Maypichus pisi willaqkuna kanku chayman, ¿riyta atiwaqchu?

“Estados Unidospiqa, allinta kawsakuq kayku. Chaywanpis ñuqayku, wawasniyku ima qhapaqyayllata maskʼaypi mana urmayta munarqaykuchu. Ñawpaqta misionerosjina llamkʼachkaspa may kusisqa karqayku, watiqmantataq ajinata kawsakuyta munarqayku.”

JINATA yuyasqankuqa, Ralphtawan Pamtawan, 1991 watapi wakin sucursalesman qillqanankupaq tanqarqa. Imaraykuchus paykunaqa, maypichus pisi willaqkuna kanku, chayman riyta munarqanku. Mexicopi sucursalmanta kaqkunataq, qillqasqankuman kutichirqanku, inglés qallupi parlaqkunaman willaqkuna necesitakuchkasqantataq, nirqanku (Juan 4:35). Pisi tiemponmantaq Ralphwan, Pamwan, iskay wawasninwan ima (juknin 8 watayuq, juknintaq 12 watayuq), chay suyuman ripunankupaq wakichikuyta qallarirqanku.

Maypichus pisi willaqkuna kanku chayman rinku

Ralph yuyarikuspa nin: “Niraq Estados Unidosman ripuchkaptiyku, wakin hermanosqa niwarqayku: ‘Wak llaqtapi tiyakuyqa manchachikunapaqjina’, ‘¿unquspa imatá ruwankichik?’ ‘¿Imaraykutaq wak llaqtapi inglesta parlaqkunaman Diosmanta astawan willaq riyta munankichik?, nispa, chaywanpis chayta niwaqkunaqa, mana chiqa kaqmanta allintachu japʼikuchkarqanku’. Astawanpis chay suyuman rinaykupuni karqa, manataq chay kutillachu jinata yuyachkarqayku, manaqa unaymantapachaña wakichikuchkarqayku rinaykupaq. Chayrayku mana qullqitapis manuchakuqchu kayku, manaqa qullqita tantarqayku chantá ima chʼampaypis kaptin, imatachus ruwanaykuta parlarqaykuña”.

Ralph, warmin, iskay wawasnin ima, Mexicopi sucursalta waturiq risqanku. Hermanostaq chay suyumanta juk mapata rikuchisqanku, nisqankutaq: “Tukuy kaypi Diosmanta runaman willaspa llamkʼanaykichik kachkan”, nispa. Paykunaqa San Miguel de Allende nisqa llaqtapi qhipakurqanku, chay llaqtaqa México suyumanta 240 kilometrosninpijina karqa, chaypitaq achkha runas wak llaqtasmanta tiyakusqanku. Kimsa watanmantaq chay llaqtapiqa, inglesta parlaqkunamanta ñawpa kaq qutuchakuy rikhurisqa, 19 willaqkunataq kasqanku.

México suyupiqa, Estados Unidosmanta juk millón runas tiyakunku. Chantapis México suyumanta achkha yachaywasipi yachakuqkunaqa, inglesta parlanku. Ralph sutʼinchan: “Jehová astawan willaqkunata kachamunanpaq paymanta mañakuq kayku. Chantá hermanos qhipakunankupaq nisunman chay llaqtata ‘qhawaq jamuqkunapaq’ juk cuartota suyachik kayku (Núm. 13:2).

Diosmanta astawan willamunankupaq kawsayninkuta tikrachinku

Chay suyumanqa, Diosmanta astawan willamunankupaq, wak hermanos rillarqankutaq. Estados Unidosmanta, Billwan Kathywan chay suyuman rirqanku, paykunaqa 25 watastaña maypichus pisi willaqkuna kanku chayman riqkuna kanku, paykunaqa castellanopi parlayta yachakuyta yuyachkarqanku, chaywanpis Ajijic llaqtaman risqankurayku manaña ajinatachu yuyarqanku, chay llaqtaqa Chapala quchap kantunpi kachkan, chaypitaq Estados Unidosmanta aschkha jubilados tiyakunku. Bill nin: “Ajijic llaqtapiqa, chiqa kaqmanta yachakuyta munaqkunata maskʼaspa, astawan achkha tiempota qhipakuq kayku”. Iskay watanmantaq, Billwan, Kathywanqa, México suyupi inglés qallupi iskay kaq qutuchakuy qallarisqanmanta mayta kusikurqanku.

