Diospa yuyasqanman jina kausakuna

1, 2. ¿Imatataj reparanchej Jehová Dios jina yuyaspa?

TATASQA wawasninkuman juchʼuysitullaraj kashajtinku agradecekuyta yachachinku. Uj runa imallatapis wawankuman regalajtenqa, wawankuta “gracias niy” nispa ninku. Wawastaj juchʼuysitullaraj kashaspa tanqasqa jinalla “gracias” ninku. Chaywanpis wiñasqankuman jina reparanku agradecekunapuni kasqanta. Jinamantataj sonqomantapachaña agradecekunku, nitaj suyankuchu wajkunaraj agradecechinanta. Reparanchej jina, wawasqa jatunña kaspa sonqomantapacha agradecekunku tatasninku jina yuyasqankurayku.

² Ajinallataj noqanchejwanpis. Bibliamanta yachakushaspaqa repararqanchej Jehová Diosta kasukunapuni kasqanta. Chaywanpis Diosman astawan qayllaykusqanchejman jina pay jina yuyayta qallarinchej. Pay jina yuyaspaqa, reparanchej imachus kusichisqanta, imatajchus llakichisqanta, reparallanchejtaj imatachus millachikusqantapis. Jehová Dios jina yuyasqanchejta rikuchisunman paypa munayninman jina imatapis ruwaspa.

3. ¿Imajtintaj mana Jehová Dios jina yuyayta atillanchejchu?

³ Maytapuni kusikunchej Jehová Dios jina yuyanapaj kallpachakuspa. Chaywanpis pantaj runas kasqanchejrayku mana Jehová Dios jina yuyayta atillanchejchu. Ichapis chayrayku mana llimphuta kausakuyta atillasunmanchu, chayri mana kapuwasqallanchejwan kausakuyta atillasunmanchu, chayri ichapis tanqasqa jinalla predicacionman risunman, manachayri ichá mana entiendeyta atillasunmanchu imaraykuchus yawarta mana churachikunachu kasqanta. Chayrayku qhepan parrafospi yachakusunchej imastachus ruwanata Jehová Dios jina yuyanapaj. Yachakullasuntaj Jehová Dios jina yuyay imaynasmantachus yanapawasqanchejta.

JEHOVÁ DIOS JINA YUYANA

4. ¿Imatataj ruwananchej kasqa yuyayninchejta mosojyachinapaj?

⁴ (Romanos 12:2 leey). Apóstol Pabloqa nerqa Jehová Dios jina yuyanapaj manaña kay tiempo runas kausasqankuman jinachu kausana kasqanta, nitaj paykuna jinachu yuyana kasqanta. Chaytataj pasaj semanapi yachakorqanchej. Apóstol Pabloqa nillarqataj yuyayninchejta mosojyachina kasqanta. Chaypajqa Bibliata estudiananchej tiyan, estudiasqanchejpitaj tʼukurinanchej tiyan. Ajinamanta Jehová Dios jina yuyasunchej.

5. ¿Bibliatawan publicacionestawan estudiashaspa leenallachu kasqa?

⁵ Bibliatawan publicacionestawan estudiashaspaqa, mana pata patallatachu leenanchej tiyan, nitaj marcakunallanchejchu tiyan. Manachayqa estudiashaspa tʼukurinanchej tiyan imatachus Jehová Diosmanta yachakusqanchejpi, imaspichus Jehová Dios yuyasqanpi, imastachus ruwasqanpi ima. Tʼukurinallanchejtaj tiyan imaraykuchus Jehová Dios wakin imasta ruwananchejta munasqanpi, imaraykutajchus wakin imasta mana ruwananchejta munasqanpipis. Tʼukurinallanchejtaj tiyan ima cambiostachus kausayninchejpi ruwananchej kasqanpi, imaspichus manaña yuyanachu kasqanpipis. Ichapis chaykunapi mana tʼukuriyta atillasunchu. Chaywanpis estudiasqanchejpi tʼukurinapajqa tiempochakunanchejpuni tiyan (Sal. 119:97; 1 Tim. 4:15).

6. ¿Imastataj reparasunchej Diospa Palabranpi yuyajtillanchejpuni?

⁶ Diospa Palabranpi yuyallasunpuni chayqa, reparasunchej Jehová Diospa nisqasnin cheqan, mana pantayniyojtaj kasqanta. Reparallasuntaj imastachus Jehová Dios allinpaj qhawasqanta, imastatajchus mana allinpaj qhawasqantapis. Ajinamantataj noqanchejpis Jehová Dios jina chejnisqan imasta chejnisunchej, allinpaj qhawasqan imastataj allinpaj qhawasunchej, yuyayninchejtapis mosojyachisunchej. Pisimanta pisitaj Jehová Dios jina yuyayta qallarisunchej.

