Jehovaj Palabranta jatunpaj qhawana

1-3. 1) Sintiquewan Evodiawan, ¿imamantá phiñanakunkuman karqa? 2) ¿Imataj yanapawasunman chay jina chʼampaykunapi mana rikukunapaj? (Patapi kaj dibujota qhawariy).

BIBLIATAQA jatunpaj qhawanchej, Diospa Palabran kasqanrayku. Bibliaj yuyaychaykunasnenqa, chʼampaykunapi mana rikukunapaj yanapawanchej, pantajtinchejpis cheqanchawanchej. Chay yuyaychaykunata, ¿japʼikunchejchu? Ñaupa tiempomanta iskay ajllasqa cristianaspi tʼukurina. Paykunaqa Evodiawan Sintiquewan karqanku. Bibliaqa phiñanakusqankuta nin, jinapis mana willanchu imaraykuchus phiñanakusqankuta. Ichapis kay jina karqa.

² Evodiaqa ichá wakin hermanosta mikhurinankupaj wasinman wajyarerqa. Sintiquetataj mana wajyarerqachu. Sintiquetajrí hermanosta chay mikhuymanta parlajta uyarispa, Evodiapaj rabiakorqa. Ichá sonqonpi nerqa: “¿Imaraykú Evodia noqata mana wajyariwanchu? Sumaj amigas kaykupisqa”, nispa. Chaytaj Sintiqueta ichapis sienterparicherqa, yuyarqataj Evodia mana parlapayayta munasqanta. Chantá Sintiqueqa, ichá kikisitullantataj Evodiata ruwarqa. Chay ruwasqankutajrí, ichá congregacionta tʼaqanacherqa. Chantachá Pabloqa chay hermanasta cheqancharqa, allinyakunankutataj nerqa. Bibliaqa mana sutʼita ninchu, Evodiawan Sintiquewan Pabloj yuyaychasqanta japʼikusqankutachus manachus. Jinapis ichá kasukorqanku (Fili. 4:2, 3).

³ Kay tiempopi, ichá wakin kutis hermanoswan phiñanakusunman. Jinapis Bibliaj nisqanqa, chay chʼampaykunata allinchanapaj chayri chaykunapi mana rikukunapaj yanapawasunman. Bibliaj nisqanta kasukuspaqa, Jehovaj Palabranta jatunpaj qhawasqanchejta rikuchisun (Sal. 27:11).

BIBLIAJ YUYAYCHASQAN YANAPAWANCHEJ

4, 5. ¿Imatá Diospa Palabran yuyaychawanchej sonqonchejta ñitʼiykukunapaj?

⁴ Wakin kutisqa sonqonchejta mana ñitʼiykukuyta atillanchejchu. Ichá pipis costumbresninchejrayku, rijchʼayninchejrayku chayri yurajchus yanachus kasqanchejrayku, imatapis niwasunman chayri imatapis ruwawasunman. Ajinapi rikukuspa llakikusunman chayri phiñakusunman. Congregacionmanta uj hermano chayta ruwawajtinchejtaj, sonqonchejqa astawanraj nanawasunman. Ajinapi rikukojtinchej, ¿imatá Diospa Palabran yuyaychawanchej?

⁵ Jehovaqa allinta rejsiwanchej. Payqa yachan, phiñasqa chayri rabiasqa kashajtinchej, imatapis parlarparillasqanchejta chayri imatapis ruwarparillasqanchejta. Chayrayku Jehovaqa Palabranpi kay jinata yuyaychawanchej: “Ama imamantapis usqhayllata phiñakuychu”, nispa. Chay yuyaychayta kasukoyqa, sonqonchejta ñitʼiykukunapaj maytapuni yanapawasunman (Eclesiastés 7:9; Proverbios 16:32 leey). Bibliaqa nillawanchejtaj runamasinchejta perdonanata. Jesús nerqa runasta mana perdonajtinchejqa, Jehovapis nillataj perdonanawanchejta (Mat. 6:14, 15). Chayrayku tapurikuna: “¿Pacienciayojchu kani? ¿Wajkunata perdonayta atillanichu?”, nispa.

6. ¿Imataj kanman sonqonchejta mana ñitʼiykukojtinchej?

