¿Imastá ángeles, supaykuna ima ruwanku?

Kay yachaqanaqa, tapuykunasniykiman Bibliaykipi kutichiykunasta tarinaykipaj yanapasonqa. Munajtiykeqa Jehovaj testigosninwan kay yachaqanata ukhunchayta atiwaj.

1. ¿Pikunataj ángeles kanku?

Angelesqa, mana runas jinachu kanku manaqa espíritus kanku, janaj pachapitaj tiyanku. Cheqa Diospis, espiritullataj, niraj Jallpʼata ruwashaspataj angelesta ruwarqa (Job 38:4, 7; Mateo 18:10). Ñaupaqenpitaj, waranqa waranqas cheqa sonqo ángeles kashanku. (Salmo 103:20, 21; Apocalipsis 5:11 leey.)

2. ¿Ángeles yanapawanchejchu?

Unayqa, cheqan runa Lotta ángeles yanaparqanku. Lotqa, sajra runas tiyakoj llajtapi tiyakorqa, chay llajtataj Diosqa chinkachinan karqa. Iskay ángeles Lotta, familianta ima, chay llajtamanta ayqenankuta nerqanku. Chay llajtamanta wakenqa, chanseyakusqankuta yuyasqankurayku mana kasukorqankuchu. Lot, ususisnin imalla, Dios chay angelesnejta nisqanta kasuspa salvakorqanku. (Génesis 19:1, 2, 13-17, 26 leey.)

Bibliaqa, kunanpis ángeles yanapashawasqanchejta nin. Angelesqa, Reinomanta willamunapaj yanapawanchej (Mateo 24:14). Sumaj willaykunata willaspapis, kay pachaj tukukuyninmanta willallanchejtaj. Chay willayta mana Lotpa tiemponmanta runas jinachu qhawananchej tiyan, imaraykuchus Dios angelesnejta chay willayta chayachiwanchej. (Apocalipsis 1:1; 14:6, 7 leey.)

Diosqa, angelesnejta llakiypi kashajtinchej kallpachallawanchejtaj. Imaynatachus Jesusta uj angelnejta kallpacharqa jinata. (Lucas 22:41-43 leey.)

Pisi tiempomantawan Diosqa, sajra runasta chinkachenqa. Kʼacha runaspajtaj uj samariy kanqa. (2 Tesalonicenses 1:6-8 leey.)

3. ¿Pikunataj supaykuna kanku chantá imatá ruwanku?

Ashkha ángeles, mana kasukoj runas jina, Diospa contranta janaj pachapi oqharikorqanku (2 Pedro 2:4). Chay angelesqa supaykuna kanku. Satanastaj paykunata kamachin, khuskataj runasta llullakuspa chʼaukiyashanku. (Apocalipsis 12:9 leey.)

Kuraj Supayqa, ranqhajkunanejta, kamachejkunanejta, llulla religionesnejta ima, Diosmanta runasta karunchayta munan. Chayrayku Satanás sajra ruwaykunamanta, ñakʼariykunamanta ima juchayoj. (1 Juan 5:19 leey.)

4. ¿Imaynatá runasta, supaykuna chʼaukiyanku?

Satanasqa, runasta creechiyta munan, wañusqa espirituman tukuspa runaswan parlasqankuta. Mana chayman jinataj Bibliaqa, wañusqas ni imata yachasqankuta nin (Eclesiastés 9:5). Chaywanpis supaykunaqa, runata chʼaukiyanankupaj, sapa kuti wañusqa imaynatachus parlaj kikinta parlanku (Isaías 8:19). Chantapis supaykunaqa, coca qhawaynejta, yatirisnejta ima chʼaukiyallankutaj. Bibliaqa, chay ruwaykunata qhesachananchejta, layqerioswan chhapusqa imasta ruphachinanchejta yuyaychawanchej. (Deuteronomio 18:10, 11; Hechos 19:19 leey.)

Diosta munakunchej chayqa, supaykunata mana manchachikunachu. Bibliata ukhunchaspa, chayman jina kausaspa, supaykunamanta karunchakunchej, cheqa Diosmantaj qayllaykunchej. Diosqa, supaykunamanta astawan atiyniyoj, llakiypi kashajtinchejtaj angelesnejta kallpachawanchej. (Salmo 34:7; Santiago 4:7, 8 leey.)

Astawan yachakuyta munaspaqa, kay ¿Imatapunitaq Biblia yachachin? libroj 10 yachaqananta leey. Kaytaqa Jehovaj testigosnin orqhonku.