YUYASQANCHEJQA RUWASQANCHEJPI YACHAKUN

7. ¿Imatataj Biblia reparachiwanchej? (23 paginapi kaj dibujosta qhawariy).

⁷ Sajra yuyaykunaqa ruwasqasninchejpi yachakun (Mar. 7:21-23; Sant. 2:17). Bibliaqa reparachiwanchej Jehová Dios kapuwasqallanchejwan kausakunanchejta munasqanta. Chayrayku payqa mana qhapaj qhariwarmitachu ajllarqa Wawanta uywanankupaj (Lev. 12:8; Luc. 2:24). Biblia niwanchej Mariaqa, Jesusta nacechikuspa ‘uywa qaranaman puñuykuchisqanta, alojamientopi mana campo kasqanrayku’ (Luc. 2:7). Jehová Diosqa Wawanta uj sumaj wasipi nacechinman karqa. Chaywanpis munarqa payta tukuy sonqo yupaychaj familiapi Wawan uywasqa kananta.

8. ¿Pitataj ñaupajman churananchej kasqa?

⁸ Jesús wajcha familiapi uywakusqanta yachayqa, reparachiwanchej Jehová Dios paytaraj ñaupajman churananchejta munasqanta. Chaywanpis wakin tatasqa, mayta kallpachakunku wawasninkuta tukuy ima patapi uywanankupaj, Diosmanta yachachinankumantaqa. Jinamantataj wawasninkoqa Jehová Diosmanta pisimanta pisi karunchakunku. Chayrayku noqanchejqa piensarinanchej tiyan, Jehová Dios jinachus manachus yuyashasqanchejpi. Piensarinallanchejtaj tiyan kausayninchejpi Jehová Diosta ñaupajman churashasqanchejpichus manachus (Hebreos 13:5 leey).

9, 10. ¿Allinpajchu Jehová Dios qhawan wajkunata pantachiyta?

⁹ Jehová Diosqa mana allinpajchu qhawan wajkunata pantachiyta, juchallichiyta, paymanta karunchachiyta ima. Chayrayku Jesús nerqa: “Noqapi creejkunaqa wawas jina kanku. Sichus pipis ujninta juchaman urmachinman chayqa, aswan allin kanman chay runapajqa burro muyuchin chay molino rumita kunkanman warkhuykuspa, qochaman wijchʼuykunanku”, nispa (Mar. 9:42). Jesuspa nisqanqa reparachiwanchej wajkunata pantachiyta mana allinpajchu qhawasqanta. Jesusqa Jehová Dios jina yuyarqa. Chayrayku nisunman Jehová Diospis wajkunata pantachiyta manallataj allinpajchu qhawasqanta (Juan 14:9).

¹⁰ Noqanchejqa kallpachakunanchej tiyan Jehová Dios jina, Jesús jinataj yuyanapaj. Chaytaj ruwasqasninchejpi yachakunan tiyan. Por ejemplo, ichapis munasqanchejman jina vistikusunman chayri kʼachanchakusunman. Chaywanpis ichá ajinata vistikuspa wajkunata pantachishasunman chayri pʼenqachishasunman manarí mana allin imasta yuyachishasunman. Chayta reparaspaqa hermanosninchejta munakusqanchejrayku maychus kajta vistikunanchejpaj kallpachakunanchej tiyan (1 Tim. 2:9, 10).

11, 12. Jehová Dios jina yuyaspa, ¿juchapi urmallasunchu?

¹¹ Jehová Diosqa justiciata munakun, sajra ruwaytataj chejnikun (Isa. 61:8). Jehová Diosqa yachan sonqonchej sajra imasman aysawasqanchejta pantaj runas kasqanchejrayku. Ajinapis niwanchej sajra kajta chejnikunanchejta, imaynatachus pay sajra kajta chejnikun, ajinata (Salmo 97:10 leey). Sichus Jehová Dios sajra kajta chejnisqanpi tʼukurisunchej chayqa, mana yuyallasunpischu sajra kajta ruwayta.