⁶ Sonqonchejta mana ñitʼiykukuspaqa, phiñasqalla purisunman, wajkunatapis chejnikuyta qallarisunman. Chayri waj hermanosta noqanchej jina yuyanankupaj tanqasunman. Phiñakuyninchejta chayri chejnikuyninchejta pakayta munajtinchejpis, wajkunaqa imaynachus kashasqanchejta reparanqanku. Hermanostaj noqanchejmanta karunchakonqanku (Pro. 26:24-26). Ancianosqa Bibliawan yuyaychawasun, sonqonchejmanta phiñakuyta, chejnikuyta orqhonapaj, wajkunatapis perdonanapaj (Lev. 19:17, 18; Rom. 3:11-18). Ajinata yuyaychawajtinchej, ¿Diospa Palabranta kasukusunchu?

JEHOVÁ LLAJTANTA PUSASHAN

7, 8. 1) ¿Imaynatá Jehová llajtanta ñaupajman pusashan? 2) ¿Imastataj Biblia kamachiwanchej, chantá imaraykutaj kasukunanchej tiyan?

⁷ Kay tiempopi, Jehovaqa Jallpʼapi llajtanta ñaupajman pusashan, yachachishantaj. ¿Imaynatá chayta ruwashan? Payqa Cristota congregacionpa uman kananpaj churan. Cristotaj “allin kamachi, yuyayniyojta” churan, Diospa llajtanta ñaupajman pusananpaj, yachachinanpajtaj (Mat. 24:45-47; Efe. 5:23). “Allin kamachi, yuyayniyoj[qa]” Bibliata Diospa Palabranta jina qhawan, imaynatachus ñaupa tiempomanta Diospa llajtanta kamachejkuna qhawarqanku, ajinata (1 Tesalonicenses 2:13 leey). ¿Imastataj Biblia kamachiwanchej?

⁸ Bibliaqa niwanchej, “tantakuytaqa ama saqe[nanchejta]”, creeypipis uj yuyaylla kananchejta (Heb. 10:24, 25; 1 Cor. 1:10). Nillawanchejtaj Diospa Gobiernonta ñaupajman churanata (Mat. 6:33). Chantapis Bibliaqa kamachiwanchej, wasimanta wasi Diosmanta willananchejta, jinallataj plazaspi, mercadospi chayri maypi kashajtinchejpis (Mat. 28:19, 20; Hech. 5:42; 17:17; 20:20). Ancianostataj nin, congregacionta llimphuta japʼinankuta (1 Cor. 5:1-5, 13; 1 Tim. 5:19-21). Nillawanchejtaj juchamanta tʼaqakunata, Jehovaj chejnisqan imastapis chejnikunata (2 Cor. 7:1).

9. ¿Pitataj Jesús churarqa Bibliata entiendenanchejpaj?

⁹ Wakin runasqa, Bibliata sapallankumanta entiendeyta atisqankuta yuyanku. Jesustajrí Bibliaj yachachisqanta entiendenanchejpaj, kasukunanchejpaj ima, 1919 watapi “allin kamachi, yuyayniyojta” churarqa. Bibliaj nisqanta kasukuspaqa, yanapakunchej congregación llimphu, ujchasqa kananpajtaj, hermanospurapis allinta kausakunallapajpuni. Tapurikuna: “¿Jesusta kasukushanichu allin kamachi yuyayniyojta kasukuspa?”, nispa.

JEHOVAJ CARRETAN USQHAYTA RISHAN

10. ¿Imatá Ezequiel libro sutʼinchan cielopi Jehovaj llajtanmanta?

¹⁰ Diospa Palabranqa willawanchej, imaynachus cielopi Jehovaj llajtan kasqanta. Profeta Ezequielqa, mosqoypi jina uj carretata rikorqa. Chay carretataj Jehovaj munayninman jina mayllamanpis usqhay usqhayta purisharqa (Eze. 1:4-28). Chay carretaqa cielopi Diospa llajtanwan ninakun, usqhay usqhaytataj maymanchá Jehová rinanta munan, chayman rin. Jallpʼapi Diospa llajtanpis chayman jinallataj purin. Kay pasaj 10 wataspi, imaschus Diospa llajtanpi waj jinamanta ruwakushasqanpi tʼukurina. Chaykunataqa Jehová ruwachishan. Pisimantawan, Cristoqa angelesninwan khuska kay sajra pachata chinkachenqa. Chantataj niña pipis Jehovaj sutinta chʼichichanqachu, nitaj kamachiyninmanpis churanakonqachu.

11, 12. ¿Imastataj Jehovaj llajtan kay qhepa wataspi ruwashan?

