Jehová Diosqa bendeciwanchej makinpi churakojtinchej

KAY 1923 watapi nacekorqani, Hemsworth ranchitupi. Chayqa Yorkshire llajtitapi kashan Inglaterra suyupi. Kuraj hermanoyqa Bob sutikun. Tatayqa curasta chejnikoj, puraj uyas kasqankurayku. Chayrayku 9 watasniyoj jina kashajtiy, llulla religiones runasta engañasqankumanta parlaj librosta rantikuspa leesqa. Chaytaj tataypa sonqonta kuyurichisqa. Watasninmantaj Bob Atkinson visitariwarqayku, uj tocadiscopitaj hermano Rutherfordpa discursonta uyarichiwarqayku. Repararqaykutaj chay uyarisqayku, tatay rantikusqan chay librospis kikin runasllataj ruwasqankuta. Tatayqa Bob Atkinsonman nerqa, sapa chʼisi wasiykuman jamunanta tukuy tapuykunasniykuman kutichinanpaj. Hermano Bobqa tantakuykunaman wajyariwarqayku. Chay tantakuykunaqa, uj hermanoj wasinpi ruwakoj. Chaytaj wasiykumanta karupi karqa. Jinapis chay tantakuykunaman rejpuni kayku. Pisi tiemponmantaj ranchuykupi, uj congregación rikhurerqa. Precursorestataj wasiykuman wajyarikojpuni kayku, jinallataj congregacionesta waturej hermanostapis. Chay hermanosta wajyareyqa, may sumajpuni karqa.

Familiayqa uj tiendata kicharerqa. Tataytaj hermanoyta nisqa: “Precursor kanki chayqa, tiendanchejta wisqʼapusun”, nispa. Hermanoytaj 21 watasniyoj wasimanta riporqa, precursor kananpaj. Iskay watanmantaj 16 watasniyoj kashajtiy, noqapis precursora karqani. Predicanaypajtaj uj tocadiscota, uj papelitotawan apakoj kani. Chay papelitoqa uj versiculota sutʼinchaj. Qhasi diasqa casi sapallaypuni predicaj kani. Jinapis uj señorawan Bibliamanta estudiayta qallarerqani, chay señorataj rato ñauparerqa. Tiemponmantaj familiaresninpis Diosmanta yachakullarqankutaj. Watanmantaj Cheshire llajtapi precursora especial karqani. Chaypeqa mana Jehovaj testigosnin karqankurajchu. Compañeraytaj Mary Henshall karqa.

Chay tiempopeqa Iskay kaj Guerra Mundial kasharqa. Warmistataj guerraman rinaykuta niwarqayku. Chay tiempopeqa pastoresta, curastapis mana obligajchu kanku cuartelman rinankuta. Chayrayku piensarqayku precursores especialestapis nillataj obliganawaykuta cuartelman rinaykupaj. Jinapis obligawarqayku. Chayrayku noqata killapaj wisqʼaykuwarqanku. Watanmantaj 19 watasniyoj kashajtiy, iskay kutita juicioman chayarqani. Chay kutispitaj mana juchachawarqankuchu. Ajinapi repararqani, Jehová Dios atiyninwan yanapawasqanta, kallpachawasqantataj (Isa. 41:10, 13).

UJ KʼACHA QOSATA TARINI

Arthur Matthewsta, hermanon Dennistawan wawasllaraj kashajtinku tatanku Diosmanta yachachisqa. Paykunataj jovencitos bautizakusqanku. Kay 1946 watapitaj Arthurta rejserqani. Paytaqa kinsa killapaj wisqʼaykusqanku, guerraman mana risqanrayku. Carcelmanta llojsimuytawantaj hermanonpajman ripusqa. Hermanonqa tataypa ranchitunpi kasharqa, precursor especial jina. Chantá hermanonta Irlanda suyuman kachasqankurayku, Arthur sapallan qhepakorqa. Tatasniytaj Arthurta wasiyman wajyakapusqanku. Imajtinchus Arthurqa precursor kasqa, kʼacha joventaj. Tatasniyta waturikamoj rejtiytaj, Arthurwan platosta mayllaj kayku. Chaymantaqa cartasta apachinakoj kayku. Kay 1948 watapitaj Arthurta carcelman 3 killapaj wisqʼaykullarqankutaj. Kay 1949 watapitaj, enero killapi casarakorqayku. Diospajtaj astawan llankʼallaytapuni munarqayku. Qolqetaqa mana wayrachillajchu kayku. Tiempoyku kajtenqa, frutasta cosechaspa trabajaj kayku. Jehovaj yanapayninwantaj precursoresllapuni karqayku.

