Tukuy sonqo yanapakoj rerqanku

ASHKHA cristianosqa Diosmanta willajkuna astawan necesitakun chayman ripunku. Paykunamanta ashkhas, soltera hermanas kanku. Wakin hermanasqa waj suyuspi unaytaña Diosta sirvishanku. ¿Imataj chayman ripunankupaj yanaparqa? ¿Imastataj yachakunku? ¿Imaynataj rerqa? Ashkha hermanasta tapurerqayku. Kutichisqankutaj, Diospa tukuy kamachisninta yanapanman. Diospaj astawan llankʼayta munanki chay, solterataj kanki chayqa, astawanraj yanapasonqa.

ISKAYRAYASQANKUTA ATIPARQANKU

Diospaj waj suyupi llankʼayta atinaykimantachus manachus, ichá iskayrayanki. Anitaqa 75 watasniyoj, paypis iskayrayallarqataj. Payqa Inglaterra suyupi wiñakorqa, 18 watasninmantapachataj precursora. Pay nin: “Maytapuni Jehovamanta parlayta munaj kani. Jinapis nipuni yuyarqanichu, waj suyuman Diosmanta willaj ripuyta. Inglesllata parlayta yacharqani, yuyarqanitaj ni jaykʼaj waj parlayta yachakunayta. Chayrayku Galaad Escuelaman wajyariwajtinku, mayta tʼukorqani. Mana creeyta aterqanichu wajyariwasqankuta, noqaqa mana chaypaj jinachu kasqayta yuyarqani. Jinapis sonqoypi nikorqani: ‘Jehová atinayta yuyan chayqa, ruwasaj ari’, nispa. Chayta nisqaymantapacha, 50 watas jinaña pasan. Chaymantapachataj Japonpi misionera kashani”, nispa. Chantá Anita nillantaj: “Wakin kutis, joven hermanasta kallpachani noqa jina ruwanankupaj. Manchay kusiywantaj nini, ashkha hermanas chayta ruwasqankuta”, nispa.

KALLPACHAKORQANKU

Waj suyuspi sirvishanku chay hermanasmanta ashkhas, qallariypi iskayrayarqanku. ¿Imataj paykunata yanaparqa?

Maureenqa 64 watasniyoj, nintaj: “Juchʼuymantapacha runasta yanapayta munajpuni kani, kusisqataj kausakuyta munaj kani”, nispa. Maureenqa 20 watasninta juntʼaytawan Quebec (Canadá) llajtaman riporqa, astawan precursores necesitakusqanrayku. Pay nillanpuni: “Pisi tiemponman, Galaad Escuelaman wajyariwarqanku. Jinapis manchachikorqani mana rejsisqay lugarman ripuyta. Tatay onqosqa kasharqa, manataj mamayta sapallanta saqeyta munarqanichu. Ashkha tutasta Jehovamanta waqaspa mañakorqani. Chantá tatasniyman imaynachus kashasqayta willarerqani. Paykunataj Galaad Escuelaman rinallayta niwarqanku. Congregacionmanta hermanospis, tatasniywan kʼachas karqanku. Jehová paykunata yanapashasqanta rikuspa, noqatapis mana saqerparinawanta yacharqani. Chaywanqa ripunaypaj wakichisqa kasharqani”, nispa. Maureenqa 1979 watapi África occidentalman misionera jina rerqa, 30 watastataj chaypi qhepakorqa. Kunantaj Canadapi mamanta qhawashan, precursora especialtaj. Waj suyupi unayta Diosta sirvisqanmanta nin: “Jehovaqa imatachus necesitasqayta, maychus tiemponpi qowarqa”, nispa.

Wendyqa 65 watasniyoj, Australiapitaj sipasitallaraj kashaspa precursora kayta qallarerqa. Pay nin: “Allin manchali karqani, nitaj mana rejsisqaswan parlayta atillajchu kani. Jinapis precursora kaspaqa, tukuy laya runaswan parlayta yachakorqani. Pisimanta pisi niña manchikorqanichu, tiemponmantaj manchikuyneyqa chinkaporqa. Precursora kayqa Jehovapi astawan atienekunaypaj yanapawarqa, niñataj waj suyuman predicaj ripuyta manchikorqanichu. Uj soltera hermanapis, Japonman paywan kinsa killata predicaj rinayta niwarqa. Payqa chay suyupi 30 watas kurajta misionera karqa. Paywan Japonpi willasqayqa waj suyuman predicaj ripuyta munanaypaj, mayta yanapawarqa”, nispa. Wendyqa 1986 watapi Vanuatu suyuman riporqa. Chay suyoqa ashkha churituspi tʼaqasqa kashan, Australiaj inti llojsimuynin ladomanta 1.770 kilometrospi jinataj kashan.