¹¹ Imastachus Jehovaj llajtan kay qhepa wataspi ruwashasqanmanta parlarina. Wasichashanku. Ashkha hermanos, hermanas ima, Jehovaj testigosninpa mosoj centralninkuta ruwaysikushanku. Chaytaj Estados Unidospi kashan, Warwick, New York llajtapi. May chhika hermanostaj, Tantakuna Wasista, sucursalesta ima ruwaysikushanku. Paykunaqa Departamento Mundial de Diseño y Construcción nisqaj kamachiyninpi trabajashanku. Chay jinata llankʼasqankumanta, ¡may agradecesqas kashanchej! Jallpʼantinmanta hermanostaj, atisqankuman jina kapuyninkumanta churashanku chay llankʼay ruwakunallanpajpuni. Jehovaqa llajtanta bendecin, llampʼu sonqos kasqankurayku, tukuy sonqotaj yanapakusqankurayku (Luc. 21:1-4).

¹² Yachachiwanchej. Jehovaqa yachachinawanchejpaj ashkha escuelasta rikhurichin (Isa. 2:2, 3). Chaykuna kanku: Precursorespaj Escuela, Reinomanta Willajkunapaj Escuela, Galaad Escuela, Mosoj Betelitaspaj Escuela, Waturejkunapaj Warmisninkupajwan Escuela, Congregacionmanta Ancianospaj Escuela, Ñaupajman Apajkunapaj Escuela, Sucursalespi Kamachejkunapaj Warmisninkupajwan Escuela ima. Chantapis jw.org nisqapi, Bibliata, waj librostawan may chhika parlaykunapi tarisunman. Chaypeqa kallantaj, wawaspaj, familiaspajwan ashkha yanapas. Chantá mosoj willaykunapis rikhurillantaj. ¿Predicacionpi chayri familiapi Diosta yupaychashaspapis chaykunawan yanapachikushanchejchu?

JEHOVAMAN CHEQA SONQO KANA

13. ¿Imatataj Diospa llajtanpi kajkuna ruwananku tiyan?

¹³ Jehovaj llajtanmanta kayqa, ¡may sumajpuni! Imaschus Jehovata kusichisqanta yachasqanchejrayku, payta kasukunanchej tiyan, cheqan kajtataj ruwananchej tiyan. Runas sajra kajta ruwajtinkupis, noqanchejqa sajra kajta Jehová jina chejnikunanchej tiyan (Sal. 97:10). Amapuni kanachu “mana allin kajta allin kasqanta nejkuna” jina, pikunachus allin kajta “mana allin kasqanta” ninku, chaykuna jinaqa (Isa. 5:20). Jehovata kusichiyta munasqanchejrayku, ni imawan chʼichichakuyta munanchejchu (1 Cor. 6:9-11). Jehovaqa allinninchejrayku Biblianejta yuyaychawanchej. Payta munakunchej, cheqa sonqostaj kayta munanchej. Chayrayku wasipi, congregacionpi, trabajopi, escuelapi chayri mayllapipis payta kasukuyta munanchej (Pro. 15:3). ¿Imaspitaj Diosman cheqa sonqos kananchej tiyan?

14. ¿Imatá ruwaspataj tatas Jehovaman cheqa sonqo kankuman?

¹⁴ Wawasta yachachispa. Jehovaqa tatasta Biblianejta yuyaychan, imaynatachus wawasninkuta uywanankuta. Cristiano tatasqa sumajta qhawarikunanku tiyan, ama kay sajra pachamanta runas jina yuyanankupaj (Efe. 2:2). Wakin lugarespi tatasqa ninku: “Wawastaqa warmis yachachinanku tiyan”, nispa. Bibliarí iskayninkuta kamachin, wawasninkuta Jehovamanta yachachinankuta (Efe. 6:4). Jehovata munakoj tatamamasqa, wawasninku Samuel jina kanankuta munanku. Payqa juchʼuymantapacha Jehovaj amigon karqa (1 Sam. 3:19).

15. Kausayninchejpi imallatapis ajllashaspa, ¿imaynatá Jehovaman cheqa sonqos kasunman?

¹⁵ Imatapis ajllashaspa. Kausayninchejpi imallatapis ruwanapajqa, imatachus Jehová yuyasqantaraj yachananchej tiyan. Ajinamanta payman cheqa sonqos kayta atisun. Chaypajqa Biblia, Diospa llajtan ima yanapawasun. Sutʼinchanapaj, wakin tatasqa waj suyuman trabajaj ripunku. Wawitanku nacekojtintaj, suyunkupi kaj familiaresninkuman apachinku qhawapunankupaj. Ajinamanta paykunaqa trabajallankupuni qolqeta gananankupaj. Imatachus ruwanankuta paykuna ajllananku kajtinpis, allin kanman tapurikunanku: “¿Imatá Jehová ruwanayta munanman?”, nispa (Romanos 14:12 leey). Familianchejpi chayri trabajonchejpi niraj imatapis ajllashaspa, allin kanman Bibliaj nisqanpiraj tʼukurinanchej. Noqanchejqa kausayninchejpi imatachus ruwananchejta mana niyta atisunmanchu, chayrayku Tatanchej Jehovaj yanapayninta necesitanchej (Jer. 10:23).