Watanmantaj Irlanda del Norte suyuman precursores especialesta jina kachawarqayku. Ñaupajtaqa Armagh llajtitaman rerqayku. Chantá Newry llajtaman. Chay llajtasmanta runasqa católicos kasqankurayku, churanakuwaj kayku. Chayrayku paykunawan parlarinaykupaj sumajtaraj yuyaycharikoj kayku. Tantakuykunatataj uj hermanoj wasinpi ruwaj kayku. Chaymanqa 16 kilometrosta rej kayku. Tantakuykunamantaj 8 runaslla jamoj kanku. Qhepakojtiykoqa pampapi puñoj kayku. Sutʼiyamojtintaj, ashkhata mikhoj kayku. Kunanqa mayta kusikuni, chay lugarpi ashkha hermanos kasqankumanta.

“NOQAYKU RIYKUMAN”

Hermanoyqa warmin Lottiewan Irlanda del Nortepi, precursores especiales jina kasharqanku. Paykunawantaj 1952 watapi, Belfast llajtaman asamblea de distrito nisqaman rerqayku. Alojawarqayku chay hermanoqa, Pryce Hughes hermanota alojallasqataj. Hermano Pryceqa, Inglaterra suyumanta siervo de sucursal karqa. Uj chʼisitaj parlarisharqayku El camino de Dios es el de amor nisqa folletomanta. Chay folletoqa chay asambleapi llojserqa. Chaytaj ruwakusqa Irlanda suyumanta runaspaj. Hermano Pryce nerqa: “Irlanda suyupi catolicosman predicay mana facilchu. Imajtinchus curasqa, hermanosta alojamientosmanta qharqoshanku, runaswantaj qhatiykachachishanku. Chayrayku kay folletota tukuy suyuntinpi jaywakunanpaj, ashkha qhariwarmista maskʼashayku, autosniyojta”, nispa.a Chay ratopachataj, “noqayku riykuman”, nispa nerqayku, qosay chantá hermanoy, warminpiwan.

Dublín llajtapeqa, hermananchej Ma Rutlandqa precursoresta wajyarikojpuni. Payqa unayta Jehovata sirverqa. Noqaykupis wasinpi alojakorqayku, cosasniykuta vendenaykukama. Chantaqa qosay hermanoy, warminpiwan autota rantej rerqayku, hermanoypa motonpi. Motonqa ladonpi carritoyoj karqa. Maukʼa autotataj rantikorqayku. Chantá vendewarqayku chay runata, wasiykuman apapunawaykuta nerqayku. Imaraykuchus ni mayqenniyku manejayta yacharqaykuchu. Qosayqa chay tarde camapatapi autoj cajanta cambiashanmanpis jina practikarqa. Qʼayantintaj qosayqa autota garajemanta orqhonayashajtin, hermana Mildred Willet chamorqa. Payqa misionera karqa, aswan qhepamantaj John Barr hermanowan casarakorqa. Hermana Mildredqa manejayta yachasqa. Paytaj yacharichiwarqayku manejayta, chantá Irlanda suyuman kachaykukorqayku.

Chaypitaj alojamientota mayta maskʼarqayku. Imaraykuchus hermanosqa niwarqayku: “Ruedasniyoj wasita ama rantikunkichejchu. Imajtichus runasqa testigosman churanakusqankurayku ruphaykuchinkuman”, nispa. Jinapis alojamientota mana tarerqaykuchu. Chay jawataj autopi puñorqayku. Qʼayantintaj ruedasniyoj wasita rantikorqayku, iskay catresnillayojtaj karqa. Chay lugarmanta wakin runastaj lotenkupi ruedasniyoj wasiykuta sayachejta saqellawaj kayku. Ruedasniyoj wasiykuta saqej kayku chaymanta, 20 kilometrosninman jina predicamoj kayku. Chantá waj ladomanñataj ruedasniyoj wasiykuta apaj kayku. Chantaraj ruedasniyoj wasiykuta sayacherqayku chayman kutej kayku predicanaykupaj.

Irlanda suyumanta inti llojsimuynejta predikamorqayku, chaypeqa runasqa uyarillawaj kayku. Chaypitaj 20.000 kuraj folletosta runasman jaywarqayku. Chantaqa Inglaterra sucursalman, Bibliamanta yachakuyta munajkunaj sutisninkuta apacherqayku. Kunanqa chay lugarespi ashkha testigos kanku.

INGLATERRAMAN KUTIYKU

Watasninmantaj Londres llajtaman kachawarqayku, ura ladonejman. Semanasninmantaj qosayta sucursalmanta wajyamorqanku congregacionesta waturispa llankʼananpaj. Chaytataj qʼayantinmantapacha ruwanan karqa. Jinapis qosayta imastachus ruwananpaj, uj semanata yachacherqanku. Chantaqa Escocia suyuman kachawarqayku. Qosaypataqa mana tiempon karqachu discursonta wakichikunanpaj. Jinapis qosayqa ima ruwanasta qojtinkupis, mana manchachikuspa japʼikoj. Chaytaj mayta kallpachawaj. Chantapis unayta karu lugarespi predicamusqaykurayku, pisi hermanosllata rejsej kayku. Congregacionesta waturispataj ashkha hermanosta rejserqayku, chaytaj sumajpuni karqa.

