Allin kajta ruwayta qan ajllanayki tiyan
Kausayninchejpi imatapis ajllanapaj imawanchus yanapachikusqanchejqa allinpaj chayri mana allinpaj kanman. Jehovataj chayta yachan, chayrayku kamachiwasqanchejman jina kausakunanchejta munan.
Jehovaqa munan sonqo tiyasqas, kusisqastaj kausakunanchejta.
“Noqa Jehová Diosniyki kani, noqa yachachiyki imachus qanpaj allin kasqanta, noqa rikuchiyki may ñantachus purinaykita. Kamachiykunasniytachus kasukuwaj chayqa, allin kausayniykeqa mayu jina kanman, cheqan kayniykipis mar qochaj qhollchoqeyasqan jina kanman” (Isaías 48:17, 18).
Diosqa Ruwawajninchej kasqanrayku, yachan imaynata kausakunanchejchus allin kasqanta. Payqa munan yuyaychaykunasninman jina kausakunanchejta, chayta ruway allinninchejpaj kasqanta yachasqanrayku. Diospa kamachiykunasninta kasukusun chayqa allinpuni riwasun, imatapis allintapuni ajllasun. Chayrayku kusisqas, sonqo tiyasqastaj kausakusun.
Jehovaqa atisqallanchejta mañawanchej.
“Kunan qoshaykichej chay kamachiykunaqa, ruwayta atinaykichejpaj jinalla, mana qankunamanta karupichu kashan” (Deuteronomio 30:11).
Diospa kamachiykunasninman jina kausakunapajqa, ichá cambiananchej tiyan imatachus yuyasqanchejta, imatachus ruwasqanchejtapis. Jinapis Jehovaqa mana anchatachu mañawanchej. Pay ruwawasqanchejrayku, sumajta yachan imatachus ruwayta atisqanchejta, imatatajchus mana ruwayta atisqanchejta. Payta sumajta rejsispaqa reparanchej ‘kamachisqasninta kasukuy atina jinalla’ kasqanta (1 Juan 5:3).
Jehovaqa nin kamachiykunasninman jina kausakojkunata yanapananta.
“Noqa Jehová Diosniykeqa paña makiykimanta japʼishayki. Noqaqa niyki: ‘Ama manchachikuychu. Noqa yanapasqayki’, nispa” (Isaías 41:13).
Jehová Diospa kamachiykunasninman jina kausakuyta atinchej pay yanapawasqanchejrayku. Payqa Biblianejta yanapawanchej, sonqochawanchej, uj sumaj suyakuytataj qowanchej.
Mundontinmanta ashkha runas reparanku Bibliaman jina kausakoyqa kausayninkupi mayta yanapasqanta. ¿Qanpis Bibliamanta yachakuyta munawajchu? ¿Yachayta munawajchu imastachus yuyaychawasqanchejta? Chaypajqa Wiñaypaj kusisqa kausakuy nisqa folletota estudiayta qallariwaj. Chay folletoqa gratislla, jw.org nisqa paginapitaj kashan. Chay folletopi kay kinsa lecciones tiyan:
¿Biblia yanapawasunmanchu?
Bibliaqa sumaj kausaymanta parlan
¿Bibliaj nisqanpi creesunmanchu?
Diospa Palabranta estudiaspaqa reparanki yuyaychaykunasnenqa kunanña yanapawasqanchejta. Diospa yuyaychaykunasnenqa “sumaj sayachisqa kashanku kunanpis wiñaypajpis” (Salmo 111:8). Bibliaj nisqanman jina ruwaspaqa, aswan sumajta kausakusunchej. Jinapis Diosqa mana obligawanchejchu chayta ruwanapaj (Deuteronomio 30:19, 20; Josué 24:15). Sapa ujninchej ajllakunanchej tiyan Bibliaj nisqanman jinachus, manachus kausakuyta.