16. 1) ¿Imatá uj warmi ruwayta munarqa wawan nacekojtin? 2) ¿Imataj yanaparqa cheqan kajta ruwananpaj?

¹⁶ Uj qhariwarmi waj suyuman trabajaj riporqanku. Chaypi kashajtinkutaj wawitanku nacekorqa. Paykunaqa wawitankuta lugarninkuman apachinankuta ninakorqanku, qharej tatasnin uywanankupaj. Jinapis warmeqa Jehovaj testigosninwan Bibliata estudiasharqa. Yachakorqataj wawanta paypuni Jehovamanta yachachinan kasqanta (Sal. 127:3; Pro. 22:6). Chay warmeqa Jehovaman llakiyninta willakorqa, imaynatachus Biblia ruwananchejta niwanchej, ajinata (Sal. 62:7, 8). Chantá yachachejninwan parlarerqa, congregacionmanta wakin hermanoswanpis. Familiaresninwan amigosninwanqa, wawitankuta qosanpa tatasninman apachinanta nillarqankupuni. Jinapis payqa wawitanta mana apacherqachu. Qosanqa imaynatachus hermanos warminta, wawitantapis yanapasqankuta rikorqa. Chayrayku Bibliamanta yachakuyta qallarerqa, familianwan khuskataj tantakuykunaman rerqa. Chay warmeqa mañakuyninta Jehová uyarisqanmanta, ¡may kusisqachá kasharqa!

17. Bibliamanta yachachishaspa, ¿imastá ruwananchej tiyan?

¹⁷ Kamachiykunata kasukuspa. Diosman cheqa sonqo kasunchej chayqa, llajtanpa kamachisqanta kasukusun. Sutʼincharinapaj, runata ¿Imatapunitaq Biblia yachachin? librowan sapa estudiachispa, Jehovaj llajtanta astawan rejsinanpaj yanapananchej tiyan. Chaypajqa pisi minutospi yachachisunman, ¿Imaynataj tantakuykunasniyku? nisqa videowan, ¿Pikunataj Jehovaj munayninta ruwashanku? folletowan ima. Yachachin librota tukuytawantaj, yachakojta ‘Diospa munakuyninpi kallaychikpuni’ librota estudiachina tiyan, niraj chay librosta tukuchashaspa bautizakojtinpis. Ajinamanta “creeypi kallpacha[sqa]” kananpaj (Col. 2:7). Diospa llajtanpa kamachisqanta, ¿kasukushanchejchu?

18, 19. ¿Imaraykutaj Jehovaman agradecekunanchej tiyan?

¹⁸ Ashkha imasmanta Jehovaman agradecekusunman. Imajtinchus payrayku “kawsanchej, kuyurinchej, kanchejtaj” (Hech. 17:27, 28). Chantapis Jehovaqa Palabranta qowanchej. Tesalonicamanta cristianos jina, noqanchejpis chay regalota jatunpaj qhawanchej. Imaraykuchus Bibliaj nisqanqa Diosmanta jamun (1 Tes. 2:13).

¹⁹ Bibliaqa Jehovaman qayllaykunapaj yanapawanchej. Payman qayllaykojtinchejtaj, paypis qayllaykamuwanchej (Sant. 4:8). Tatanchej Jehová llajtanman wajyariwasqanchejrayku, may agradecesqas kashanchej. Salmista jinataj ninchej: “Tata Diosman graciasta qoychej, kʼacha kasqanrayku, imaraykuchus khuyakuynenqa wiñaypaj”, nispa (Sal. 136:1). Chay Salmoj sapa versiculonpi, “khuyakuynenqa wiñaypaj” nispa nin. Sichus Jehovaman cheqa sonqo kasun, llajtannejta kamachiwasqanchejtapis kasukusun chayqa, payqa wiñay kausayta qowasunchej. Chay Salmoj nisqan juntʼakusqantataj rikusunchej.