Kenwan, Joannewanqa, Canadá suyumanta kanku, astawan Diosmanta willaspa llamkʼanankupaq kawsayninkuta tikrachiyta munarqanku. Paykunapis wawanku Brittanywan México suyuman ripuyta akllarqanku. Ken nin: “Ñawpaqtaqa chay suyupi mana kayta atillarqaykuchu, imaraykuchus wakin pʼunchaykunaqa, ni teléfono, ni electricidad, ni rupha yaku ima, kapuwaqchu kayku”. Chaywanpis paykunaqa, runaman willaspa kusisqa kaq kanku. Pisi tiemponmanqa Kenta siervo ministerialtajina sutichanku, iskay watanmantaq anciano kananpaq suticharqanku. Ñawpaqtaqa wawankupis chay suyupi mana kayta atillarqachu, imaraykuchus inglesta parlaqkunap juchʼuy qutuchakuyninman riq kanku, chaypitaq mana achkha sipaskuna karqankuchu. Chaywanpis Tantakunapaq Wasita ruwaypi yanapaspaqa, tukuyniqpi amigosniyuq karqa.

Patrickwan, Roxannewanqa, Texas (Estados Unidos) llaqtapi tiyakuq kanku, chay tiyakusqankumanta mana karupichu inglesta parlaqkuna, tiyakusqankuta yachaytawantaq mayta kusikurqanku. Patrick nin: “Monterrey (México) llaqtaman richkaspaqa, Jehovapis pusachkawaykumanjina karqa”. Chayrayku chay llaqtaman ripunankupaq Texas llaqtapi wasinkuta venderqanku (Hech. 16:9). México suyupi kawsayqa mana atikullarqachu, chaywanpis ñawpaqman rinankupaq kallpachakusqankuqa, mana qhasipaqchu karqa, imaraykuchus risqankumanta iskay watanman chay juchʼuy qutuchakuypiqa, 17 willaqkunamanta, 40 willaqkunaman yacharqanku.

Jeffwan, Debwanqa, Diosmanta astawan willanankupaq kawsayninkuta tikrachillarqankutaq. Estados Unidospi wasinkutaqa, venderqanku Cancún llaqtamantaq juk juchʼuy cuartopi tiyakunankupaq ripurqanku, kay llaqtaqa costa del Caribe Mexicano nisqa chaypi. Paykunaqa jatun qutuchakuykuna kaptin qayllallaman riyman yachasqa karqanku, chaypitaq kay aire acondicionado nisqa tiyapuq. Kunantaq inglesta parlaqkunap jatun tantankuyninkuman chayanankupaqqa, 8 horasta rinanku karqa, chaypitaq ruphaypi kananku karqa. Chay ruwasqankutaq mana qhasipaqchu karqa, imaraykuchus Cancún llaqtapiqa, wak qutuchakuy qallarillarqataq, 50 willaqkunataq karqanku.

Mexicomanta wakin hermanosqa, inglespi runaman willayta qallarirqanku. Rubén, warmin ima, San Miguel de Allende nisqa llaqtapi juk qutuchakuy qallarisqanta pisi willaqkunallaraqtaq kasqankuta yachaytawankama, usqhayta yanapaq rirqanku. Paykunaqa inglesta parlayta yachakunanku karqa, chay llaqtaq ususninmanjinataq yachakunanku karqa, sapa semana tantakuyman rinankupaqtaq 800 kilometrosta rinanku karqa. Rubén yuyarikuspa nin: “Wak llaqtasmanta chay México suyupi tiyakuq runaswan parlayqa, may allin karqa, imaraykuchus paykunaqa parlayninkupi ni jaykʼaq allin willaykunata uyarisqankuchu. Wakinqa waqay ñawislla agradecewarqayku”. Rubenwan, warminwanqa, San Miguel de Allende nisqa llaqtapi, qutuchakuyta yanapaytawan Guanajuatop juknin llaqtanman precursoresjina llamkʼanankupaq ripurqanku. Chaypitaq juk qutuchakuy qallarinanpaq yanaparqanku, kimsa chunkamanta astawan inglesta parlaqkunataq karqanku. Kunantaq Guanajuatop qayllanpi Irapuato llaqtapi juk juchʼuy qutuchakuypi kachkanku.

Mana uyariyta munaqkunamanpis willanku

México suyupiqa, wak llaqtayuq runasmanta nisqa inglesta parlaq mexicanos, astawan achkha kanku. Paykunaman allin willaykunata, Diospa Reinonmanta ima willayqa, mana atikullanchu, imaraykuchus qhapaq familias kanku, hermanos willaq riptinkutaq chaypi llamkʼaqkunalla uyarinku. Chantá wakin runas punkuman lluqsimuspapis, mana Jehovamanta sutʼinchaqkunata uyariyta munankuchu, Jehovamanta sutʼinchakuna chay llaqtallapi rikhuriq religión kasqankuta yuyasqankurayku. Wak suyusmanta Jehovamanta sutʼinchaqkuna riptinkutaq Diosmanta willaptinku uyarinku.

