¿Imataj yanapawasunman sumajta kausakunapaj?

Ñaupaj yachaqanaspi yachakorqanchej jina, runaqa yuyan sumajta kausakunanpaj wakin imaspi creenan kasqanta, universidadman rinan kasqanta, qolqeyoj kanan kasqanta chayri kʼacha runa kanan kasqanta. Jinapis chay imasqa aswan qhepaman sumajta kausakunapaj mana yanapawanchejchu. Entonces, ¿imataj sumajta kausakunapaj yanapawasunman?

¿PITAJ SUMAJ YUYAYCHAYKUNATA QOWASUNMAN?

Imatapis ruwayta munaspaqa kurajkunasninchejta tapukunchej. Paykunaqa noqanchejmanta nisqa imallatapis aswan sumajta yachanku. Chayrayku sumajta kausakunapajqa pichus noqanchejmanta aswan kuraj, aswan yachayniyojtaj kashan chaypa yuyaychaykunasninpi atienekunanchej tiyan. Chay yuyaychaykunaqa Bibliapi kashan, mayqenchus 3.500 watas ñaupajtaña qhelqakuyta qallarikorqa.

¿Imaraykutaj Bibliapi atienekusunman? Imaraykuchus Bibliaqa Diospa yuyaychasqan, pay jina yachayniyojtaj ni pí kanchu. Payqa “Ashkha Watasniyoj Machitutaj”, ‘wiñaymantapacha wiñaykamataj’ (Daniel 7:9; Salmo 90:2). Diosqa ‘cielota Ruwaj, cheqa Dios, jallpʼata rikhurichej’ ima (Isaías 45:18). Payllataj willawanchej sutin Jehová kasqanta (Salmo 83:18).

Bibliaqa tukuy runas uj rejlla kasqanchejta nin. Imaraykuchus Bibliaqa Diospaj palabran, paytaj tukuy laya runasta ruwarqa. Bibliaj yuyaychaykunasnenqa tukuy lugaresmanta runasta yanapan. Chantapis Bibliaqa ni mayqen libro jina ashkha parlaykunapi traducikorqa, casi tukuypatataj ujpis kanpuni.a Chayrayku pillapis Bibliaj nisqanta entiendespa chayman jina kausakuyta atin. Chaymanta parlaspa, Biblia nin:

‘Diosqa tukuy runasta uj rejllata qhawan. Payqa allinpaj qhawan mayqen nacionllamantapis payta manchachikojta, allin kajtataj ruwajta’ (HECHOS 10:34, 35).

Jehová Diosqa uj kʼacha tata jina munakuwanchej, Biblianejtataj yanapawanchej (2 Timoteo 3:16). Jehová Dios ruwawasqanchejrayku yachan imachus allinninchejpaj kasqanta. Chayrayku Palabranpi atienekuyta atinchej.

BIBLIAPI ATIENEKUSUNMAN

2.000 watas ñaupajta jinaña Bibliaqa nerqa imachus kay tiempopi pasananta, imaynachus runas kanankutapis. Chayrayku Bibliapi atienekuyta atinchej.

¿IMASTAJ PASANAN KARQA?

“Uj nacionqa waj nacionwan maqanakonqa, uj gobiernopis waj gobiernowan maqanakonqa. Kallanqataj sinchʼi terremotos, kaynejpi jaqaynejpitaj yarqhaykuna, wañuchej onqoykuna ima” (LUCAS 21:10, 11).

¿IMAYNATAJ RUNAS KANANKU KARQA?

“Qhepa pʼunchaykunapeqa kausay may llakiy kanqa, maytataj sajrayanqa. Runasqa paykunallata munakonqanku, qolqeta munakonqanku, alaracos kanqanku, jatunchakonqanku, Diospa contranta, wajkunaj contrantapis sajrata rimanqanku, tatasninkuta mana kasukonqankuchu, malagradecidos kanqanku, wasanchajkuna kanqanku, runa masinkuta mana munakonqankuchu, mana uj yuyayllaman chayayta munanqankuchu, wajkunamanta llullakuspa parlanqanku, munayninkuwan atipachikonqanku, manchay phiñas kanqanku, allin kajta mana munakonqankuchu, amigosninkoj contranpi sayaykonqanku, kʼullus kanqanku, mayta runaykachanqanku, Diosta munakunankumantataj munaynillankuta ruwanqanku” (2 TIMOTEO 3:1-4).

