Jehová sonqoykej tukuy munasqanta juntʼachun

1. 1) ¿Imapajtaj jóvenes yuyaycharikunanku tiyan? 2) ¿Imajtintaj jóvenes mana manchachikunankuchu tiyan? (Patapi kaj dibujota qhawariy).

JÓVENES qankuna yachankichej jina, mayllamanpis viajanapaj ñaupajtaqa allinta yuyaycharikunchej, ¿icharí? Kikillantataj kausayninchejpi imatachus ruwanata allinta ajllanapajqa, ñaupajta allinta yuyaycharikuna. Ichapis chayta ruwayqa mana facilllachu kanqa. Uj sipas Heather sutiyoj nin: “Jatunña kaspa imatachus ruwanayta mana yachaspa, manchachikuni”, nispa. Qanpis pay jinallataj manchachikunki chayqa, Jehová Dios nisqanmanta ama qonqapuychu. Pay nin: “Ama manchachikuychu, [...] imaraykuchus noqaqa Diosniyki kani. Noqa kallpachasqayki, yanapallasqaykitaj”, nispa (Isa. 41:10).

2. ¿Imastataj Jehová Dios ruwarqa kusisqa kananchejpaj?

² Jehová Diosqa qhepaman imata ruwananchejpajpis, allintaraj yuyaycharikunanchejta munan (Ecl. 12:1; Mat. 6:20). Payqa kusisqa kausakunanchejta munan. Chayrayku noqanchejpaj tukuy ima kʼachituta ruwarqa. Miskʼi mikhunatapis churapuwarqanchej. Chantapis sajra imasmanta jarkʼawanchej, allinta kausakunanchejpajtaj yachachiwanchej. Pikunachus Paypa yachachisqanta qhesachanku, chaykunaman Jehová nin: “Imachus noqaman mana allinchu rijchʼawan, chaytapuni qankunaqa ajllakorqankichej”, nispa. Chantá nillantaj: “Kamachisneyqa sumajta mikhonqanku, qankunatajrí yarqhaymanta wañunkichej. Kamachisneyqa sumaj yakusta ujyanqanku, qankunatajrí yaku chʼakiywan wañunkichej. Kamachisneyqa kusikonqanku, qankunatajrí may pʼenqachisqa kankichej. Kamachisneyqa tukuy sonqowan sumajta takirikonqanku”, nispa (Isa. 65:12-14). Kausayninchejpi Jehovata kusichinapaj jina, allinta ajllaspaqa payta jatunchanchej (Pro. 27:11).

¿IMASTA RUWASPATAJ KUSISQA KAWAJ?

3. ¿Imatataj Jehová Diosninchej ruwananchejta munan?

³ Noqanchejqa mana animalitos jinachu kanchej. Animalitosqa mikhunankupaj, yakuta ujyanankupaj, miranankupaj imalla ruwasqa kanku. Noqanchejtatajrí Jehová ruwawarqanchej, payta rejsinanchejpaj, yupaychananchejpajtaj, ajinamanta kusisqa kananchejpaj (Sal. 128:1; Mat. 5:3). Chantapis Jehová Diosqa “payman rijchʼakojta” ruwawarqanchej. Payqa “munakuyniyoj”, ‘kusikuyniyojtaj’ (2 Cor. 13:11; 1 Tim. 1:11; Gén. 1:27). Pay jina kanapaj kallpachakusunchej chayqa, may kusisqa kasunchej. Bibliaqa nin: “Aswan kusiy wajman qoriy, qorichikunamanta nisqaqa”, nispa (Hech. 20:35). Arí, wajkunaman qorispaqa kusisqapuni kanchej. Jehovaqa munan payta munakunanchejta, runa masinchejtapis munakunanchejta. Chayrayku kausayninchejpi imatachus ruwanata allinta ajllananchejta munan (Mateo 22:36-39 leey).

4, 5. ¿Imasta ruwaspataj Jesús mayta kusikoj?

