Diosmanta Parlayta Yachanapaj
¿Imapajtaj? Sumaj willaykunamanta allinta willanankupaj, yachachinankupaj ima wakichin.
¿Mashkha tiempotataj? Ruwakullanpuni.
¿Maypí ruwakun? Tantakuna Wasispi.
¿Pikuná riyta atinku? Tantakuykunaman ni faltakuspa rejkuna, pikunachus Bibliaj yachachiyninta japʼikunku, yuyaychasqanman jinataj kausakunku.
¿Imaynatá qhelqachikuna? Diosmanta Parlayta Yachanapaj tantakuyta kamachejwan parlarina.
Sharonqa, uj onqoyrayku (esclerosis lateral amiotrófica) mana kuyuriyta atinchu, pay nin: “Diosmanta Parlayta Yachanapaj tantakoyqa, sumajta ukhunchanaypaj, yachachinaypaj, noqallapi yuyanaymantataj, wajkunata yanapanaypaj yanapawan”.
Arnie, pichus qotuchakuykunata unaytaña waturin, nin: “Juchʼuyllaraj kashaspaqa, khakakoj kani, nitaj runaspa uyanta qhawariyta atejchu kani. Jehová chay tantakuynejta yanapawasqanrayku, niña manchikunichu, niñataj pisipajchu qhawakuni. Chantá imaynatachus allinta samayta, mana waj imaspi yuyayta ima yachakuni. Qotuchakuypi, willaypi ima, Diosta jatunchanaypaj wakichisqa kasqaymanta, mayta agradecekuni”.
Mosoj Betelitaspaj Escuela
¿Imapajtaj? Mosoj betelitasta, llankʼayninkuta sumajta juntʼanankupaj yanapan.
¿Mashkha tiempotataj? 16 semanasta, sapa semanataj 45 minutosta.
¿Maypí ruwakun? Betel wasipi.
¿Pikuná riyta atinku? Betelitas, chantá uj watapaj chayri aswan unaypaj Betelman llankʼaj rejkuna.
¿Imaynatá qhelqachikuna? Mosoj betelitastaqa Sucursal qhelqan.
Demetriusqa 1980 watas chaynejpi chay escuelaman rerqa, pay nin: “Kay escuelaqa, Bibliata sumajta ukhunchanaypaj yanapawarqa, Betelpi unayta sirvinaypajtaj wakichiwarqa. Yachachejkuna, chaypi yachakusqay, yuyaychaykunata japʼisqay ima, Jehová munakuwasqanta, Betelpi sumaj rinawanpaj yanapayta munawasqanta ima rikuchiwarqa”.
Kaitlyn nin: “Jehovaj nisqanman jina imatapis ruwanaypaj yanapawarqanku. Mosoj Betelitaspaj Escuelaqa, Jehovata, wasinta, llajtanta ima astawan rejsinaypaj, jatunpaj qhawanaypaj ima yanapawarqa”.
Ñaupajman Apajkunapaj Escuela
¿Imapajtaj? Waturejkunata, ancianosta, wakin kutitaj siervos ministerialesta qotuchakuypi, Diospa llajtanpi ima, llankʼayninkuta juntʼanankupaj wakichin (Hech. 20:28). Chaypeqa, qotuchakuykunapi ima chʼampaykunachus kasqanmanta, imapichus usqhayllata llankʼanankumanta ima parlakun. Kay escuelaqa, Diospa Llajtanta Kamachejkuna, ruwakunanta nejtillanku ruwakun.
¿Mashkha tiempotataj? Kay wataspeqa, waturejkunapaj iskay pʼunchayta chayri iskay pʼunchay khuskanniyojta, ancianospaj uj pʼunchay khuskanniyojta, siervos ministerialespajtaj uj pʼunchayta.
¿Maypí ruwakun? Astawanqa Tantakuna Wasipi chayri Jatun Tantakuykuna Wasipi.
¿Pikuná riyta atinku? Waturejkuna, ancianos, siervo ministeriales ima.
¿Imaynatá qhelqachikuna? Ancianosta, siervos ministerialesta imaqa, qotuchakuykunata waturej wajyarin, waturejkunatataj sucursal.
“Kay escuelapi, pisi tiempollapi ashkhata yachachikojtinpis, kusisqallapuni Jehovata sirvinankupaj, Biblia nin jinataj ‘wapu kanankupaj’ ancianosta yanapakun. Mosojllaraj, unaytaña kajkuna ima, sumaj michejkuna kayta, ‘uj yuyaylla’ kayta ima yachakunku.” (Quinn.)
“Kay escuelaqa, Diosta yupaychayta sumajpaj qhawanapaj, tojllasta reparanapaj, qotuchakuyta allinta qhawanapaj ima yanapakun. Jehovaqa may kʼacha.” (Michael.)
Precursorespaj Escuela
¿Imapajtaj? Precursoresta willayninkuta allinta juntʼanankupaj wakichin (2 Tim. 4:5).
¿Mashkha tiempotataj? Iskay semanata.
¿Maypí ruwakun? Sucursal nin, astawanqa Tantakuna Wasipi.
