Diosta yupaychaqkunaqa, wakpa allinninta maskʼanku
1 Kay tiempopi runaqa, manaña wakpa allinninta maskʼanchu. ¿Imaraykú? Imaraykuchus runaqa mana tiempoyuq kasqanrayku, “pachis”, “ama jinachu kay”, “perdonaway”, niyta, qunqapun. Chantapis, Diospa Palabranqa, tukukuy pʼunchaykunapi wakpa allinninta maskʼayqa manaña rikukunanta nirqaña, imaraykuchus kayjina runas kanku, ‘imallatapis paykunallapaq munaqkuna, runaykachaqkuna, mana graciasta quyta yachaqkuna, mana sunquyuqkuna, aychap saqra munayninta mana atipayta atiqkuna, mana khuyarispa saqrata ruwaqkuna, allin kaqta chiqniqkuna ima’ (2 Tim. 3:1-4). Jina kasqanku mana wakpa allinninta maskʼasqankuta rikuchin. Diosta yupaychaq runasjina kaspa, mana kay pachamanta runasjinachu kananchik tiyan.
2 ¿Imatataq ruwan wakpa allinninta maskʼaq runa? Wakkunap yuyayninkuta, munayninkuta ima, allinpaq qhawan. Chantapis, runaswan kʼacha, allin yuyaywantaq imatapis ruwan. Chaykunaqa, Diosta, runa masinchikta munakusqanchikta rikuchin (Luc. 10:27). Chantapis, wakkunawan allinpi kayta munanchik chayqa, kay kʼacha kaykunata rikuchinanchik tiyan, chayta rikuchiytaq atikullan.
3 Jesucristoqa, kay kamachiyta juntʼarqa: “Imaynatachus munankichej runas qankunapaj ruwanankuta, ajinallatataj qankunapis paykunapaj ruwaychej”. Ñuqanchikpis kikinta ruwananchikpaq (Luc. 6:31). ¿Manachu Jesús discipulosninta munakuywan qhawasqan tʼukuchiwanchik? (Mat. 11:28-30.) Jesusqa, wakkunap allinninta maskʼananpaq, mana librosmantachu yachakurqa, manaqa sunqunmanta lluqsirqa. Ñuqanchikqa, Jesusjina wakkunap allinninta maskʼanapaq kallpachakuna.
4 ¿Maykʼaqtaq wakpa allinninta maskʼasqanchikta rikuchisunman? Chayrí, ¿wakin kutillachu wakkuna allinpaq qhawanallawanchikpaq rikuchisun? Mana, tukuyniqpi wakpa allinninta maskʼananchik tiyan. Qutuchakuypi, ¿imaspitaq wakpa allinninta maskʼasqanchikta rikuchisunman?
5 Tantakunapaq Wasipi. Tantakunapaq Wasipiqa, Diosta yupaychanchik. Chaypi tantakunchik Jehová waqyariwasqanchikrayku. Chayrayku, Diospa wasinpipis tiyakuchkasunmanjina (Sal. 15:1). Tantakunapaq Wasipi, ¿Diospa wasinpipis tiyakuchkasqanchiktajinachu rikuchinchik? ¿Chayman rinapaq allintachu pʼachallikuchkanchik? Tantakunapaq Wasiman rinapaqqa, Diosta Jatunchanapaqjina pʼachallikunanchik tiyan. Runaqa, Diospa kamachisnin kasqanchikta, jatun tantakuyman, chayri sapa semana Tantakunapaq Wasiman, imayna pʼachallisqaschus risqanchikmanta riqsiwanchik, chayrayku Diosta yupaychanapaqjina pʼachallikuna (1 Tim. 2:9, 10, Qheshwa Biblia). Jinata ruwaspaqa, Diosninchikta, pikunachus Diospa wasinman jamuqkunata ima, jatunpaq qhawasqanchikta rikuchinchik.
6 Chantapis wakpa allinninta maskʼallanchiktaq tantakuykunaman maychus tiemponpi chayaspa. Chaywanpis chayta ruwayqa, mana atikullanchu. Imaraykuchus wakinqa, achkha familiayuq, chayri karupi, tiyakunku. Wakin qutuchakuykunapi rikukun tawamanta, juk hermano tantakuy qallarisqanmantaña chayasqanta. Jinata chayasqankuqa, mana allinpaq qhawasqachu. Mana qunqanachu wakpa allinninta maskʼayta. Munakuyniyuq Jehovaqa, allinninchikpaq yachachiykunata wakichipuwanchik. Chayrayku, Jehovaman agradecesqa kasqanchikta, tantakuyman tiemponpi chayaspa rikuchinchik. Chantapis, tantakuy qallarisqanmantaña chayaspaqa, mana wakkunata uyariqta saqinchikchu.