⁴ Jesusmanta sumajta yachakusunman. Payqa wawa kashaspa pujllakoj, kusirikojtaj. Imaraykuchus Diospa Palabran nin jina ‘uj tiempo kan asinapaj, uj tiempotaj tusunapaj’ (Ecl. 3:4). Chantapis Jesusqa Tatanpa qayllallanpipuni kananpaj, sumajta Diospa Palabranta estudiarqa. Chayrayku 12 watasniyoj kashajtin, templopi yachachejkuna mayta tʼukorqanku Jesuspa “yachayninmanta, kutichisqasninmanta ima” (Luc. 2:42, 46, 47).

⁵ Jesusqa kurajña kaspa Tatanpa munayninta ruwaspa kusisqa karqa. Tatanqa Jesusta ajllarqa “wajchasman sumaj willaykunata” willananpaj, kachamullarqataj ‘ciegosman’ willananpaj watejmanta qhawarinankuta (Luc. 4:18). Salmo 40:8 versículo nisqanman jina Jesusqa “tukuy sonqo” Tatanpa munayninta ruwarqa. Arí, Jesusqa Tatanmanta runasman yachachispa mayta kusikoj (Lucas 10:21 leey). Uj kuti Jesusqa, uj warmiman imaynatachus Diosta yupaychanata yachacherqa. Chantá yachachisqasninman nerqa: “Mikhunayqa kachamuwajniypa munayninta ruwanay, kamachiwasqantataj tukuchanay”, nispa (Juan 4:31-34). Jesusqa Tatanta, runastapis munakuspa may kusisqa karqa, qanpis pay jinallataj ruwajtiyki kusisqa kanki.

6. ¿Imaraykú allin kanman jóvenes, precursor jina unaytaña llankʼaj hermanoswan parlarinanku?

⁶ Ashkha hermanosqa jovencitomantapacha precursores kanku, kusisqataj kashanku. Joven, allin kanman kausayniykipi imatachus ruwayta munasqaykimanta paykunawan parlarinayki. Paykunaqa nisonqanku precursor jina llankʼayqa, kausayniykipi ashkha imaspi yanapasunanta. Proverbios 15:22 nin: “Mana yuyaychachikuspa, ima ruwanatapis wakichikusqaqa mana allinchu rin; allin rinanqa ashkha yuyaychajkunapi kashan”, nispa. Jesusqa cielopi Tatanwan kashaspa mayta yachakorqa. Kay jallpʼapi kashaspapis yachakullarqapuni. Payqa runasman sumaj willaykunata willaspa kusiyta tarerqa. Mayta ñakʼarishaspapis Diosta kasukuspa kusikullarqataj (Isaías 50:4 leey; Heb. 5:8; 12:2). Qanpis Diospaj astawan llankʼaspa kusisqa kawaj.

DIOSMANTA WILLASPA KUSIKUNCHEJ

7. ¿Imaraykutaj jóvenes runasman yachachimuspa kusisqa kankuman?

⁷ Jesús nerqa tukuy laya runasta yachachisqasninman tukuchimunanchejta, Diospa Palabranmantataj yachachimunanchejta (Mat. 28:19, 20). Joven, kausayniykipi chayta ruwanki chayqa, kusisqa kanki, Jehová Diostataj jatunchanki. Pisimanta pisitaj Diosmanta sumajta willayta yachakunki. Timothy sutiyoj hermanomanta parlarina. Payqa jovencitomantapacha precursor jina sirvishan, nintaj: “Qallariypeqa mana uj estudiota tariyta atillarqanichu. Tiemponmanqa waj lugarman riporqani Diosmanta willamunaypaj. Chaypitaj uj killallapi ashkha runaswan Bibliata estudiayta qallarerqani. Chaykunamanta ujnintaj tantakuykunaman jamuyta qallarerqa. Chantá Soltero Cristianospaj Escuelaman rerqani.a Chay escuelamantataj waj lugarman kachawarqanku. Chaypitaj tawa runaswanña Bibliata estudiashani. Runasman Bibliamanta yachachispa kusisqa kani, imaraykuchus rikuni imaynatachus Diospa yanapayninwan kausayninkuta cambiasqankuta. Arí, precursor jina Jehovapaj llankʼaspa kusisqa kani, ajinamanta payman munakuyniyta rikuchini”, nispa (1 Tes. 2:19).

