Jehovaj kamachiykunasninman jina kausakunallapuni

Jehová Dios llimphu kausayniyoj kanapaj kamachiykunata churan. Sutʼincharinapaj, Pay nerqa qhariwan warmiwan casarakuspa wiñaypaj ujchasqas kanankuta (Mt 19:4-6, 9). Chantapis tukuy laya millay khuchichakuykunata juchachan (1Co 6:9, 10). Imaynatachus kʼachanchakunapaj, pʼachallikunapaj Biblianejta yuyaychawanchej, jinamanta mana kay mundomanta runasman rijchʼakunapaj (Dt 22:5; 1Ti 2:9, 10).

Kay tiempopi ashkha runas Diospa kamachiykunasninta qhesachanku (Ro 1:18-32). Kunallanraj moda rikhurimusqanman jina pʼachallikunku, kʼachanchakunku, kausanku ima. Runasqa runaykachanku millay khuchichakuy imasta ruwasqankumanta, Diospa kamachiykunasninman jina kausakojkunatataj asipayanku (1Pe 4:3, 4).

Noqanchejqa mana manchachikuspa Dios llimphu kausayniyoj kanapaj kamachisqanman jina ruwanchej (Ro 12:9). ¿Imaynamanta? Wajkunaman sumaj yuyaywan imachus Diosta kusichisqanmanta willaspa, Diospa kamachiykunasninman jina kausakuspa ima. Imaynatachus pʼachallikuyta kʼachanchakuyta ajllashaspa tapurikusunman: “¿Jehovaj kamachiykunasninman jinachu ajllani chayri kay mundomanta runas jinachu? ¿Imaynatachus pʼachallikusqay, kʼachanchakusqay cheqa cristiano kasqayta rikuchinchu?”, nispa. Chayri uj peliculata ajllashaspa sumaj kanman tapurikunanchej: “¿Kay peliculata Dios allinpajchu qhawan? ¿Ima ruwaykunamantaj tanqawanchej? ¿Diosman qayllaykunaypaj yanawanqachu? (Sl 101:3). ¿Imatachus ajllasqay familiayta, wajkunata ima yanapanqachu?”, nispa (1Co 10:31-33).

¿Imaraykutaj Diospa kamachiykunasninman jina kausakunanchej may allin? Imaraykuchus Jesucristo tumpamantawan kay sajra pachata, sajra ruwaykunasnintawan chinkachenqa (Eze 9:4-7). Diosta kasukojkunallataj kausakonqanku (1Jn 2:15-17). Chayrayku mana manchikuspa Diospa nisqanman jina kausakunallapuni, chayta rikuspa runaspis Diosta jatunchankuman (1Pe 2:11, 12).

JEHOVÁ AMIGOYKI KACHUN: UJ QHARIWAN UJ WARMIWAN NISQA VIDEOTA QHAWAYTAWAN KAY TAPUYKUNAMAN KUTICHIY:

• ¿Imaraykutaj Jehovaj kamachiykunasninta kasukuy may sumaj?

• ¿Imaraykú tatas wawasninkuman juchʼuysitusmantapacha Diospa kamachiykunasninta yachachinanku tiyan?

• ¿Imaynatá jóvenes, kuraj hermanospis runasta yanapankuman Diospa kʼacha kayninwan yanapachikunankupaj?