¿Macedoniaman yanapariq riwaqchu?

1. ¿Imataq Pablota, compañerosninta ima Macedoniaman rinankupaq tanqarqa?

¹ Apóstol Pablo 49 watapi misionerojina iskay kutirayku Antioquía Siriamanta lluqsispa Éfeso, Asia Menormanta wak llaqtasnintawan ima visitananpaq viajarqa. Chaywanpis espíritu santoniqta “Macedoniaman yanapari[q]” rinanpaq waqyarisqa karqa. Pay, compañerosnin ima may kusiywan chay waqyariyta kasukurqanku, yanapakusqankuraykutaq ñawpaq kaq qutuchakuyta jatarichirqanku (Hech. 16:9, 10; 17:1, 2, 4). Kay tiemponchikpipis Diospa cosechanpi chiqamanta achkha yanapaqkuna Jallpʼantinpi willanankupaq necesitakullantaq (Mat. 9:37, 38). ¿Chay llamkʼaypi yanapakuwaqchu?

2. ¿Imaraykutaq wakinkuna wak suyuman mana ripuyta atisqankuta yuyanku?

² Apóstol Pablojina ichapis kayta munanki, chaywanpis wak suyusman ripunaykipaq ni jaykʼaq tʼukurirqankichu. Ichá Escuela de Galaadman rinaykipaqqa manaraq edadniyuqchu chantá solterallaraq kanki chayri wawasniykita uywachkallankiraq. Wak suyuman ripunaykipaq ichapis wak qalluta mana yachakunaykipaqjina reparakunki chayri suyuykipi mana ganakuyta atisqaykirayku maypichus kunan tiyakuchkanki chayman ripurqanki, kunantaq mana kutinaykipaqjinachu kachkanki. Chaywanpis Jehovamanta mañakuspa, tʼukurispa ima maypichus astawan yanapata necesitakun chayman ripuyta atisqaykita reparanki.

3. ¿Imaraykutaq wak suyuman willaq rinaykipaq mana misionerojinapunichu wakichisqa kana tiyan?

³ ¿Misionerojina kanapaq wakichisqapunichu kana? Pablota, compañerosninta ima, ¿imaraykutaq allin rirqa? Imaraykuchus Jehovapi, espíritu santonpi ima atienekurqanku (2 Cor. 3:1-5). Misionerojina mana wakichisqa kayta atispapis, wak suyupi sumaqta willayta atiwaq. Ima suyullapipis yanapakuspaqa kay Diosmanta Parlayta Yachanapaq chantá Willayta Yachanapaq Tantakuy astawan wakichisunqa. Galaadman chayri wak wakichisqa escuelaman riyta munanki chayqa wak suyuman risqayki misionero kanaykipaq mayta wakichisunqa.

4. ¿Imaraykutaq machuyasqa hermanos wak suyusman ripunankupaq mana manchachikunankuchu tiyan?

⁴ Machuyasqa hermanos. Machitu hermanos chantá espiritualmente wiñay tukusqa kaqkuna, mana anchata unquqkuna, maypichus willanapaq yanapata necesitakun chay suyupi mayta yanapankuman. Qamrí, ¿jubilasqañachu kanki? Wakin hermanospa pagon pisilla kaptinpis wakcha suyuspi yanapakunku, maypichus sumaq medicoswan jampichikuyta chayri wakin imastapis suyunkumanta nisqaqa pisi qullqillawan rantiyta atinku.

5. Jubilasqa hermano wak suyuman ripusqanmanta sutʼinchay.

⁵ Jubilasqa hermano inglés qalluta parlaq suyumanta, qutuchakuypi ancianojina, precursorjina ima llamkʼaq, Asiamanta ura lado riqsisqa suyuman ripurqa, maymanchus achkha turistas rillankupuni, juchʼuy qututa inglés qalluta parlaqkunata yanapananpaq, maypichus jisqʼun willaqkunalla karqanku. Kay qutuqa wak suyusmanta 30.000 runasman willanan karqa. Iskay watallapi tantakuykunaman riqkuna 50 runasman yapakurqanku. Hermano nin: “Kayman jampusqayqa may chhika bendicionesta apamuwan. Chaykunamanta parlanaypaqqa tiempo mana alcanzawanmanchu”, nispa.

6. Soltera hermana maypichus astawan willaqkuna necesitakun chayman risqanmanta sutʼinchay.

⁶ Soltera hermanas. Jehová maypichus yanapata necesitakun chaypi allin willaykunata willakunanpaq hermanasta apaykachan (Sal. 68:11). Astawan willayta munaspa, juk sipas hermana wak suyuman ripuyta munarqa, chaywanpis tatasnin llakikurqanku imaynachus rinanmanta. Chayrayku mana chʼampaykunasniyuq suyuta akllarqa, sucursalmantaq qillqarqa, mayqinchus imaynachus chaypi kasqanta sutʼincharqa. Chay suyupi suqta watasta kasqanpi achkha bendicionesta rikurqa. Pay nin: “Suyuypiqa Bibliamanta pisi runasllaman yachachiyman karqa. Maypichus pisi willaqkunalla kanku chayman ripuspaqa Bibliamanta achkha runasman yachachirqani, aswan sumaq yachachiq kanaypaqtaq yanapawarqa”, nispa.