¹² Jehová Dios jina yuyaspaqa, tukuy laya sajra ruwaykunata chejnikusunchej mana Bibliapi qhelqasqa kajtinpis. Por ejemplo, casi tukuynejpi uj millay tusuna tiyan. Chay tusunaspeqa wakin runas casi qʼalaslla wajkunaj patanpi chayri ñaupaqenpi tusunku.a Chay tusunastataj wakin runas allillanpaj qhawanku, yuyankutaj mana khuchichakuy jucha jinachu kasqanta. Chaywanpis Jehová Diosqa chay jina tusunasta waj sajra ruwaykunatawan millachikun. Chayrayku juchapi mana urmanapajqa ama munayninchejwan atipachikunachu. Astawanpis sajra kajta chejnisqata chejnikuna (Rom. 12:9).

ÑAUPAJMANTAÑA YUYAYCHAKUNA

13. ¿Estudiasqanchejpi tʼukuriy yanapawasunmanchu?

¹³ Bibliatawan publicacionestawan estudiashaspaqa, tʼukurinanchej tiyan imaspichus chay yachakusqanchej yanapanawanchejpi. Ajinamanta tukuy imata Diospa munasqanman jinapuni ruwanapaj wakichisqa kasunchej. Manataj desesperacionwan japʼichikuspa imatapis ruwarpallasunchu (Pro. 22:3). Kunanqa Bibliamanta wakin ejemplosta qhawarina.

14. ¿Imatataj Josemanta yachakusunman?

¹⁴ Josemanta parlarina. Uj kutipi Potifarpa warmenqa Joseta nerqa: “Jamuy, noqawan puñuykunki”, nispa. Josetaj mana munarqachu, qhesacharqapachataj. Ajinamanta Joseqa rikucherqa Jehová Dios jina yuyasqanta. Imaraykuchus pay yacharqa Jehová Dios munasqanta casarasqaslla puñuykunankuta (Génesis 39:8, 9 leey). Chantapis Joseqa Potifarpa warminman nerqa: “Imaynatataj noqa ruwasaj kasqa chay millaytari, juchallikusajtaj Diospa contrampiri?”, nispa. Chayqa reparachiwanchej José, Jehová Diospa kamachiykunasninta ni imarayku pʼakiyta munasqanta. Ichá noqanchejpis José jina rikukusunman. Ichá trabajomanta compañeronchej chayri compañeranchej coqueteawasunman, chayri celularninchejman puñuykunamanta parlaj mensajesta apachimuwasunman, manachayri mana ropasniyoj fotosninta apachimuwasunman.b Chayrayku allin kanman ñaupajmantaña tʼukurinanchej imaynatachus chay imasta Jehová Dios qhawasqanpi. Chantapis ñaupajmantaña yuyaychakusunman chay jina tentacionpi rikukuspa imastachus ruwananchejpi.

15. ¿Imatataj kunanmantapacha ruwasunman Jehová Dios yuyasqanman jina ruwananchejpaj?

¹⁵ Uj kutipi rey Nabucodonosorqa uj jatun oro lantita ruwacherqa. Kamacherqataj tukuy runas chay lantita yupaychanankuta. Chaywanpis Sadracwan Mesacwan Abednegowanqa, mana chay lantiman kʼumuykukorqankuchu. Reymanpis nerqanku manapuni chay lantiman kʼumuykukunankuta. Chaytaj rikuchiwanchej Jehová Diosllata yupaychanankupi tʼukurisqankutaña (Éxo. 20:4, 5; Dan. 3:4-6, 12, 16-18). Noqanchejpis ichá paykuna jinallataj rikukusunman. Ichapis patronninchej niwasunman cuotata churanata uj santota fiestachanapaj. Manaraj ajinapi rikukushaspaqa, allin kanman kunanmantapacha yuyaychakunanchej imatachus ruwananchejpi, ninanchejpipis. Ajinamanta Jehová Dios yuyasqanman jina ruwananchejpaj.

16. ¿Imatataj ñaupajmantaña ruwananchej kasqa Diospa munasqanman jina ruwanapaj?

¹⁶ Jehová Dios jina yuyasunchej chayqa, ni imarayku yawarta churachikusunchu. Nillataj churachikusunchu yawarmanta orqhokoj glóbulos rojos nisqata, glóbulos blancos nisqata, plaquetas nisqata, plasma nisqatapis (Hech. 15:28, 29). Chaywanpis sapa ujninchej ajllananchej tiyan imaynatachus operachikunanchejta, imaynatachus doctores yawarninchejta apaykachanankuta, waj imastawan. Chaykunata Diospa munasqanman jina ajllanapajqa, ñaupajmantaña Bibliaj yuyaychaykunasninta qhawarinanchej tiyan. Chaypajqa yawarmanta parlaj yachaqanasta publicacionespi estudiananchej tiyan. Chantapis yawarta mana churachikunapaj DPA nisqata juntʼachinanchej tiyan, doctorninchejwanpis parlarinanchej tiyan. Ajinamanta operachikuna patapi mana musphaykachashasunchu, nitaj manchachikusunchu imatachus ruwananchejmanta.c

17-19. ¿Imajtintaj may sumaj kasqa kunanña tukuy imapaj wakichikunanchej?