Bibliaj nisqasnin juntʼakushasqanta reparaspa, ¿imatá ninki? Ichapis Leung sutiyoj runa jinallataj yuyanki, payqa Hong Kong llajtapi tiyakun. Pay nin: “Bibliaj nisqasnenqa unay watasña qhelqakorqa, juntʼakushantaj. Jinapis uj runallaqa imachus qhepaman kananta mana niyta atinmanchu, chayrayku Bibliata yuyaychajqa Diospuni kanan tiyan”, nispa.

Bibliaj may chhika profeciasnin juntʼakunña.b Chaytaj rikuchin Bibliaqa Diospa Palabranpuni kasqanta. Jehová nin: “Noqa Dios kani, mana noqa jina wajqa kanchu. Qallariymantapacha imaschus tukukuynin kananta nini”, nispa (Isaías 46:9, 10). Chayrayku Bibliaj nisqanpi atienekusunman.

BIBLIAQA KAY TIEMPOPI ASWAN QHEPAMANPIS YANAPAWASUNMAN

Bibliaj nisqanman jina kausakusun chayqa, allinpuni riwasunchej. Kay imaspi piensariy:

QOLQE TRABAJO IMA

“Aswan allin uj chhikallantapis samarikoyqa, sinchʼita trabajaspa wayrallata japʼiyta munanamantaqa” (ECLESIASTÉS 4:6).

¿IMAYNATÁ FAMILIAPI KUSISQA KAUSAKUSUNMAN?

“Sapa ujniykichej warmiykichejta munakunaykichej tiyan, qankuna kikiykichejta jina. Warmitajrí qosanta sonqomantapacha respetanan tiyan” (EFESIOS 5:33).

¿IMAYNATÁ WAJKUNAWAN ALLINTA APANAKUSUNMAN?

“Ama rabiakuychu, nitaj phiñakuychu. Ama phiñasqallaqa kaychu, pajtataj mana allin kajta ruwawaj” (SALMO 37:8).

Bibliaj nisqanman jina kausakojtinchejqa allin riwasunchej, aswan qhepamanpis sumajta kausakusunchej. Diosqa Palabranpi niwanchej imaynachus kausay aswan qhepaman kananta.

ALLINTA KAUSAKUSUN

‘Ni ima llakiyniyoj allin kusisqa kausakonqanku’ (SALMO 37:11).

WASIYOJ MIKHUNAYOJTAJ KASUNCHEJ

“Wasista ruwakonqanku, chaypitaj tiyakonqanku, uva huertasta churanqanku, poqoynintapis mikhonqanku” (ISAÍAS 65:21).

NI PÍ ONQONQACHU NITAJ WAÑONQACHU

‘Manaña wañuy kanqachu, nitaj llakiypis, nitaj waqaypis, nitaj nanaypis’ (APOCALIPSIS 21:4).

¿Imatá ruwananchej tiyan sumajta kausakunapaj? Qhepan yachaqanapi chayta yachakusun.

a Biblia traducikushasqanmanta, ashkha runasmantaj chayashasqanmanta astawan yachanaykipajqa Internetpi www.jw.org nisqaman yaykuy. Chaypajqa BIBLIAJ YACHACHIYKUNASNIN > BIBLIAWAN HISTORIAWAN nisqapi ñitʼiykuy.

b Astawan yachakuyta munaspaqa La Biblia... ¿la Palabra de Dios, o palabra del hombre? nisqa libropi 9 capitulonta leeriy. Kaytaqa Jehovaj testigosnin orqhonku. Chaytaqa Internetpi www.jw.org nisqapi castellano parlaypi tariwaj. Chaypaj BIBLIOTECA > OTRAS PUBLICACIONES nisqaman yaykuy.