8. ¿Imatataj wakin jóvenes ruwarqanku Diosmanta astawan willanankupaj?

⁸ Wakin jovenesqa Diosmanta astawan willanankupaj waj parlayta yachakunku. Hermano Jacobmanta parlarina. Payqa Estados Unidosmanta, nintaj: “Qanchis watitayoj kashajtiy, escuelamanta compañerosneyqa Vietnam suyumanta karqanku. Paykunaman Jehovamanta yachachiyta munarqani. Chayrayku tiemponman parlayninkuta yachakuyta qallarerqani. Chaypajtaj inglés parlaypi kaj Torremanta Qhawaj revistata, vietnamita parlaypi kaj revistawan kikincharej kani. Chantapis wakin hermanoswan amigosta ruwakorqani. Paykunaqa vietnamita congregacionpi kasharqanku. Chay congregaciontaj wasiy chaypi kasharqa. Chantá 18 watasniyoj kashaspa precursor jina llankʼayta qallarerqani. Tiemponmantaj Soltero Cristianospaj Escuelaman rerqani. Chay escuelapi yachakusqayqa mayta yanapawarqa, vietnamita parlaypi kaj qotitupi precursor jina, anciano jinataj sumajta llankʼanaypaj. Vietnam suyumanta kajkunaqa, parlayninkuta yachakusqaymanta mayta tʼukunku. Paykunaqa wasinkuman wajyarikuwanku, ashkhasmantaj Bibliamanta yachachishani. Wakinkunaqa bautizakunkuña”, nispa (Hechos 2:7, 8 kikinchay).

9. ¿Imaynatá Bibliamanta yachachiy jovenesta yanapanman?

⁹ Joven, runasman Bibliamanta yachacheyqa, sumajta trabajanaykipaj yanapasonqa. Chantapis yanapallasonqataj sumajta parlarinaykipaj, mana runasta manchachikunaykipaj, wajkunawan kʼachallamanta parlarinaykipajpis (Pro. 21:5; 2 Tim. 2:24). Chantá runasman yachachispaqa kusiyta tarinki, imaraykuchus astawan sutʼita yachakunki imatachus creesqaykimanta. Mana chayllachu Jehová Dioswanpis khuska llankʼanki (1 Cor. 3:9).

10. Tiyakunchej chay lugarpi runas mana Diosmanta uyariyta munajtinkupis, ¿imaraykutaj may kusisqa kasunman?

¹⁰ Maypichus tiyakunki chaypi ichá ni pi Diosmanta uyariyta munanchu. Jinapis Diosmanta willaspaqa kusisqa kasunman. Imaraykuchus hermanosninchejwan khuska trabajanchej yachakuyta munajkunata maskʼaspa. Uj runallata tarejtinchejpis, tukuy kusikunchej, imaraykuchus chay runata tarinapaj tukuy yanapakorqanchej. Hermano Brandonmanta parlarina. Payqa uj lugarpi jisqʼon watasta precursor karqa. Chay lugarpitaj runasqa Diosmanta mana uyariyta munallankuchu. Brandon nin: “Diosmanta willaspa kusisqa kani, Jehovaj kamachisqanta juntʼashasqayrayku. Noqaqa colegiota tukuchaytawan precursor jina llankʼayta qallarerqani. Mayta kusikuni congregacionniymanta jovenesta ñauparinankupaj yanapaspa. Chantá Soltero Cristianospaj Escuelaman rerqani. Chay escuelamantataj waj lugarman precursorta jina kachawarqanku. Rikuni imaynatachus wakin hermanos bautizakunankukama runasta yanapasqankuta, noqatajrí manaraj pitapis bautizakunankama yanaparqanichu. Jinapis mayta kusikuni precursor jina runasman Diosmanta willaspa”, nispa (Ecl. 11:6).