Qosaytaqa 1962 watapi Galaad escuelaman wajyarerqanku, noqatataj mana. Chay escuelaqa 10 killapaj karqa. Chayrayku sumajta piensarerqayku imatachus ruwanaykuta. Jinapi qosayqa Galaad escuelaman rerqa, noqatataj ranchuyman precursora especialta jina kachawarqanku. Qosay Galaad escuelamanta kutinpusqanmanta watanmantaj, superintendente de distritota jina churarqanku. Kay lugaresta atiendenan karqa: Escocia suyuta, Inglaterra suyoj pata ladonta, Irlanda del Norte suyutawan.

IRLANDAPI WAJ LLANKʼAYTA QOWAYKU

Kay 1964 watapitaj qosayta nerqanku, Irlanda suyupi sucursalta kamachinanta. Chayta yachaspa tumpata manchikusharqayku. Jinapis kunanqa may agradecesqa kashani Betelpi trabajasqaymanta. Chantapis repararqani Jehová bendeciwasqanchejta, payta sirvinanchejpaj ima trabajota ruwajtinchejpis. Betelpeqa oficinapi trabajaj kani, publicacionesta cartonesman churaj kani, waykʼoj kani, pichajtaj kani. Qosay superintendente de distrito kashajtin, suyuntinmanta hermanosta rejserqayku. Chantapis imaynatachus estudiosniyku ñauparisqankuta rikorqayku. Tukuy imaymanamanta Diospa llajtanpi yanapakusqaykurayku Irlandamanta hermanoswan uj familia jina karqayku. Chaytaj uj sumaj bendición karqa.

UJ JATUN ASAMBLEA

Dublín llajtapi 1965 watapi, primera vez uj jatun tantakuy ruwakorqa. Chaymantaj waj suyusmanta hermanos jamorqanku.b Ashkha runas mana munarqankuchu chay tantakuy ruwakunanta. Jinapis chay tantakuymanqa 3.948 jamorqanku, 65 runastaj bautizakorqanku. Waj suyusmantaqa 3.500 jamorqanku. Chay hermanosqa Dublín llajtapi alojakorqanku. Ripushajtinkutaj uj cartata alojamientoyojkunaman jaywarqanku, agradecekunankupaj. Wakin runastaj hermanos kʼachas kasqankuta nerqanku. Chay jatun tantakuyraykutaj ashkha runas Jehovaj testigosninman tukorqanku.

Kay 1966 watapi, Irlanda del Nortemanta, Irlanda del surmantawan, Dublín llajtapi kaj sucursal encargasqa kasharqa. Chay suyuspeqa religionrayku, politicarayku runasqa tʼaqanasqa kasharqa. Jinapis ashkha catolicosqa, catolicosman churanakoj runaspis, Jehovaj testigosninman tukorqanku. Paykunataj uj sonqolla Jehová Diosta sirverqanku. Chaytaj may sumajpuni karqa.

LLAKISQA KASPAPIS SONQOCHASQA KANI

Kay 2011 watapi, Irlanda suyupi kaj sucursal wisqʼakorqa. Irlanda suyumantataj, Inglaterra sucursal encargakunan karqa. Chayraykutaj niwarqayku Inglaterra sucursalman ripunaykuta. Chay tiempopeqa llakisqa kasharqani. Imaraykuchus doctoresqa niwarqayku, qosay kharkati onqoywan kasqanta. Qosaytaj 20 de mayo de 2015 watapi wañuporqa. Paywanqa 66 watasta Jehová Diosta sirverqayku.

Qosayta mayta faltachani. Ajina llakiypi rikukuspapis, Jehovaman astawan qayllaykorqani. Chantapis qosayta hermanos faltachasqankuta yachayqa, mayta sonqochawan. Hermanosqa sonqocharinawankupaj, Irlandamanta, Inglaterramanta, Estados Unidosmantawan cartasta apachimuwarqanku. Mayta sonqochallawarqankutaj cuñadoy Dennis, warmin Mavis, chantá wawasnin Ruth, Judy ima. Paykunamanqa may agradecesqa kashani yanapawasqankumanta.

Isaías 30:18 versículo mayta sonqochawan. Chaypi nin: “Diosqa qankunaman khuyakuyninta, munakuyninta ima rikuchinasuykichejpaj suyashasunkichej, imaraykuchus payqa cheqanta ruwaj Diosmin. Kusikuyniyojmin paypi tukuy suyakojkunaqa”, nispa. Jehová Dios tukuy llakiykunata chinkachinanta, mayta suyashani. Jinallataj paraisopi mosoj ruwaykunata qonawantapis.

Irlanda suyupi Bibliamanta runasman yachachisqayrayku, mayta kusikuni. Reparanitaj Jehová Diospa yanapayninwan, llajtanman ashkha runas yaykunpusqankuta. Arí, Jehová Diosqa bendeciwanchej makinpi churakojtinchej.