¿Pikuná riyta atinku? Uj watata chayri astawan, precursor regular jina llankʼajkuna.
¿Imaynatá qhelqachikuna? Rinankupaj jina kaj precursoresqa qhelqasqapacha kanku, qotuchakuykunata waturejtaj chayta willan.
Lily nin: “Kay escuelaqa, willaypi, kausayniypi ima chʼampaykunata atipanaypaj yanapawan. Kunanqa sumajta Bibliata ukhunchani, apaykachani, yachachini ima. Aswan wakichisqa kani runasta yanapanaypaj, chantapis ancianosta, qotuchakuyta ima, yanapakuyta atini”.
Brenda pichus iskay kutitaña kay escuelaman rin, nin: “Kunanqa Diosta yupaychaypi astawan tiempoyta churani, allin kajta ruwanaypaj kallpachakuni, runastataj astawan yanapani. ¡Jehovaqa may kʼacha!”.
Qotuchakuymanta Ancianospaj Escuela
¿Imapajtaj? Ancianos qotuchakuypi llankʼayninkuta juntʼanankupaj, imaynatachus Jehovata yupaychanankuta entiendenankupaj ima.
¿Mashkha tiempotataj? Phishqa pʼunchayta.
¿Maypí ruwakun? Sucursal nin, astawanqa Tantakuna Wasipi chayri Jatun Tantakuna Wasipi.
¿Pikuná riyta atinku? Ancianos.
¿Imaynatá qhelqachikuna? Sucursal paykunata wajyarin.
Estados Unidosmanta clase 92 nisqamanta wakin kayta nerqanku:
“Kay escuelaqa, sumajta qhawarikunaypaj, Jehovaj ovejasninta allinta qhawanaypaj ima mayta yanapawan.”
“Kunanqa, wajkunata Bibliaman jina sonqochayta atisaj.”
“Yachakusqayqa, wiñaypaj yanapawanqa.”
Waturejkunapaj Warmisninkupajwan Escuela
¿Imapajtaj? Waturejkunata wakichin, pikunachus “willaranku, yachachinkutaj”, qotuchakuykunata sumajta yanapanankupaj (1 Tim. 5:17; 1 Ped. 5:2, 3).
¿Mashkha tiempotataj? Iskay killata.
¿Maypí ruwakun? Sucursal nin.
¿Pikuná riyta atinku? Qotuchakuykunata waturejkuna, superintendentes de distrito ima.
¿Imaynatá qhelqachikuna? Waturejkunata warmisninkutawan, sucursal wajyarin.
“Kunanqa Diospa llajtanpi Jesús Uma jina kasqanta, aswan sumajpaj qhawayku. Chantapis hermanosta kallpachanaykuta, sapa qotuchakuyta ujchasqa kananpaj yanapanaykuta ima yachakuyku. Waturejkuna, hermanosta yuyaychanayku, cheqanchanayku ima kajtinpis, astawanqa Jehová paykunata munakusqanta sutʼita rikunankupaj yanapanayku tiyan, chaytataj ni jaykʼaj qonqasqaykuchu.” (Joel, ñaupaj kaj clase, 1999.)
Soltero Cristianospaj Escuela
¿Imapajtaj? Soltero ancianosta, siervos ministerialesta ima, Diospa llajtanpi astawan llankʼanankupaj wakichikun. Ashkhasqa, suyunkupi maypichus necesitakun chayman kachasqas kanku. Waj suyupi sirviyta munajkunataj, waj suyuman kachasqa kankuman. Wakenqa, uj tiempopaj precursores especiales jina, mana willakoj lugarespi, karu lugarespi ima sirvinku.
¿Mashkha tiempotataj? Iskay killata.
¿Maypí ruwakun? Sucursal nin, astawanqa Tantakuna Wasipi chayri Jatun Tantakuna Wasipi.
¿Pikuná riyta atinku? Solteros 23 watayojmanta, 62 watayojkama, chantapis sano runas, maypichá necesitakun chaypi sirviyta munajkuna ima (Mar. 10:29, 30). Precursores regulares iskay watallatapis kananku tiyan. Chantá anciano jina chayri siervo ministerial jina iskay watallatataj.
¿Imaynatá qhelqachikuna? Iskay pʼunchaypaj jatun tantakuykunapi, riyta munajkunapaj uj tantakuy ruwakun, chaypitaj sutʼinchakun.
Estados Unidosmanta Rick, pichus clase 23 nisqaman rerqa, nin: “Chaypi tukuy sonqo yachakusqayrayku, yuyayniyta tijrachinaypaj Jehovaj espiritun yanapawarqa. Jehovaqa, ima ruwaytapis qosujtin, juntʼanaykipaj yanapasunki. Diospa munaynintapuni ruwanki chayqa, pay kallpata qosunki”.
Andreas, pichus Alemaniapi sirvin, nin: “Diospa llajtanpi llankʼaykuna ruwakusqan uj milagro jina kasqanta repararqani. Yachakusqayqa, astawan llankʼanaypaj wakichiwarqa. Chantapis Biblia cheqa sonqo runasmanta parlasqanqa, kusisqa kanapaj, hermanosta, Jehovata ima sirvina kasqanta yachachiwarqa”.
