TAPANMANTA | ¿BIBLIAMANTA YACHAKUYTA MUNAWAJCHU?

Tukuyman Bibliamanta Yachachikun

Jehovaj testigosnenqa Diosmanta runasman willamuyku. Chantapis tukuynejpi Bibliamanta yachachiyku.

Uj runa trabajonpi Bibliamanta yachakushan

Kay 2014 watapi Jehovaj testigosnenqa 8 millones kurajniyoj karqayku, 240 suyuspitaj sapa killa 9.500.000 runasman jina Bibliamanta yachacherqayku.a Chantapis Jallpʼantinpeqa uj 140 suyuspi jina, aswan pisi runas tiyan Bibliamanta yachakojkunamanta nisqaqa.

Jallpʼantinpi Bibliamanta yachachikunanpajqa, sapa wata 1.500 millonesta jina Bibliasta, librosta, revistasta, folletostawan ruwakun. Chaykunataj 700 parlaykunapi tijrachisqa tiyan. Chaytaj mayqen parlayllapipis runasman Bibliamanta yachachinapaj yanapakun.

Katlegoqa Sudafricamanta, pay nin: “Estudiayta ni munallajchu kani. Bibliamanta yachakoyqa sumaj kasqa, maytataj yanapawan.”

Bertaqa Mexicomanta, pay nin: “Tukuy tapuykunasniyman kutichiwarqanku, waj imastawan yachakorqani.”

Eziquielqa Brasilmanta, pay nin: “Nisqay horapi wasiyman jamuspa yachachiwaj kanku, ¡imatawan munayman karqa!”

Vinianaqa Australiamanta, pay nin: “Noqa nej kani 15 minutostachus, media horatachus chayri astawanchus yachachinawankuta.”

Aimeqa Benín suyumanta, pay nin: “Yachachillawaj kanku, nitaj ni mashkhata paganaychu karqa.”

Karen Irlanda del Norte suyumanta, pay nin: “Yachachiwajneyqa, pacienciayoj karqa. May amigasman tukorqayku.”

Denton Inglaterra suyumanta, pay nin: “Ashkha runas Bibliamanta yachakunku chaypis, mana Jehovaj testigonmanpunichu tukunku.”

¿IMAYNATÁ BIBLIAMANTA YACHACHIYKU?

¿Imaynatá Bibliamanta yachachiyku?

Ashkha yachachiykunata Biblia nisqanman jina yachachiyku, versiculosta maskʼaspataj sutʼinchayku. Diosmanta yachachinayku kajtenqa, Bibliapi rikuchiyku Diospa sutinta, imaynachus chayri pichus pay kasqanta, maypichus kashasqanta, chantá imaynatachus payman qayllaykuna kasqantapis. Bibliamanta yachakojkunataqa tapuykunasninkuman kutichiykunata Bibliapi maskʼayta yachachiyku.

Chaypajtaj ¿Imatapunitaq Biblia yachachin? librowan yanapachikuyku, mayqenchus 224 paginasniyoj.b Kay libroqa Bibliaj cheqa yachachiykunasninta runas yachakunankupaj ruwasqa kashan. Sutʼinchashantaj Diosmanta, Jesusmanta, wañusqas kausarinpunankumanta, imaraykuchus ñakʼarisqanchejmanta, imaynatachus Diosmanta mañakunamanta, waj imasmantawan.

¿Maypitaj chantá maykʼajtaj Bibliamanta yachachiyku?

Qan niwaykuman maypichus, maykʼajchus yachakuyta munasqaykita.

¿Mashkha unaytataj yachachiyku?

Runas munasqankuman jina yachachiyku. Wakenqa sapa semana uj horata jina yachakuyta munanku, wakintaj 10 chayri 15 minutosllata.

¿Paganawaykuchu tiyan?

Mana. Yachachisqaykumanta jinallataj librosmantapis mana cobraykuchu. Jesús nerqa: “Qankunaqa kayta mana pagaspalla japʼerqankichej, amallataj pagachikuychejchu”, nispa (Mateo 10:8).

¿Mashkha tiempotataj yachachiyku?

Chayqa sapa ujmanta kashan. ¿Imatapunitaq Biblia yachachin? libroqa 19 yachaqanasniyoj, qantaj mashkha unaypichus chay yachaqanasta tukunaykita qhawarikuwaj.

¿Jehovaj testigonmanpunichu tukuna tiyan?

Mana. Noqaykoqa ni pitapis Jehovaj testigonpuni kananta niykuchu. Bibliamanta yachakusqaykiman jina imachus aswan allin rijchʼasusqanta ruwayta atinki.

Bibliamanta yachachiykunata, ¿maypitaj tariwaj?

Internetpi jw.org nisqaman yaykuwaj. Chaypeqa imapichus creesqaykuta chayri ruwasqaykuta sutʼinchashan.

Bibliamanta yachakuyta munaspa, ¿imatá ruwawaj?

Kay jw.org nisqaman yaykuspa formulariota juntʼachiy.
Kay revistaj 2 kaj paginanpi direccionniykuman uj cartata apachimuwaj.
Wasiyki chaynejpi uj Jehovaj testigon tiyakojtenqa, paywan parlariy.

a Runasmanqa sapallankupi chayri uj qotitupi yachachiyku.

b Kay librotaqa Jehovaj testigosnin 230 millonesta jina ruwanku, 260 kurajniyoj qalluspi.