7. Juk familia wak suyuman ripusqanmanta sutʼinchay.

⁷ Familias. Wawasniyuq kasqaykirayku Diospa Reinonmanta willakunallanpaqpuni, ¿manachu wak suyuman ripuyta atisqaykita yuyanki? Juk familia iskay wawasniyuq —juknin pusaq watasniyuq, juknintaq chunka watasniyuq— wak suyuman ripurqa. Maman nin: “Wawasniykuta kaypi uywasqaykumanta mayta kusikuyku, jinamanta precursores especialeswan chantá misioneroswan masichakurqanku. Maypichá astawan willaqkuna necesitakun chayman ripuspaqa may kusiyta tariyku”, nispa.

8. Wak suyuman ripunapaq, ¿wak qallutapunichu parlana tiyan? Sutʼinchay.

⁸ Wak qalluta yachakuymanta. ¿Wak qalluta yachakuyta mana atinapaqjinachu qhawanki? Ichapis maypichus willaqkuna necesitakun, ima qallutachus parlanki chayta parlallankutaq. Inglés qalluta parlaq qhariwarmi maypichus español qalluta astawan parlanku chay suyuman ripurqanku, chaypitaq achkha runas wak suyusmanta kasqankurayku inglés qalluta parlanku. Sucursal ima qutuchakuykunapichus willaqkunata necesitasqankuta willarqanku. Juk qutuchakuyta akllaspataq iskay kutita rirqanku. Wasinkuman kutispataq juk watapi qullqisituta tantakurqanku. Ripunankupaqjina kachkaptinkutaq chay suyumanta hermanos maypichus tiyakunankupaq pagayta atisqankumanjina maskʼaysirqanku.

9, 10. Pikunachus wak suyuman ripurqanku, ¿imatataq ruwayta atinkuman, imaraykutaq?

⁹ Wak suyusman ripuqkuna. Manaraq Bibliamanta chiqa kaqta riqsichkaspa, ¿suyuykimanta ripurqankichu? Ichapis suyuykipi Diospa cosechanpi yanapaqkuna necesitakuchkan. Willaypi yanapakunaykipaq, ¿kutinaykipichu tʼukurichkanki? Wak suyuyuq hermanomanta nisqaqa chay qalluta parlankiña chantapis imapichus llamkʼanaykita, maypichus tiyakunaykita ima yachankiña. Runastaq qamta astawan uyariyta munasunqanku.

¹⁰ Albaniamanta juk runa Italiaman jarkʼakunanpaq ripurqa. Sumaq llamkʼayta tarispataq familianman qullqita apachiq. Tiemponman chiqa kaqta yachakurqa. Qhipamantaq juk qutu precursores especialesta albanés qalluta yachachirqa, Albania suyuman willaq ripuchkasqankurayku. Hermano nin: “Ima suyutachus saqirqani chayman richkarqanku, chay qalluta mana riqsispapis may kusisqas kachkarqanku. Albaniamanta qalluta parlaptiypis, chaypi uywasqa kaptiypis, ¿imatataq Italiapi ruwachkarqani?”, nispa tapukurqa. Chay hermano allin willaykunata suyunpi willananpaq kutipusqanmanta nirqa: “Llamkʼayniyta, qullqi kapuwasqanmanta ima, Italiapi saqisqaymantaqa ni jaykʼaq pesachikurqanichu. Sumaq llamkʼaytaqa Albaniapi tarirqani, Jehová Diosta sirviyqa kusiyta apamullanpuni tukuy imamanta nisqaqa”.

11, 12. Wak suyuman riyta munaqkuna, ¿imatataq ruwananku tiyan?

¹¹ ¿Imaynatá ruwasunman? Pablo, compañerosnin ima manaraq espíritu santo Macedoniaman rinankupaq kamachichkaptin, inti yaykuq ladoman ripuchkarqanku. Chaywanpis espíritu santo jarkʼarqa, chayrayku paña ladoman ripurqanku (Hech. 16:6). Bitiniaman chayachkaptinkutaq Jesús jarkʼarqa (Hech. 16:7). Jehovaqa Churinniqta kay tiempopi willayta ñawpaqman apachkallanpuni (Mat. 28:20). Wak suyuman ripuyta munachkanki chayqa Jehovap yanapayninta mañakuy (Luc. 14:28-30; Sant. 1:5; “¿Imaynapí yanapata necesitasqankuta yachayman?”, nisqa recuadrota qhawariy).

