¿Imaynatá Divorciakojkunata yanapasunman?

Tukuynejpi runasqa divorciakunku, ichá qanpis uj divorciasqa runata rejsinki. Sutʼincharinapaj, yachakusqanman jina Poloniapi 30 watayoj runas 3 watamanta 6 watakama casarasqa kaytawan divorciakuyta munanku. Chantapis mana 30 watasniyojkunallachu divorciakunku.

España suyupi Instituto de Política Familiar, nisqanman jina Europapi sapa iskay qhariwarmismanta ujnin qhariwarmi divorciakun. Jatuchaj suyuspipis Europapi jinallataj rikukun.

DIVORCIAKUYTAWAN LLAKIYKUNAPI RIKUKUNKU

¿Imaraykutaj ashkha runas divorciakunku, chantá ima llakiypitaj rikukunku? Europamanta qhariwarmista yuyaychaj warmi nin: “Qhariwarmisqa mana allinta kausakusqankurayku divorciakunku. Chayraykutaj mayta llakikuyta yachanku, phiñakunku, sonqo pʼakisqas qhepakunku, pʼenqakunku, pesachikunku, nitaj imatapis ruwayta atinkuchu”, nispa. Sapallan qhepakojqa, ichá wakin kutis wañuchikuyta yuyanman. Chay warmi nillanpuni: “Divorciakuyta tukusqankutawantaj ni imapaj valesqankuta yuyanku, tapukunkutaj: ‘¿Imataj noqamanta kanqarí? ¿Imatataj kausayniywan ruwasajrí?’”, nispa.

Ewaqa qosanmanta divorciakuspa imaynachus kashasqanmanta yuyarikuspa nin: “Mayta pʼenqakorqani, vecinosniy, llankʼaj masisniy ima ‘divorciada’ niwajtinku chantapis may phiñasqa kasharqani. Qosayqa iskay wawitasniyojta saqerpariwarqa, paykunapajtaj tata, mama ima kanay karqa”, nispa.a Adam chunka iskayniyoj watasta anciano jina llankʼarqa. Pay nin: “Ni imapaj valesqayta yuyasqayrayku, wakin kutis mayta phiñakuni, wajkunamantataj karunchakuyta munani”, nispa.

LLAKIYNINKUTA ATIPANANKUPAJ KALLPACHAKUNKU

Wakin divorciasqa kajkunaqa, imachus paykunamanta qhepaman kananmanta llakikunku, divorciakusqankumanta unayña kajtinpis llakiykunasninkuta atipanankupaj kallpachakullankupuni. Ichapis yuyanku, paykunamanta ni pi llakikusqanta. Uj periodista qhariwarmi kausaymanta parlaspa nin: “Divorciakojkunaqa, imatapis sapallankuña ruwananku tiyan, yachakunankutaj tiyan chʼampaykunasninkuta sapallankuña allinchayta”, nispa.

Stanisław nin: “Divorciakusqaytawan, warmeyqa iskaynin wawitasniyta manaña rikojta saqewarqachu. Chayrayku ni imapaj valesqayta, Jehovapis qonqakapuwasqanta ima yuyarqani, wañuyllatañataj munarqani. Chaymantaraj repararqani may pantasqa kashasqayta”, nispa. Wandapis, pichus divorciasqa karqa, paymanta aswan qhepaman imachus kananmanta llakikullarqataj, nintaj: “Ni pi noqamanta, wawasniymanta ima llakikunankuta yuyarqani. Kunantaj sutʼita rikuni, wawasniy Jehovata sirvinankupaj, hermanos mayta yanapawasqankuta”, nispa.

Rikunchej jina, wakenqa divorciakuytawan mayta llakikunku. Ichá paykunaqa ni imapaj valesqankuta yuyasqankurayku pisipaj qhawakunku, yuyankutaj paykunamanta ni pipis llakikunanchu kasqanta. Chantá wajkunaj pantasqasnillankuta qhawayta qallarinkuman, chaytaj qotuchakuymanta hermanos mana munakuyniyoj kasqankuta yuyachinman. Ichapis paykunaqa, tiemponman Stanisław, Wanda jina reparanqanku hermanos paykunata mayta yanapasqankuta. Arí, hermanosqa divorciasqa kajkunata mayta yanapanku, paykuna mana reparajtinkupis.

QHESACHASQAS SIENTEKUNKU, SAPAYAKUNKU IMA

Divorciasqa hermanosninchejta yanapanapaj mayta kallpachakojtinchejpis wakin kuti sapayakonqanku. Astawanqa hermanas divorciakuspa yuyanku ni pipis paykunamanta llakikusqanta. Alicja nin: “Divorciakusqaymanta pusaj watasña kajtinpis, wakin kutis pisipaj qhawakullanipuni. Ajinapi kashaspataj, wajkunamanta karunchakuyta, waqayta, noqamanta llakikuyta ima yachani”, nispa.

Qhawarisqanchejman jina divorciakojkunaqa chay jina llakiykunapi rikukunku. Bibliaqa yuyaychan wajkunamanta mana karunchakunachu kasqanta. Chay yuyaychayman jina mana ruwaspaqa “mana uyarikuyta” munajman tukushasunman (Pro. 18:1). Divorciasqa qhareqa sapa kuti sonqochayta, yuyaychayta ima uj warmipi maskʼajtenqa, ichá khuchichakuy juchaman urmanman. Chayrayku sumajta qhawarikunan tiyan chayta mana ruwananpaj.

Divorciasqa kaj hermanosninchejqa ashkha llakiykunapi rikukunku. Imachus paykunamanta qhepaman kananmanta llakikunku, wakin kutistaj qhesachasqas sientekunku, sapayakunku ima. Ajina llakiykunasniyoj kasqankurayku chay hermanosninchejta Jehová jina yanapana (Sal. 55:22; 1 Ped. 5:6, 7). Cheqamantapuni paykunaqa mayta agradecewasunchej. Yachanqankutaj qotuchakuypi cheqa amigosta tariyta atisqankuta (Pro. 17:17; 18:24).