¿Bibliaj yuyaychasqan kay tiempopi yanapawasunmanchu?

WAKIN RUNASQA “MANA” NINKU. Uj doctor nerqa: “Kay tiempopi ni pipis quimicamanta yachachinmanchu 1920 watamanta librowan. Chayrayku nillataj allinchu kanman, Bibliapi yanapata maskʼayqa”, nispa. Diospi mana creejkunataj ninku: “Mosoj computadorata apaykachayta yachanapajqa, mana leesunmanchu ñaupa computadorasmanta parlaj librota”, nispa. ¿Imatá chay nisqanku rikuchiwanchej? Ashkha runas Bibliata pisipaj qhawasqankuta.

Kausayqa manaña ñaupajpi jinachu, runastaj tukuy imata rikhurichinku. Internetpipis ashkha yuyaychaykuna, yachachiykuna ima tiyan. Telepipis runasta yanapayta munaspa, parlachinku yachayniyoj runasta, imatapis sumajta yachajkunata, librosta qhelqajkunata ima. Chantapis ashkha empresas runasta yanapanapaj librosta orqhonku. Chay librosta vendespataj qhapajman tukunku.

Chay chhika yanapas kajtinpis, ¿Biblia yanapawasunmanrajchu? Biblia qhelqakusqanmantaqa, 2000 watas jinaña kashan. Nerqanchej jinataj, wakin runasqa Bibliata kay tiempopi manaña sirvej libroswan kikinchanku. Chay nisqanku, ¿cheqachu? Mana. Yachayniyoj runaspa rikhurichisqanku imasqa, chay rato cambian. Runarí kikillanpuni. Runasqa kusisqas, sonqo juntʼasqas, allintataj kausakuyta munanku. Munallankutaj familiankuwan kusisqa kausakuyta, sumaj amigosniyoj kaytapis.

Bibliaqa may chhika unayniyoyña kajtinpis, ajinata kausakunapaj yanapayta atiwanchej. Bibliataqa Diosninchej qhelqacherqa. Chayrayku chaypi sumaj yuyaychaykunata tarisunman. Chantapis Bibliaqa imaymana chʼampaykunata atipanapaj yanapawasunman (2 Timoteo 3:16, 17). Bibliaj yuyaychaykunasnenqa wiñaypaj kanku, tukuy tiempotaj yanapawasunman. Bibliallataj nin: “Diospa palabranqa kausayniyoj”, nispa (Hebreos 4:12).

Jina kajtin, ¿kay tiempopi yanapawasunmanrajchu? ¿Biblia maukʼa librochu chayri kausayniyoj libropunichu? Kay Torremanta Qhawaj revistaqa, chay tapuykunaman kutichinapaj wakichikun.