Wendyqa Vanuatu suyullapipuni tiyakushan, waj parlayman tijrachinapaj oficinapitaj yanapakushan. Pay nin: “Karu lugarespi grupos, congregaciones sayarisqanta rikuspa, mayta kusikuni. Chay churituspi pisillatapis yanapakusqaymanta anchatapuni kusikuni”, nispa.

Kumiko sutiyoj hermanaqa 65 watasniyoj. Japonpi precursora regular kashajtin, compañeranqa Nepal suyuman predicaj ripunankuta nerqa. Kumiko nin: “Compañerayqa sapa kuti ‘jaku’ niwaj, noqataj mana nillajpuni kani. Waj parlayta yachakuyta manchachikorqani, jinallataj waj lugarpi kausayman yachakuytapis. Chayman rinaypajqa, qolqeta tantakunay karqa. Imatachus ruwanaypi tʼukurisharqani. Jinallapi motopi accidentakorqani, hospitalmantaj chayarqani. Chaypi kashaspa tʼukurerqani: ‘Pitaj yachan imachus qʼaya kananta. Ichapis sinchʼita onqoykuspa, niña waj suyuman willaj riyta atisajchu. Uj watallapajpis rerqoyman’, nispa nerqani. Niña manchikunaypaj, Jehovaj yanapanta mayta mañakorqani”, nispa. Kumikoqa hospitalmanta llojsiytawan, Nepalman rerqa. Aswan qhepamantaj compañeranwan chayman riporqanku.

Kumikoqa casi 10 watastaña Nepalpi kashan, nintaj: “Chʼampaykunasneyqa jarkʼaykuwarqa, imaynatachus israelitasta Puka Qocha jarkʼaykorqa, ajinata. Jinapis chayqa chinkaporqa. Nepalman yanapakoj jamusqaymanta, anchata kusikuni. Wakin kuti uj familiaman Bibliamanta willarishajtiy, 5 chayri 6 vecinospiwan uyarikoj jamunku. Wawitaspis tratadosta mañakuwanku. Kaypi runasqa Diosmanta mayta yachakuyta munanku. Chayrayku kaypi predicayqa may sumajpuni”, nispa.

CHʼAMPAYKUNATA ATIPARQANKU

Chay wapu hermanasqa, chʼampaykunawan tinkullarqankutaj. ¿Imaynatá chayta atiparqanku?

Dianeqa Canadá suyumanta, 62 watasniyojtaj. Payqa Costa de Marfil suyupi 20 watasta misionera karqa. Pay nin: “Qallariypeqa familiayta mayta faltacharqani”, nispa. Dianeqa nillanpuni: “Jehovamanta mañakorqani, kay lugarmanta runasta munakunaypaj yanapanawanta. Galaad Escuelapi ujnin yachachejniyku, Jack Redford karqa. Pay niwarqayku: ‘Maymanchá rinkichej chaypeqa, ichapis wakin imas mana allinchu rijchʼasonqachej, mancharichisonqachejtaj, astawanraj chay lugarpi runas sinchʼi wajchas kajtinkoqa’, nispa. Chantá niwarqayku: ‘Ama runaspa wajcha kausayninkuta qhawaychejchu. Astawanqa runaspi tʼukuriychej, qhawariychej uyankuta, ñawisninkuta, reparaychejtaj Bibliamanta willasqaykichejta uyarispa imaynachus kasqankuta’, nispa. Chaytataj ruwarqani, sumajtaj karqa. Runasqa Diospa Gobiernonmanta willarejtiy, mayta kusikoj kanku”, nispa. Dianeqa waj suyupi tiyakunanpaj imachus yanapasqanta nillantaj: “Bibliamanta yachachisqay warmista amigasniypaj japʼikorqani. Mayta kusikorqani Jehovaj kamachisninman tukojtinku. Costa de Marfilqa wasiyman jina tukorqa. Jesús nerqa jinataj, chaypi tarerqani tatasta, mamasta, hermanosta, hermanasta ima”, nispa (Mar. 10:29, 30).