JEHOVAPAJ ASTAWAN LLANKʼAYTA ATINKI

11. ¿Imaynatataj ashkha jóvenes Jehovapaj astawan llankʼashanku?

¹¹ Tukuy imaymanamanta Jehovapaj astawan llankʼasunman. Kay tiempopeqa ashkha Tantakuna Wasis necesitakun. Chayrayku ashkha jóvenes Tantakuna Wasista ruwaysikuspa yanapakushanku. Qanpis paykuna jinallataj yanapakuwaj. Chayta ruwaspaqa Jehová Diosta jatunchanki. Hermanoswan khuska trabajaspataj kusisqa kanki. Tantakuna Wasista ruwaysikuspaqa kʼuchi kʼuchilla imatapis ruwayta yachakunki. Chantapis yachakullankitaj kausayniykita mana wañuy pataman churaspa trabajayta, cargoyoj kajkunatapis kasukuyta.

12. ¿Imaynasmantataj Kevin precursor kaspa Diospaj astawan llankʼarqa?

¹² Uj hermano Kevin sutiyoj nin: “Wawitamantapacha Jehová Diospaj astawan llankʼayta munarqani. Chayrayku 19 watasniyoj kashajtiy precursor jina llankʼayta qallarerqani. Gastosniypajtaj khuskan diallata, chayri wakin diasllata uj hermanowan trabajaj kani. Payqa albañil karqa, paywantaj yachakorqani techayta, ventanasta, punkustapis churayta. Tiemponmanqa iskay watata yanapakorqani, Tantakuna Wasista, hermanospa wasisninkutawan allinchaspa. Mayqenkunatachus sinchʼi muyoj wayra urmaracherqa, chaykunata. Chaymantaqa willariwarqanku, Sudáfrica suyupi Tantakuna Wasista sayachinapaj yanapata necesitakusqanta. Chayta yachaytawantaj uj solicitudta juntʼacherqani, wajyarimuwarqankutaj. Chaypeqa pisi tiempollapi Tantakuna Wasita sayachiyku, chantá waj ladopiñataj sayachimuyku. Tantakuna Wasista ruwaspa yanapakojkunaqa, familia jinapuni kayku, khuska tiyakuyku, khuska Bibliata estudiayku, khuskataj trabajayku. Chantapis maypichus yanapakushayku chaypi hermanoswan predicaspa, mayta kusikuni. Wawamantapacha Diospaj astawan llankʼayta munasqayqa juntʼakun, chaytaj maytapuni kusichiwan”, nispa.

13. ¿Imaraykutaj ashkha jóvenes Betelpi trabajaspa kusisqa kanku?

¹³ Ashkha hermanosqa precursores jina llankʼarqanku, kunantaj Betelpi yanapakushanku. Betelpi yanapakojkunaqa may kusisqa kanku, imaraykuchus chaypi tukuy ima ruwasqankoqa Jehová Diospaj. Chantapis Betel wasipi trabajajkunaqa, yanapakunku Biblias, Bibliamanta yachachinapaj publicacionespis, tukuy congregacionesman chayananpaj. Uj hermano Dustin sutiyoj, Betelpi yanapakun, pay nin: “Jisqʼon watitayoj kashajtiy, Jehová Diospaj astawan llankʼanayta nikorqani. Chayrayku colegiota tukuchaytawan precursor jina llankʼayta qallarerqani. Casi iskay watanman jinataj Betelman wajyarimuwarqanku. Betelpitaj imprentawan, computadoraswantaj trabajayta yachakorqani. Betelpi yanapakuspaqa mayta kusikuni. Imaraykuchus Betelpeqa mundontinpi imaynatachus predicakushasqanmanta ñaupajta yachayku. Chantapis Betelpi llankʼasqaykuwanqa, runasta yanapayku Jehová Diosman qayllaykunankupaj”, nispa.

