Allin kajta ruwanapaj Biblia sumajta yanapawanchej

Sichus yuyasqanchejman jinalla, chayri wajkuna yuyasqankuman jinalla imatapis ajllasun chayqa, mana yachasunchu allinpunichus manachus rinawanchejta. Bibliataj niwanchej imaraykuchus chay ajina kasqanta. Chantapis Bibliaqa sumaj yuyaychaykunata qowanchej kusisqa kanapaj, sonqo juntʼasqataj. Bibliallapi sumaj yuyaychaykunata tarisunman.

DIOSPA YANAPANTA NECESITANCHEJ

Bibliaqa niwanchej Jehováa Diospa yanapayninta necesitasqanchejta. Runasqa mana nillaytapis atinchejchu imatachus kausayninchejpi ruwanata, mana chaypaj jinachu ruwasqa kasqanchejrayku (Jeremías 10:23). Chayrayku Diosqa jatuchaj imasta ajllanapaj, Bibliapi sumaj yuyaychaykunata qhelqachipuwarqanchej. Payqa mayta munakuwasqanchejrayku llakiykunamanta jarkʼayta munawanchej, manataj munanchu pantaykusqanchejrayku ñakʼarinata (Deuteronomio 5:29; 1 Juan 4:8). Chantapis payqa Ruwawajninchej, may yachayniyojtaj. May sumajta rejsiwasqanchejraykutaj, sumaj yuyaychaykunata qowanchej (Salmo 100:3; 104:24). Jinapis Diosqa ni jaykʼaj pitapis obliganchu kamachisqasninman jina kausakunanpaj.

Diosqa ñaupa tatasninchej Adanman, Evamanwan tukuy ima necesitasqankuta qorqa may kusisqas kausakunankupaj (Génesis 1:28, 29; 2:8, 15). Chantapis kasukuyta atinankupaj jinalla kamachiykunata qorqa, suyarqataj chayta kasukunankuta. Saqerqataj paykuna ajllanankuta kasukuytachus manachus (Génesis 2:9, 16, 17). Adanwan Evawantaj munasqankuman jinalla ruwarqanku, manataj Dios munasqanman jinachu (Génesis 3:6). ¿Imaynataj riwanchej sapallanchejmanta imachus allin, imatajchus mana allinchu kasqanta ajllasqanchejpi? Sutʼita reparanchej mana allinchu riwasqanchejta. Watas pasasqanman jina, sutʼita reparakorqa Diospa kamachiykunasninta mana kasukoyqa mana kusiyta apamuwasqanchejta, nitaj sonqo tiyaykuytapis (Eclesiastés 8:9).

Bibliaqa sumaj yuyaychaykunata qowanchej maypi tiyakuspapis allin kajtapuni ajllanapaj (2 Timoteo 3:16, 17; “Tukuypaj ruwasqa libro” nisqa recuadrota qhawariy). Biblia ima yuyaychaykunatachus qowasqanchejta qhawarina.

Imaraykuchus Biblia ‘Diospa Palabran’ kasqanta nisqanchejmanta astawan yachakuy (1 Tesalonicenses 2:13). Jw.org nisqapi ¿Pitaj Biblia qhelqakunanpaj yuyaycharqa? nisqa videota qhawariy.

¿IMARAYKUTAJ WAKIN RUNAS BIBLIATA MANA VALECHINKUCHU?

Wakin runasqa yuyanku Bibliaj yuyaychaykunasnin mana atienekunapaj jinachu kasqanta. Paykunaqa kay imasta niyta yachanku:

Kayta ninku: “Bibliaqa mana ujllatachu parlan”, nispa.

Mana ajinachu: Bibliata ujta leespallaqa wakin partes churanakusqanta yuyasunman. Jinapis ñaupaj versiculosta, qhepan versiculostawan leespa, chay tiempo kausaypi tʼukurispa, ima costumbresniyojchus kasqankuta yachaspa, Bibliata qhelqajkuna imapichus yuyasqankuta yachaspa, waj imaspiwan tʼukurispaqa sutʼita reparanchej mana churanakusqanta.

Chaymanta astawan yachanaykipaj jw.org nisqapi “¿Se contradice la Biblia?” nisqa yachaqanata leeriy.

Kayta ninku: “Bibliata leejkunapis mana allin imasta ruwallankutaj, chayrayku Bibliaqa nichá allin librochu kanman”, nispa.

