmantachu, chayrí wajmantachu parlashan?”, nispa (Hechos 8:34). Kay eunuco Diospa templonman risqanqa, Diosta yupaychaq kasqanta rikuchiwanchik. Chayrayku ichapis kay pʼitikunata entiendeyta munaspa Diosmanta yanapata mañakurqaña, chaywanpis mana Bibliap nisqanta entiendeyta atirqachu. Chayrayku llampʼu sunquwan Felipep yanapayninta maskʼarqa, Felipetaq munakuywan chay pʼitikunata sutʼincharqa. Chantá chay pʼitikuna imatachus niyta munasqanta entiendeytawan kay eunucoqa, mayta kusikurqa, cristianojinataq bautizakuyta munarqa (Hechos 8:35-39).
Kunan tiempopipis Jehovamanta sutʼinchaqkunaqa, Felipejina, ñawpa siglomanta wak cristianosjina ima, 235 suyuspi Bibliamanta runasman yachachichkanku. Paykunaqa maypichá munanki chaypi sapa semana juk kutillatapis Bibliamanta yachachisunkuman.a (“Bibliamanta tapuykunaman allin kutichiykuna”, nisqata ñawiriy.)
“Bibliapiqa, tukuy tapuykunasniyman kutichiykunata tarini”
Steven, Valvanera, Jo-Anne imaqa, paykunamanta qallariypi parlarqanchikña, Jehovamanta sutʼinchaqkunawan Bibliamanta yachakuyta qallarirqanku. ¿Imaynatá chay yachakusqanku paykunata yanaparqa? Steven nin: “Tapuykunasniyman kutichiykunata tariy atinapaqjinalla kasqanta rikuspaqa, tʼukuchkaq qhipakurqani, imaraykuchus wakin pʼitikunata kikinchaspalla kutichiykunata tarirqani. Mana wakkunawan siminakuspalla imatachus Bibliap nisqanta entiendesqayqa, mayta kusichiwarqa”.
Valvanerapis nillantaq: “Bibliap yachachiykunasnin sutʼi, entiendenapaqjinataq kasqanta repararqani. Chayrayku kunanqa Bibliap yachachiykunasninpi atienekuni yachachiykunasnin chiqa kasqanta yachasqayrayku manataq ajinata ruwanata Iglesiay nisqanraykullachu”. Jo-Annetaq nin: “Tukuy tapuykunasniyman Biblia kutichiyta atisqanta rikusqayqa, Diosta astawan jatunpaq qhawanaypaq yanapawarqa. Tukuy tapuykunasninchikman kutichiykunata Bibliapi Dios qillqachisqanqa mayta tʼukuchiwarqa”.
Qamrí, ¿Jehovamanta sutʼinchaq juk hermanota riqsinkichu? Jina kaptin ichapis imaynatachus Bibliamanta runasman yachachisqankuta tapuriwaq. Jehovamanta sutʼinchaq juk hermanota mana riqsispaqa, Jehovamanta sutʼinchaqkunaman 2 paginapi rikhuriqman qillqayta atinki. Bibliap nisqanta entiendeyta atisqaykita yuyarikuypuni. Chaypaqqa, yachakunchikjina Diosmanta espíritu santonta mañakuy, Biblia mana pantasqachu kasqanta yuyaspa ñawiriy, wakkunap yanapayninkutataq japʼikuy.
[Sutʼinchaynin]
a ¿Imatapunitaq Biblia yachachin?, nisqa libroqa, Bibliap yachachiykunasninta ukhunchanapaq juk sumaq yanapa. Kay librotaqa Jehovamanta sutʼinchaqkuna urqhunku.
[8 paginapi recuadro, dibujo/foto]
Bibliamanta tapuykunaman allin kutichiykuna
Jehovamanta sutʼinchaqkunaqa, Bibliamanta runasman yachachichkaspa kay tapuykunaman Bibliawan kutichinku:
• ¿Imatataq Diosninchik Jallpʼapaq munan?
• ¿Maymantaq wañupuspa ripunchik?
• ¿“Qhipa pʼunchaykunapichu” kawsachkanchik?
• ¿Imaraykutaq Dios ñakʼariy kananta saqin?
• Familianchikpi kusisqa kawsakunanchikpaq, ¿imatá ruwana kanman?
[7 paginapi dibujos/fotos]
Bibliata entiendenaykipaqqa, Diosmanta yanapata mañakuy, Biblia mana pantasqachu kasqanta yuyaspa ñawiriy, wakkunap yanapayninkutataq japʼikuy