Gloriamanta parlarina, payqa Querétaro llaqtapi tiyakun. Pay nin: “Jehovamanta sutʼinchakqunaqa kutin kutita waturiwaq kanku, nitaq uyariqchu kani. Chaywanpis familiaresniy, amigosniy ima, chʼampaypi kachkasqankuta rikuspa llakikuyta qallarirqani. Chaymanta imaynatachus chay chʼampayta allinchaynaypaq Diosmanta yanapata mañakurqani. Mañakusqaymanjinataq inglesta parlaq juk warmi, wasiyman jamurqa, tapuwarqataq wasiypi pillapis inglesta parlayta yachasqantachus manachus. Chay warmi wak suyumanta kasqanta reparaspataq, ñuqa inglesta parlayta yachasqayta nirqani. Pay Bibliamanta parlachkawaptintaq, ñuqaqa tʼukurichkarqani: ‘¿Imatataq kay warmi kaypi ruwachkanmanri?’, nispa. Chaywanpis juk señalta Dios qunawanta mañakusqaymanjina, chay warminiqtapis kutichichkawanmanjina karqa”. Gloriaqa, Bibliamanta astawan yachakuyta munarqa, allintataq yachakurqa, familian churanakuptinpis pisi tiemponman bautizakurqa. Kunantaq, precursora regularjina llamkʼachkan, chantá qusan, wawan ima, Jehovata yupaychallankutaq.

Diosmanta astawan willamusqankuqa, mana qhasipaqchu

Maypichus pisi willaqkuna kanku chaypi yanapayqa, mana atikullanchu, chaywanpis achkha bendiciones tiyan. Ralph, paymanta ñawpa parrafospi parlarirqanchikña, pay nin: “Chinamanta, Gran Bretañamanta, Jamaicamanta, Sueciamanta, Ghanamanta kaq runasta Bibliamanta yachachirqayku. Chay yachachisqayku runasmanta wakinqa, bautizakurqanku, precursoresjinataq llamkʼayta qallarirqanku. Kay qhipa wataspitaq familiaywan khuska 7 qutuchakuykuna qallarisqanta rikuyku, chay qutuchakuykunapitaq tukuy inglesta parlaqkuna kanku. Iskaynin wawasniykupis ñuqaykuwan khuska precursoresjina llamkʼayta qallarirqanku, kunantaq Estados Unidospi, Betelpi kachkanku”.

Kunankamataq México suyupiqa 88 qutuchakuykunaña tiyan, chantá wak juchʼuy qutuchakuykuna ima. ¿Imaraykutaq qutuchakuykuna yapakuchkallanpuni? Imaraykuchus wak suyusmanta México suyupi tiyakuqkunaqa Jehovamanta sutʼinchaqkunawan ni jaykʼaq parlasqankuchu. Wakinqa Diosmanta willaptinku uyarisqanku, imaraykuchus chay llaqtapiqa mana churanakuy paykunapaq kasqachu. Wakintaq jubiladosña kasqankurayku, Diosta yupaychanankupaq astawan tiempoyuq kasqankurayku ima, Bibliamanta yachakuyta qallarisqanku. Chantá inglesta parlaqkunaq qutuchakuyninkupi yaqha tukuyninku precursoresjina llamkʼachkasqankuqa, wak qutuchakuykuna qallarinanpaq, tukuy sunqutaq llamkʼanallankupaqpuni yanapan.

Bendicionesta japʼinku

Mana iskaychakuspa nisunman achkha runasqa, Diospa Reinonmanta paykunap parlayninkupi willaptinchik uyarinawanchikta. Allin wakichisqa hermanos —solteros, casados, waynas, sipaskuna, machitus ima— maypichus pisi willaqkuna kanku, chayman risqankuta rikuyqa mayta kallpachawanchik. Wak suyusman rispa Diosmanta willay mana atikullaptinpis, llampʼu sunquyuq runasta tarispaqa mayta kusikunku. ¿Qampis maypichus pisi willaqkuna kanku chayman riyta atiwaqchu?a (Luc. 14:28-30; 1 Cor. 16:9.) Jinata ruwanki chayqa, achkha bendicionesta japʼinki.