Mana ajinachu: Runas Bibliaj nisqanta mana kasukuspa mana allin imasta ruwasqankumantaqa mana Bibliachu juchayoj. Bibliaqa ñaupajmantaña nerqa ashkha runas, religionta kamachejkunapis mana chaypi nisqanman jinapunichu kausakunankuta. Nillarqataj chay jina runas kasqankurayku Bibliaj yachachiykunasninmanta ‘sajrata rimanankuta’ (2 Pedro 2:1, 2).

Religionta kamachejkunamanta ashkhas mana Biblia nisqanman jinachu kausakusqankumanta yachanaykipajqa, jw.org nisqapi “La religión, ¿un gran negocio?” nisqa yachaqanata leeriy.

Kayta ninku: “Bibliata leejkunaqa mana paykuna jinachu kajkunata chejnikunku”, nispa.

Mana ajinachu: Bibliaqa nin wajkunata respetana kasqanta, kay imasta ruwaytataj juchachan.

May kasqanchejta yuyakuyta (Filipenses 2:3).
Waj jina creenciasniyoj, waj jina costumbresniyoj kajkunata pisipaj qhawayta (1 Pedro 2:17).
Noqanchej jina yuyanankupaj wajkunata obligayta (Mateo 10:14).

Bibliaqa nin Diosninchej tukuy runaspaj kʼacha kasqanta, cheqan kajtataj ruwasqanta. Paytaj munan noqanchejpis kikillantataj ruwananchejta (Romanos 9:14).

Chaymanta astawan yachanaykipaj jw.org nisqapi “¿Nos ayuda la Biblia a ser tolerantes?” nisqa yachaqanata leeriy.

DIOSQA BIBLIANEJTA YUYAYCHAWANCHEJ

Bibliaqa willawanchej Diosqa qallariymantapacha runaswan masichakusqanta. Bibliata leespataj sutʼita reparanchej imaschus Diospa ñaupaqenpi allin kasqanta, imastajchus mana allinchu kasqanta, nisunman Dios yuyasqanman jina imachus allinninchejpaj kasqanta, imatajchus mana (Salmo 19:7, 11). Bibliaj yuyaychaykunasnintaj ni jaykʼaj cambianchu, kausayninchejpitaj yanapawanchejpuni.

Chay yuyaychaykunamanta ujnenqa kashan Proverbios 13:20 versiculopi. Chaypi nin: “Allin yachayniyoj runaswan purejqa allin yachayniyojllataj kanqa. Mana yuyayniyojkunawan purejtaj mana allinman chayanqa”, nispa. Kay yuyaychayqa ñaupa tiempomanta runasta yanaparqa, noqanchejtapis yanapallawanchejtaj. Kaytaj Bibliapi kaj sumaj yuyaychaykunamanta ujnillan kashan (“Bibliaj yuyaychaykunasnenqa yanapawanchejpuni” nisqa recuadrota qhawariy).

Ichapis tapukushanki: “¿Imaynapí yachayman Bibliaj nisqan kay tiempopi yanapanawantapuni?”, nispa. Qhepan yachaqanapi qhawarisun imaynatachus wakin runasta yanapasqantaña.

a Diospa sutenqa Jehová (Salmo 83:18).

BIBLIAJ YUYAYCHAYKUNASNENQA YANAPAWANCHEJPUNI

Biblia qhelqakusqanmantapacha kunankamaqa casi 2.000 watasña pasan, chaywanpis Bibliaj nisqanqa yanapashallawanchejpuni. Runasqa unaymantapachaña kusiy kausayta, sumaj kausaytataj maskʼanchej (Eclesiastés 1:9). Bibliaj sumaj yuyaychaykunasnintaj tukuy tiempo yanapawanchej.

Tukuy imapi allin kajtapuni ruwanapaj

“Tukuy imapitaj allintapuni puriyta munayku” (Hebreos 13:18).
“Suwakojqa amaña suwakuchunchu. Astawanqa sinchʼita trabajachun” (Efesios 4:28).

Wajkunawan allinta apanakunapaj

“Sapa uj maskʼallachunpuni wajkunaj allinninta, amataj paypa allinnillantaqa” (1 Corintios 10:24).
“Ujkuna ujkunawan aguantanakullaychejpuni, tukuy sonqotaj perdonanakuychej” (Colosenses 3:13).

Imatapis allinta ajllanapaj

“Mana yachayniyoj runaqa ima nisqankutapis creellan. Allin yachayniyoj runataj allintaraj tanteakun imatachus ruwananta” (Proverbios 14:15).
“Allin yuyayniyoj runaqa sajra kajta rikuspa pakakun. Manaraj allinta yachaj runarí cheqanta chayman thaskiykun, chantaqa ñakʼarin” (Proverbios 22:3).