Casarasqa Cristianospaj Escuela
¿Imapajtaj? Casarasqa cristianosta, Jehovaj llajtanpi astawan llankʼanankupaj wakichikun. Ashkhastaqa, suyunkupi necesitakun chayman kachakun, wakintataj atejtinkoqa waj suyuman. Wakenqa, uj tiempopaj precursores especiales jina, mana willakoj lugarespi, karu lugarespi ima sirvinku.
¿Mashkha tiempotataj? Iskay killata.
¿Maypí ruwakun? Estados Unidospi ruwakushan, 2012 septiembre killamantataj Jallpʼantinmanta wakin suyuspi sucursales tiyan chaypi ruwakonqa, Tantakuna Wasipi chayri Jatun Tantakuna Wasipi.
¿Pikuná riyta atinku? Qhariwarmi kajkuna 25 watayojmanta 50 watayojkama, chantapis sano runas, necesitakun chaypi sirviyta atejkuna ima. Isaías jinataj ninanku tiyan: “Kaypi kani, noqata kachaway ari”, nispa (Isa. 6:8). Chantá iskay watallatapis casarasqa kananku tiyan, jinallatataj tiempo juntʼasqata Diospaj llankʼananku tiyan. Qosaqa, iskay watallatapis anciano chayri siervo ministerial kanan tiyan.
¿Imaynatá qhelqachikuna? Jatun tantakuykunapi uj tantakuy ruwakun, chaypitaj sutʼinchakun. Suyuykichejpi chay tantakuy mana ruwakojtenqa, riytataj munankichej chayqa, sucursalniykichejman qhelqawajchej.
“Pusaj semanata yachachikusqanqa, Jehovata astawan sirviyta munaj casarasqaspa kausayninkuta tijrachin. Kunanqa maychus kajllata kausakuyta, tiempoykuta allinta apaykachayta ima munayku.” (Ericwan Corinawan, ñaupaj kaj clase, 2011.)
Galaad Escuela
¿Imapajtaj? Rejkunata wakichin, ashkha runas tiyan chaypi misioneros jina sirvinankupaj, chantá waturejkuna jina chayri betelitas jina sirvinankupaj. Ajinamanta willaypi, sucursalespi ima kallpachanankupaj, sumajta sayachinankupaj ima.
¿Mashkha tiempotataj? Phishqa killata.
¿Maypí ruwakun? Centro Educativo de la Watchtower nisqapi, chaytaj Pattersonpi (Nueva York).
¿Pikuná riyta atinku? Diosta tiempo juntʼasqata sirvej casarasqas, nisunman chay escuelaman mana rej misioneros, precursores especiales, waturejkuna chayri betelitas. Chay llankʼaykunata mana saqespa kinsa watallatapis qhariwarmi sirvinanku tiyan. Chantapis inglés qalluta sumajta parlayta, leeyta, qhelqayta ima yachananku tiyan.
¿Imaynatá qhelqachikuna? Sucursalpi kamachejkuna, casarasqasta solicitudta juntʼachinankuta ninku.
Estados Unidosmanta Ladewan Moniquewanqa Africapi sirvinku. Lade nin: “Galaad Escuelaqa, mayllamanpis rinaykupaj, munasqa hermanoswan llankʼanaykupaj ima wakichiwayku”.
Moniquetaj nin: “Diospa Palabranpi yachakusqayman jina ruwayqa, mayllapipis kusisqa kanaypaj yanapawan. Kusisqa kasqaytaj Jehovaj munakuyninta rikuchiwan”.
Sucursalespi Kamachejkunapaj Warmisninkupajwan Escuela
¿Imapajtaj? Sucursalesta kamachejkuna, Betel wasipi llankʼayta, qotuchakuykunata, circuitosta, distritosta, publicacionesta waj qallusman tijrachikusqanta, imprimikusqanta, apachikusqanta ima, allinta qhawanankupaj yanapan.
¿Mashkha tiempotataj? Iskay killata.
¿Maypí ruwakun? Centro Educativo de la Watchtower nisqapi, chaytaj Pattersonpi (Nueva York).
¿Pikuná riyta atinku? Qosaqa uj Sucursalpi kamachej chayri Comité de País nisqapi, chayri Comitepi sirvinanpaj sutichasqa hermano kanan tiyan.
¿Imaynatá qhelqachikuna? Chay hermanosta warmisninkutawan, Diospa Llajtanta Kamachejkuna wajyarinku.
Clase 25 nisqamanta Lowellwan Carawanqa Nigeria suyupi sirvinku. Lowell nin: “Chay escuelaqa yuyarichiwarqa, mana tiempoyoj kajtiypis chayri imapi llankʼajtiypis, Jehovata kusichinaypajqa munasqanman jinapuni imatapis ruwanayta. Astawanpis, kamachisninta Jehová jina munakunay kasqanta”.
Carataj nin: “Entiendenapaj jina imatapis mana sutʼinchayta atispaqa, niraj wajkunaman yachachishaspa, ukhunchanataraj niwasqaykupi mayta tʼukurini”.