¹² Imatachus ruwayta munasqaykita qutuchakuyniykimanta ancianoswan chayri espiritualmente wiñay tukusqa hermanoswan parlariy (Pro. 11:14; 15:22). Wak suyupi sirvinamanta imastachus qillqakusqanta ñawiriy chantá imaynachus chay suyu kasqanta yachanaykipaq ukhunchariy. Ichapis chay suyuman juk tiempota riwaq. Chay suyuman riyta munanki chayqa, astawan yachanaykipaq sucursalman qillqanayki kanqa. Kay watamanta Anuario libropi direccionninta maskʼay. Cartata sucursalman apachinaykimantaqa qutuchakuyniykimanta ancianosman jayway, manaraq cartata apachichkaptinku wak imastawan paykuna sutʼinchanankupaq (kay Organizados para hacer la voluntad de Jehová, nisqa libropi páginas 111, 112 qhawariy).

13. ¿Imaynamantá sucursal yanapasunkiman chantá imatá qam ruwanayki tiyan?

¹³ Sucursal maychus kaq willayta akllanaykipaq apachimusunqa. Chaywanpis mana documentosta qusunqachu visata urqhunaykipaq, chay suyupi tiyakunaykipaq permisota, nitaq rinaykipaq invitacionta. Manallataq maypichus tiyakunaykipaq maskʼapusunqankuchu. Chaykunataqa manaraq ripuchkaptiyki ruwanaykiña kanqa. Chantapis visata urqhunaykipaq, llamkʼanaykipaq ima, embajadaswan chayri consuladoswan parlanayki kanqa, ima requisitoschus kasqanta yachanaykipaq. Pikunachus wak suyuman riyta munanku leymanjina papelesninkuta chʼuwachananku tiyan chantá sapa juk ruwananta juntʼanan tiyan (Gál. 6:5).

14. Maypichus Diosmanta willayta mana saqinkuchu chayman ripuyta munanki chayqa, ¿imatá ruwanayki tiyan?

¹⁴ Maypichus Diosmanta willayta mana saqinkuchu. Wakin suyuspi hermanosninchik willanankupaq yuyayniyuq kananku tiyan (Mat. 10:16). Chay suyusman ripuqkuna, willayninchik aswan sutʼi kasqanta reparachinkuman, chaytaq chay lugarmanta hermanospa kawsayninkuta wañuy pataman churankuman. Chayjina suyuman ripuyta munachkanki chayqa sucursalman juk cartata qutuchakuyniykimanta ancianosniqta apachiy.

15. Wak suyuman mana ripuyta atispa, ¿imaynatá astawan ruwawaq?

¹⁵ ¿Wak suyuman mana riyta atiptiykirí? Wak suyuman mana ripuyta atinkichu chayqa ama qʼinaqakuychu. Ichapis wak punkujina kicharikun qampaq, maypichus “ashkha runas evangeliota uyarinankupaj wakichisqa kashanku” (1 Cor. 16:8, 9). Qutuchakuykunata waturiq hermano ichapis maypichus willaqkuna necesitakusqanta yachan. Ichapis wak qalluta parlaq qutuchakuyta yanapawaq. Chantapis qutuchakuyniykipi willaypi astawan llamkʼawaq. Jehovaqa tukuy sunqu atisqanchikmanjina yupaychasqanchikta qhawasqanta yuyarinayki tiyan (Col. 3:23, 24).

16. ¿Imatá ruwasunman pillapis wak suyuman ripuyta munasqanta niwaptinchik?

¹⁶ Espiritualmente wiñay tukusqa hermanota, wak suyuman ripuyta munaqta, ¿riqsinkichu? Jina kaptinqa kallpachay, yanapariytaq. Pablo Antioquía Siriamanta llaqtata saqichkaptinqa, Romap kimsa jatun llaqtasninmanta juknin kaq karqa (Roma, Alejandría ima nisqamanta). Willanapaq achkha kaptinpis, Pablo ripunman karqa chaypis qutuchakuy mayta faltachanman karqa. Chaywanpis Pablota qhipachinankupaq hermanos imatapis ruwasqankuta Bibliapi mana ninchu. Mana paykunallapichu yuyachkarqanku, imaptinchus “Jallpʼaqa kay pacha” kasqanta yacharqanku (Mat. 13:38).

17. ¿Imaraykutaq may sumaq kanman “Macedoniaman yanapari[q]” rinayki?

¹⁷ Pablo, compañerosnin ima Macedoniaman risqankurayku achkha bendicionesta japʼirqanku. Filipos llaqtapi Lidiata riqsirqanku pitachus Jehová “sonqonta kicharerqa, Pabloj nisqanta tukuy sonqo uyarinampaj” (Hech. 16:14). Lidia, wasinmanta kaqkuna ima bautizakusqankurayku Pablo, misioneros ima maytachá kusikurqanku. Achkha suyuspi llampʼu sunqu Lidiajina runas kankuraq, pikunachus Reinomanta willaykunata manaraq uyarinkuchu. “Macedoniaman yanapari[q]” rinaykipaq waqyariyta uyarinki chayqa, mana jaykʼaqjina chay runasta yanapayta atinki.