¿IMATATAJ KAUSAYNIYKIPI RUWANKI?

14. Joven, ¿imaynasmantá wakichikuwaj Jehovata astawan sirvinaykipaj?

¹⁴ Joven, Jehová Diospaj astawan llankʼanaykipaj, ¿imaynatá wakichikushawaj? Jesús jina kʼacha kanaykipaj kallpachakuy. Chaytaj yanapasonqa Jehová Diosta astawan sumajta sirvinaykipaj. Chaypajqa sapa pʼunchay Diospa Palabranta leey, leesqaykipitaj tʼukuriy. Tantakuykunapi parlarinaykipajtaj sumajta wakichikuy. Escuelallapiraj kashaspa sumajta predicanaykipaj yachakushay. Runa masiykimanta interesakuy. Chaypajtaj kʼachallamanta tapuriy imaynachus kashasqankuta, sumajtataj uyariy. Jehová Diosqa munan llampʼu sonqo kananchejta, imallapipis yanapaysikunanchejtataj. Chayrayku Tantakuna Wasipi imatapis allinchana kajtin chayri llimphuchana kajtin, tukuy sonqo yanapakuy (Salmo 110:3 leey; Hech. 6:1-3). “Hermanosqa Timoteomanta allinta parlaj kanku”. Chayrayku apóstol Pabloqa, Timoteota ajllarqa paywan khuska misionero jina llankʼananpaj (Hech. 16:1-5).

15. ¿Imastataj ruwawaj ima trabajotapis tarinaykipaj?

¹⁵ Casi tukuy precursoresqa kausakunankupaj ima oficioyojllapis kanku (Hech. 18:2, 3). Chayrayku ichapis allin kanman ima oficiollatapis yachakunayki, khuskan diallata chayrí wakin diasllata trabajanaykipaj. Chantapis ima oficioschus allin kasqanta yachanaykipaj, congregacionesta waturej hermanota, waj precursorestawan tapurikuwaj. Chantapis Biblia nin jina, “ruwasqasniykitaqa Tata Diospa makinman saqey, imatachus ruwanaykipaj wakichisqasniykitaj juntʼakonqa” (Pro. 16:3; 20:18).

16. Joven kashaspa precursor kanki chay, ¿imaspitaj yanapasonqa?

¹⁶ Jehová Diosqa kusisqa kanaykita munan (1 Timoteo 6:18, 19 leey). Precursor regular kaspaqa, waj precursoreswan astawan predicanki. Chaytaj creeypi sinchʼita sayanaykipaj yanapasonqa. Ashkha hermanos ninku, jovenmantapacha precursores regulares kasqankoqa, qhariwarmi kausayninkupi yanapasqanta. Wakin hermanosqa niraj casarakushaspa precursores regulares karqanku, casarakuspataj precursores regularesllapuni kanku (Rom. 16:3, 4).

17, 18. ¿Imatataj ruwanayki tiyan Jehová sonqoykej munasqanta qosunanpaj?

¹⁷ Kausayniykipi Jehovapaj astawan llankʼayta munasqaykeqa sonqomantapacha kanan tiyan. Salmo 20:4 versiculopi nin: “[Jehová Dios] sonqoykej tukuy munasqanta juntʼachun, tukuy yuyasqasniykitapis ruwachun”, nispa. Chayrayku allinta piensariy imatachus kausayniykiwan ruwanaykipi. Piensarillaytaj imastachus Jehová kay tiempopi ruwashasqanpi, imaynatachus chaypi yanapakuyta atisqaykipipis. Chantá Jehová Diosta kusichinaykipaj jina imatachus kausayniykiwan ruwanaykita ajllay.

¹⁸ Jehová Diosta astawan sirvispaqa, may kusisqapuni kanki. Imaraykuchus kausayniykiwan Payta jatunchanki. Arí, Jehová Diosta “munakuspa mayta kusikuy, paytaj sonqoykej munasqanta qosonqa” (Sal. 37:4).