[Sutʼinchaynin]

[21 paginapi recuadro]

Jubilados kaqkuna

Berylqa, Gran Bretañamanta Canadaman ripurqa, chaypitaq juk jatun empresapi directorajina llamkʼarqa. Chantá caballospi correyta yachakullarqataq, allinta caballospi correyta yachasqanraykutaq kay 1980 watapi wak suyusmanta kaqkunawan correnanpaq payta Canadá suyumanta kacharqanku. Jubilakuytawankamataq Berylqa, qusanwan khuska Chapala llaqtaman ripurqa. Paykunaqa juk restauranteman mikhuq riq kanku, chaypitaq wak jubiladosta kusisqallapuni kasqankuta, inglesta parlaqta rikuspa, paykunaman qayllaykuspa, sutinta willaspa, imatachus México llaqtapi ruwachkasqankuta tapuriq. Ajinata tapuspataq Jehovamanta sutʼinchaqkunallawanpuni tinkuq. Chayrayku Berylwan qusanwan tʼukurirqanku, Diosta riqsiy kusiyta apamun chayqa manachu ñuqanchikpis Diosta riqsinanchik allin kanman, nispa. Achkha killasta qutuchakuyman riytawan, Berylqa Bibliamanta yachakuyta qallarirqa, chaymanta bautizakurqa chantá achkha watasta precursorajina llamkʼarqa.

[22 paginapi recuadro]

“Paykuna yanapasqankuqa, juk bendición”

Suyunkuta saqispa wak llaqtasman riq hermanosqa, may jatunpaq qhawasqas kanku. Caribepi sucursal jinata qillqasqa: “Chay hermanos suyusninkuman ripunkuman chayqa, qutuchakuykunaqa llawchʼiyanman. Imaraykuchus qutuchakuykunata paykuna yanapasqankuqa juk bendición”.

Diospa Palabranqa, ‘achkha warmis sumaq willaykunata willachkasqankuta’ nin (Sal. 68:11). Chayrayku achkha hermanasqa, Diosmanta astawan willamunankupaq wak suyusman risqankuqa may allin. Europa del Este nisqapi juk sucursal kayta nisqa: “Wakin qutuchakuykunapiqa sapa chunkamanta qanchis hermanas kanku. Wak suyusmanta soltera hermanasqa, qutuchakuypi musuqkunallaraq kaq hermanasta wakichisqa kanankupaq yanapanku. ¡Chay precursora hermanastaq juk sumaq regalojina kanku!”

Wak suyusman rispa, ¿imaynataq kay precursoras sientekunku? Juk hermana Angelica, 35 watayuq wak suyusman precursorajina risqanmanta nin: “Wak llaqtaspi Diosmanta willayqa mana atikullarqachu, imaraykuchus juk llaqtapiqa ñankunapis tʼurulla karqa, sapa pʼunchay runa ñakʼarisqanta rikusqaytaq mayta llakichiwaq. Chaywanpis achkha runasta Bibliamanta yachachisqayqa mayta kusichiwaq. Chay suyumanta hermanas munakuyninkuta rikuchiwasqankupis mayta kusichiwaq. Juknin hermanaqa, wak suyumanta mayta kallpachakuspa precursorajina jamusqay, paytapis precursorajina llamkʼananpaq yanapasqanta niwarqa”.

Juk precursora soltera, Sue sutiyuq, 50 watayuq nin: “Chʼampaykuna kaptinpis bendicionesqa may achkha. ¡Runaman Diosmanta willayqa kusikunapaq! Achkha sipaskunawan runaman willaq lluqsispaqa, ima yuyaychaykunatachus Bibliamanta, revistasmanta ima yachakusqayta, imaynatachus ima chʼampaytapis atipasqayta ima willariq kani. Chayrayku achkha sipaskunaqa, ima chʼampaytapis precursorajina atipasqay, paykunapis chʼampayninkuta atipanankupaq kallpachasqanta niwanku. Ajinamanta chay hermanasta yanapasqayqa allin wakichisqa kasqayta yuyachiwan”.

[20 paginapi mapa]

(Publicacionpi qhawariy texto originalta)

MÉXICO

Monterrey

Guanajuato

Irapuato

Ajijic

Chapala

Chapala qucha

San Miguel de Allende

Querétaro

MÉXICO LLAQTA

Cancún

[23 paginapi dibujo/foto]

Wak suyusmanta México suyupi tiyakuqkunaqa, allin willaykunata inglés parlayninkupi ni jaykʼaq uyarisqankuchu