BIBLIAJ KUTICHIYKUNASNIN
¿Ángeles yanapawasunmanchu?
Angelesqa imaynatachá Diospa kamachin Danielta yanaparqanku, ajinallatataj runasta Bibliamanta yachakunankupaj yanapashanku
Diosqa niraj runata ruwashaspa may chhika angelesta ruwarqa (Job 38:4, 6, 7). Kay atiyniyoj espiritusqa Diosta sirvinku. Wakin kutispitaj, Diosqa angelesninta kachamun kasukoj kamachisninta jarkʼananpaj, yanapananpaj ima (Salmo 91:9-11). Kay tiempopipis angelesqa Jesuspa kamachisninnejta, runasta yanapashallankupuni Bibliamanta yachakunankupaj. (Apocalipsis 14:6, 7 leey.)
¿Angelesmantachu yanapata mañakuna tiyan? Mana. Imajtinchus mañakoyqa yupaychaywan ninakun. Noqanchejtaj Diosllata yupaychananchej tiyan (Apocalipsis 19:10). Angelesqa Diosta sirvisqankurayku kamachiykunasninkuta kasunku, manataj runaspa mañakusqankutachu. Chayrayku Jesuspa sutinpi Diosllamanta mañakuna tiyan. (Salmo 103:20, 21; Mateo 26:53 leey.)
¿Ángeles sajrayankumanchu?
Angelesqa runas jinallataj allin kajta mana allin kajta ajllayta atinankupaj ruwasqa karqanku. Ashkha angelestaj, Diosta wasancharqanku (2 Pedro 2:4). Ñaupajtaqa Satanás, Diosta wasancharqa, wakin ángelestaj Satanasta qhatispa supaykunaman tukorqanku, tukuyninkutaj kay Jallpʼaman wijchʼuchikamorqanku. Chaytaj mana unayrajchu kashan. (Apocalipsis 12:7-9 leey.)
Kay 1914 watamantapacha sajra ruwaykuna astawan rikukun. Chaytaj rikuchin Diosqa tumpamantawan Satanasta supaykunasnintawan chinkachispa, kay Jallpʼata uj Paraisoman tukuchinanta. (Apocalipsis 12:12; 21:3, 4 leey.)