¿Imaynatá Jehovaj testigosnin Bibliamanta yachachinku?
Jehovaj testigosnenqa runas Bibliata sumajta entiendenankupaj jina yachachinku. Bibliata estudiaspaqa:
Kusisqa kausakunki.
Diospa amigon kayta atinki.
Bibliapi yachakunki imaynachus kausay aswan qhepaman kananta.
Kay yachaqanapi kay tapuykunaman kutichisun:
¿Imaynatachus estudiachisqaykichejta yachanallaypaj estudiaymanchu?
Estudiayta qallarisaj chay, ¿Jehovaj testigonmanpunichu tukunay tiyan?
¿Pillatapis invitaymanchu noqawan khuska Bibliata estudiananpaj?
Ñaupajta Bibliata estudiarqaniña chay, ¿watejmanta estudiayta atiymanchu?
¿Sapallay Bibliata estudianaypaj ima yanapapis kapusunkichejchu?
¿Imaynatá Bibliamanta yachachiyku?
Uj testigo Bibliamanta yachachisonqa Bibliata sumajta entiendenaykipaj, sapa kutitaj uj temamanta parlarinkichej. Wiñaypaj kusisqa kausakuy publicacionpeqa, pisimanta pisi yachakunki imatachus Biblia nisqanta, imaynatachus chay yachakusqayki kausayniykipi yanapasunanta ima. Bibliamanta imaynatachus yachachisqaykuta astawan yachanaykipajqa kay videota qhawariy.
¿Yachakusqaymanta pagasajchu?
Mana. Jehovaj testigosnenqa Jesús nisqanman jina ruwayku. Pay discipulosninman nerqa: “Qankunaqa mana pagaspalla japʼerqankichej, qoshaspaqa amallataj pagachikuychejchu”, nispa (Mateo 10:8). Chayrayku Bibliata estudianapaj yanapasmantaqa ni imata pagankichu. Chay yanapastaj kanku uj Biblia, Wiñaypaj kusisqa kausakuy nisqa publicación ima.
¿Mashkha unaytataj estudiakun?
Enteronpeqa 60 leccionesta estudiakun. Chaykunatataj atisqaykiman jinalla estudiawaj. Wakinkunaqa sapa semana uj leccionta estudianku, wakintaj astawan.
¿Imatá ruwanay tiyan estudiayta qallarinaypaj?
1. Uj formulariota juntʼachiy kay jw.org nisqapi. Chay formulariopi anotasqaykitaqa uj testigo qanwan parlarinallanpaj apaykachasqayku.
2. Uj testigo Bibliamanta yachachisunanpaj qanwan parlarenqa. Payqa sutʼinchasonqa imatachus Bibliamanta yachakunaykita, tapuykunasniykimanpis kutichisonqa.
3. Bibliamanta yachachisojwan imaynatachus estudianaykichejmanta parlarinkichej. Bibliata estudiawajchej wasiykipi chayri telefononejta, videollamadanejta, correo electroniconejta ima. Sapa estudioqa uj hora jina, jinapis tiempoyki kasqanman jina aswan unaysituta estudiawajchej chayri aswan pisi tiempollata, chayqa qanllamanta kanqa.
¿Imaynatachus estudiachisqaykichejta yachanallaypaj estudiaymanchu?
Arí. Chaypajqa jw.org nisqapi uj formulariota juntʼachiy. Uj testigo estudianaykichejpaj wajyamusojtintaj, uj kutillata estudianaykita willariy. Chantá Wiñaypaj kusisqa kausakuy nisqa folletowan estudiankichej, chay folletopeqa tukuynin estudiomanta kinsa ñaupaj leccioneslla tiyan. Ajinamanta yachanki noqaykuwan estudiay gustasunantachus manachus.
Estudiayta qallarisaj chay, ¿Jehovaj testigonmanpunichu tukunay tiyan?
Mana. Jehovaj testigosnenqa tukuy runaswan Bibliata estudiayta munanku, nitaj pitapis tanqankuchu religionninkuman yaykunankupaj. Chantapis Bibliaj nisqanta respetowan sutʼinchanku, jatunpajtaj qhawanku sapa runa imapichus creenanta ajllayta atisqanta (1 Pedro 3:15).
¿Bibliaywan estudiaymanchu?
Arí. Bibliayki tiyapusunki chayqa chaywan estudiayta atinki. Jehovaj testigosnenqa Mosoj Jallpʼapi Kausajkunapaj Diospa Palabran Bibliata apaykachanku, chay Bibliaqa unay qhelqasqasman jina ruwasqa kashan, facilta entiendenapaj jinataj. Jinapis yachayku wakinkunaqa Bibliankuman yachasqa kasqankuta.
¿Pillatapis invitaymanchu noqawan khuska Bibliata estudiananpaj?
Arí. Atiwaj invitayta tukuynin familiaykita chayri amigosniykita.
Ñaupajta Bibliata estudiarqaniña chay, ¿watejmanta estudiayta atiymanchu?
Arí. Ichapis kunan astawan gustasonqa. Kunanqa kay tiempopi runasta yanapanaykupaj jina yachachiyku. Chayrayku kunanqa Bibliata estudiashaspa astawan parlarikunchej, videoswantaj yanapachikunchej, ñaupajtaqa mana ajinachu karqa.
¿Sapallay Bibliata estudianaypaj ima yanapapis kapusunkichejchu?
Arí. Ashkha runasqa uj yachachejpa yanapanwan aswan sumajta yachakunku, jinapis wakenqa sapallanku Bibliata estudiayta munanku. “Bibliata estudianapaj yanapas” nisqapeqa ashkha yanapas tiyan. Chaykunataj sumajta yanapasunkiman Bibliata entiendenaykipaj. Chaykunamanta wakenqa kaykuna kanku:
Bibliamanta yachakunapaj videos. Pisi parlayllapi Bibliamanta wakin yachachiykunata sutʼinchan.
Bibliamanta tapuykuna. Chaypi rikhurej yachaqanasqa Bibliamanta ashkha tapuykunaman kutichin.
Versiculosmanta sutʼinchaykuna. Chaypeqa Bibliamanta rejsisqa palabrasta, rejsisqa versiculosta ima sutʼinchakun.