¿Bibliap nisqanta entiendey atikunmanchu?
“Sapa domingo tatasniywan Bibliata ñawiriq kani. Biblia Diospa yuyaychasqan kasqanta yachaspapis, Bibliata ñawiriyqa mana gustawaqchu, wakin pʼitikunata mana entiendeyta atisqayrayku.” (Steven, Gran Bretañamanta)
“Bibliataqa, 17 watasniyuq kachkaspa ñawiriyta qallarirqani, chaywanpis wakin pʼitikunata mana entiendeyta atisqayrayku pisi tiempoman manaña Bibliata ñawiriqchu kani.” (Valvanera, Españamanta)
“Catolicajina kawsayniypi juk kutillatapis Bibliap tukuynin librosninta ñawirinay kasqanta yacharqani. Kimsa watapitaq ñawiriyta tukurqani, chaywanpis imatachus nisqanta pisillata entienderqani.” (Jo-Anne, Australiamanta)
CHIQAMANTA nisunman Bibliaqa, mana wak libroswan kikinchakusqanta, imaraykuchus wak librosmanta nisqaqa, Biblialla may chhika runasman chayan, achkha qalluspitaq tikrasqa kachkan, astawanpis casetespi, CD nisqapi, DVD nisqapi ima urqhusqa kachkallantaq. Chaywanpis achkha runasqa Bibliap nisqanta mana entiendeyta atillankuchu. ¿Qamri? ¿Bibliap nisqanta entiendeyta atillankichu?
¿Entiendenanchikpaqjinachu Dios Bibliata yuyaycharqa?
Bibliaqa, 2 Timoteo 3:16 pʼitipi nin: “Diosmanta tukuy Qhelqasqaqa paypa yuyaychasqan”, nispa. Chaywanpis, ¿tukuy entiendenankupaqjinachu Bibliata yuyaycharqa? Chayri, ¿wakin runaslla entiendenankupaqchu?
Imatachus Biblia kutichisqanta qhawarina:
“Kay kamachisqata kunan qoshaykichej, chayqa ruwanapaj jinalla, nitaj qankunamantaqa karupichu kashan.” (Deuteronomio 30:11.)
“Qampa palabraykita sutʼinchayqa kʼanchay jina, llampʼu sonqoyojkunamantaj yachayta qon.” (Salmo 119:130.)
“Chay ratopacha, Jesusqa Espíritu Santonejta may kusisqa kaspa, nerqa: Tatáy, janaj pachajta kay pachajtawan Señornin, jatunchayki, imaraykuchus kay imasta pakaykorqanki yachayniyojkunamanta yuyayniyojkunamantawan, wawasmantaj willarqanki.” (Lucas 10:21.)
Rikunchikjina Diosqa, Palabranta entiendenanchikta munan. Chaywanpis achkha runas, mayta kallpachakuspapis Bibliap nisqanta mana entiendeyta atillankuchu. ¿Bibliap nisqanta entiendey atikunmanchu? Arí, qhipan yachaqanaspitaq Bibliap nisqanta entiendenapaq imatachus ruwana kasqanta rikusunchik.