Diosta rejsiy, ¿yanapasunkimanchu?

Kaykama Bibliapi yachakorqanchej, Diospa sutenqa Jehová kasqanta, may munakuyniyoj kasqantawan. Chantá yachakullarqanchejtaj imastachus ruwasqanta, imastachus tumpamantawan ruwananta ima. Jinapis Diosmanta wakillanta yachakunchej. ¿Yanapasunkimanchu Diosta astawan rejsiy?

Jehová Diosta “maskʼanki chayqa, payqa tarichikusonqa” (1 Crónicas 28:9). Diosta astawan rejsispa, ‘paypa amigon’ kanki (Salmo 25:14). Paypa amigon kaspataj kay bendicionesta japʼinki.

Kusisqa kausakunki. Bibliaqa Jehová “kusikuyniyoj” Dios kasqanta nin (1 Timoteo 1:11). Payman qayllaykunaykipaj, pay jina kanaykipaj ima kallpachakunki chayqa, may kusisqa kanki. Chantapis mana anchata phutikunkichu, nitaj chhikata onqonkichu (Salmo 33:12). Mana chayllachu, millay kausaymanta librakunki, sumaj runa kanki, wajkunawanpis allinta kausakunki. Cheqamanta qanpis ninki: “Allinpuni Diosman qayllaykusqayqa”, nispa (Salmo 73:28).

Jehová Dios cuidasonqa. Payqa amigosninman nin: “Noqa yuyaychasqayki, qhawamusqaykitaj”, nispa (Salmo 32:8). Jehová Diosqa sapa kamachinta cuidan, necesitasqantataj qon (Salmo 139:1, 2). Amigon kanki chayqa, Diosqa ni jaykʼaj saqerparisonqachu.

Sumaj kausayta japʼinki. Jehová Diosqa mana kay tiempollapichu kusisqa kausakunaykipaj yanapasuyta munan. Payqa aswan qhepamanpis sumaj kausayta qoyta munasunki (Isaías 48:17, 18). Biblia nin: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Diosninchej uj sumaj suyakuyta qowanchej, chaytaj “barco sayachina gancho jina”. Kay llakiy tiempopitaj “mana iskayrayaspa sinchʼita sayanapaj” yanapawasun (Hebreos 6:19).

Diosta rejsispa, amigosnintaj kaspa, ashkha bendicionesta japʼiyta atinchej. Kaypi wakillanmanta parlarerqanchej. Astawan yachakuyta munanki chayqa, Jehovaj testigosninwan parlariy chayri Internetpi jw.org/qu nisqaman yaykuy.