¹⁷ Uj kutipi Jesús nerqa ñakʼarichisqa, wañuchisqataj kananta. Pedrotaj chayta uyarispa nerqa: “Señor, ama chaytaqa parlallaypischu”, nispa. Jesustajrí Pedrota nerqa: “Qanqa pantachiyta munawanki”, nispa. Jesusqa ajinata kutichinanpaj ñaupajmantañachá tʼukurerqa ñakʼarichisqa, wañuchisqataj kanan Diospa munaynin kasqanpi. Tʼukurillarqatajchá profetas imatachus paymanta qhelqasqankupi. Chantapis chaykunapi tʼukurisqanrayku Jesusqa mana iskaychakuspa kausayninta noqanchejrayku qorqa (Mateo 16:21-23 leey).

¹⁸ Jehová Diosqa munan payman qayllaykunanchejta, tukuy atisqanchejtataj paypaj llankʼananchejta (Mat. 6:33; 28:19, 20; Sant. 4:8). Chaywanpis ichá wakin runasqa pantachiyta munawasunman, imaynatachus Pedro casi Jesusta pantacherqa, ajinata. Por ejemplo, ichapis patronninchej niwasunman astawan trabajajtinchej ashkhata paganawanchejta. Chaywanpis ichá astawan trabajajtinchej manaña reunionesman, nitaj predicacionmanpis riyta atisunmanchu. Wakin jovencitostataj ichapis profesoresninku ninkuman estudianallankupajpuni waj ladoman ripunankuta. Jinamantataj chay jovencitosqa ashkha problemaspi rikukunkuman, mana tatasninkoj ladonpi kasqankurayku. Chayrayku manaraj ajinapi rikukushaspaqa, allin kanman kunanña yuyaychakunanchej imatachus chay jinapi rikukuspa ruwananchejpaj. Chaypajqa Jehová Diospa yanapanta maskʼana, publicacionesta estudiana, familianchejwan ancianoswanpis parlarina. Ajinamanta Jehová Diospa munasqanman jina ruwasunchej. Manataj chay jina tentacionespi urmallasunchu. Chantapis noqanchejpaj sutʼi kanqa Jehová Diostarajpuni ñaupajman churana kasqanta.

¹⁹ Ichapis mana tukuy imapajpunichu sumajta wakichikusunchej. Chaywanpis sichus Bibliata, publicacionestawan estudiashaspa imachus Diospa munaynin kasqanpi tʼukurisunchej chayqa, imapi rikukuspapis Diospa munasqanman jinapuni ruwasunchej. Chayrayku Jehová Dios jina yuyanapaj kallpachakuna. Ajinamantataj ñaupajmantaña yachasunchej imapi rikukuspapis imatachus ruwananchejta.

DIOSNINCHEJ SUMAJ KAUSAYTA APAMONQAÑA

20, 21. 1) Paraisopi tiyakushaspa, ¿tukuy imatapis munasqanchejman jinapunichu ruwasunchej? 2) ¿Kay tiempopi kusisqa kayta atisunmanchu?

²⁰ Tukuypis suyashanchej Jehová Diosninchej sumaj kausayta apamunallantaña. Ashkhasqa suyashanchej paraisopi wiñay wiñaypaj tiyakuyta. Diospa Gobiernon kay jallpʼata gobernamojtenqa, manaña kay tiempopi jinachu sufrisunchej. Paraisopi kausakushaspaqa wakin imasta gustawasqanchejman jina ruwasunchej.

²¹ Chaywanpis mana tukuy imatapunichu munasqanchejman jina ruwasunchej. Ajina kajtinpis llampʼu sonqoyoj kaspa, Diospa munasqanman jinapuni allin kajta ruwasunchej. Ajinamanta allin kausaypi kusisqa tiyakusunchej (Sal. 37:11). Chaywanpis kay tiempopeqa, Diospa munasqanman jina kausakuspa kusisqa kayta atisunman.