Anneqa 46 watasniyoj, Asiaj ujnin suyunpitaj Diospaj llankʼashan. Chay lugarmanta autoridadesqa mana predicajta saqenkuchu. Pay nin: “Ashkha suyuspi tiyakorqani, tukuy laya hermanaswantaj kausakorqani. Wakinwanqa ni imapi rijchʼakorqaykuchu. Chayrayku wakin kutis mana entiendenakojchu kayku, phiñanakojtaj kayku. Chay kutispi tukuy atisqayta ruwaj kani, compañerasniyta allinta rejsinaypaj, costumbresninkuta entiendenaypajpis. Kallpachakorqani paykunata astawan munakunaypaj, nitaj usqhayta phiñakunaypaj. Chayqa mana qhasipajchu karqa. May kusiywan nini, kunan sumaj amigasniyoj kasqayta. Paykunaqa Diospaj llankʼanallaypajpuni mayta yanapawanku”, nispa.

Alemania suyumanta Ute sutiyoj hermanataqa, 1993 watapi Madagascar suyuman misionerata jina kacharqanku. Pay nin: “Qallariypeqa kaypi parlakusqan qalluta mana yachakuyta atillarqanichu. Qʼoñi lugarpi kausakuytapis mana aterqanichu. Chantapis malaria onqoyta, waj onqoykunatawan aguantanay karqa. Jinapis mana sapallaychu kasharqani. Congregacionmanta hermanas, wawasninku, estudiosniypis, kaypi parlakusqan qalluta yachanaypaj pacienciawan yanapawarqanku. Onqosqa kashajtiytaj, compañeray yanapawarqa. Astawanqa Jehovapuni yanapawarqa. Tukuy llakiyniyta payman willakoj kani. Wakin kutisqa Jehová llakiyniyta chinkachinanpaj, diasta, killasta pacienciawan suyakoj kani”, nispa. Ute sutiyoj hermanaqa 53 watasniyoj, Madagascar suyupitaj 23 watastaña sirvishan.

ASHKHA BENDICIONESTA JAPʼINKU

Waj suyuman predicaj ripoj hermanosqa, ashkha bendicionesta japʼisqankuta ninku. Chayta ruwaj soltera hermanaspis, kikillantataj ninku. ¿Ima bendicionestataj japʼinku?

Heidi hermanaqa Alemaniamanta, 73 watasniyojtaj. Payqa 1968 watamantapacha Costa de Marfil suyupi misionera kashan. Pay nin: “Diosta rejsinankupaj yanaparqani chay runasqa, wawasniy jina kanku. Paykuna cheqan ñanllapipuni purishasqankumanta, mayta kusikuni. Wakenqa precursores, ancianos imaña kanku. Ashkhas niwanku, ‘mamáy chayri awelitáy’, nispa. Paykunamanta uj ancianoqa, familianwan khuska mamankuta jina qhawakuwanku. Chayrayku niyta atiyman, Jehovaqa uj wawata, uj ñojchʼata chayri qhachunita, kinsa allchhista ima qowasqanta”, nispa (3 Juan 4).

Karenqa Canadá suyumanta, 72 watasniyojtaj. Payqa África occidentalpi 20 watas kurajtaña sirvishan. Pay nin: “Misionera kasqayqa wajkunaj allinninkuta maskʼanaypaj yanapawan, astawan munakuyniyoj, pacienciayoj kanaypajpis. Ashkha suyusmanta hermanoswan khuska llankʼasqayqa, niña ñaupajta jina yuyanaypaj yanapawan. Reparanitaj imapis tukuy imaymanamanta ruwakuyta atisqanta. Tukuynejmanta amigosniyoj kayqa may sumajpuni. Diospa llajtanpi ruwanasniyku, kausayniyku niña kikinchu kajtinpis, sumaj amigosllapuni kayku”, nispa.

Inglaterra suyumanta Margaretqa 79 watasniyoj, Laos suyupitaj misionera karqa. Pay nin: “Waj suyupi Diospaj llankʼaspaqa, rikuni imaynatachus Jehová tukuy laya runasta llajtanman pusamusqanta. Chayqa creeyniyta mayta kallpachan, rikuchiwantaj Jehová llajtanta ñaupajman pusashasqanta, munaynintataj juntʼanantapuni”, nispa.

Waj suyuspi sirvej soltera hermanasqa, Diosmanta willaspa ashkhata yanapakunku. Chayrayku chay hermanasman, may sumajta ruwashasqankuta niyku (Jue. 11:40, NM). Sapa kuti, astawan ashkha hermanas paykuna jina ruwashanku (Sal. 68:11). Qanrí, ¿waj suyuman ripunaykipaj kallpachakuwajchu? Chayta ruwanki chayqa, cheqamantapuni yachanki Jehová “Diosqa kʼacha kasqanta” (Sal. 34:8).