7 Kunallanraq tantakuyninchikman jamuqkunata, ¿parlaparichkanchikchu? Chay runasta ‘allin jamusqa kankichik’ niptinchikqa, wakpa allinninta maskʼasqanchikta rikuchinqa (Mat. 5:47; Rom. 15:7). Kʼachamanta kusiywan paykunata parlapasqanchikqa, chiqa cristianos kasqanchikta rikuchinqa (Juan 13:35). Juk runa Tantakunapaq Wasiman ñawpaq kutipi risqanmanta jinata nin: “Juk pʼunchayllapi tarini achkha runasta chiqamanta munakuwaqkunata, —manapis paykunataqa riqsirqanichu— wawamantapacha iglesiayman risqaypitaq, mana jinata munakuwasqankuta rikuchiwarqankuchu. Chayrayku chiqa kaqta tarisqaymanta mana iskaychakurqanichu”, nispa. Hermanos munakuyninkuta rikuchisqankuqa, chay runap kawsayninta tikrachirqa, qanchis killanmantaq bautizakurqa. Chayrayku, tantakuyman jamuqkunata kʼachamanta parlapayaptinchikqa, mayta yanapasun.
8 Mana riqsisqa runasman kʼacha kayninchikta rikuchinchik chayqa, ¿manachu, ‘astawan creeypi hermanosninchiman’ munakuyninchikta rikuchisuman? (Gál. 6:10.) Chantapis, kay kamachiyta kasukuna: “Machu runastaqa sayarikuspa napaykuychej, jinallataj jatumpaj qhawaychej” (Lev. 19:32). Chayrayku, tantakuyninchikpi machuyasqa hermanosninchikta, napaykunapuni tiyan.
9 Allinta uyarina. Tantakuykunapiqa, hermanosninchik umallirichinku, astawan kallpachasqas kananchikpaq (Rom. 1:11). Chayrayku, umallirichikuchkaptin; puñuptinchik, chicleta khamuptinchik, ladonchikpi hermanowan thutuptinchik, bañoman anchata lluqsiptinchik, wak librosta ñawiptinchik ima, mana wakpa allinninta maskʼasqanchiktachu rikuchichkanchik. Kay patapi nikusqantaqa, ancianosraq wak hermanos kikinta ruwanankupaqjina, juntʼananku tiyan. Umallirichiqpa, allinninta maskʼasqanchikta, sumaqta uyarisqanchikpi rikuchisunchik.
10 Chantapis, umallirichiqta, uyariqkunata ima, allinpaq qhawanchik chayqa, celularesta mana japʼichinachu kanman.
11 ¿Imaynatá wawasniyuqkuna wakpa allinninta maskʼankuman? Tatasqa, tantakuykunapi imatachus wawasninku ruwachkasqankuta sumaqta qhawananku tiyan. Tatas wawa waqaptin, chʼaqwaptin ima, usqhayllata jawaman urqhunan tiyan, chʼinyachinanpaq. Wakin kuti, chayta ruway mana atikullanchu, chaywanpis, yuyariy, ruwanchik chayqa, wakpa allinninta maskʼasqanchikta rikuchinqa. Chayrayku, tantakuykunapiqa pikunachus juchʼuy wawasniyuq kaqkuna, ichapis qhipapi tiyakunkuman, wawankuta jawaman urqhuna kaptinqa, urqhunankupaq. Mana wawasniyuq kaqkunaqa, ñawpaqpi tiyakunanku tiyan, jinamanta wawasniyuq familiaspaq qhipa tiyanasta saqispa, chayta ruwaspaqa, kay familiasta jatunpaq qhawasqankuta rikuchinqanku.
12 Tatasqa, umallirichiy tukukuptin, chayri, manaraq qallarichkaptin, wawasninku imatachus ruwachkasqankuta allinta qhawananku tiyan. Chantapis, wawasninkuta, Tantakunapaq Wasipi mana correykachaqta saqinankuchu tiyan, ni pita urmachinankupaq. Nillataq Tantakunapaq Wasip jawanpi correykachanankuchu tiyan, imaraykuchus, imanarpakunkumanpis. Chantapis jawapi chʼaqwasqankuqa, vecinosta phiñachinman, manataq Diosta yupaychasqanchikta allinpaqchu qhawachinman. Tatasqa wawasninkuta, Tantakunapaq Wasi ukhunpi, jawanpi ima, allinta qhawanankupaq kallpachakusqanku may sumaq, imaraykuchus chayqa hermanosta jukchasqa kanankupaq yanapanqa (Sal. 133:1).
13 Libromanta yachanapaq tantakuypi. Hermanos wasinkuta tantakunapaq quwasqanchikta, mayta agradecenchik. Chayman rispaqa, manaraq chay wasiman yaykuchkaspa, allin kanman zapatosninchikta pichakunanchik, mana wasita chʼichichananchikpaq. Tatasqa, wawasninkuta allinta qhawananku tiyan, maypichus tantakuy ruwakuchkan chayllapi kanankupaq. Chay tantakuypiqa, pisi runallapis kachunku, mana wasinchikpijinachu kananchik tiyan. Wawa bañoman riyta munaptintaq, tatan chayri maman pusanan tiyan. Libromanta yachaqanapaq tantakuymanqa, Tantakunapaq Wasiman rinchikjina pʼachallikuna.
14 Wakpa allinninta maskʼayqa, may allinpuni. Wakpa allinninta maskʼayqa, mana willayninchikta allinta qhawachinallanpaqchu, manaqa, runaman willananchikpaqpis, yanapawanchik (2 Cor. 6:3-7). Kusikuyniyuq Diosta yupaychasqanchikrayku, kʼacha kay, kusisqa kay, munakuyniyuq kay ima, atikullanman, chay ruwayqa pisipaq qhawasqa kaptinpis, runa masinchikta kusichin. Diosta yupaychaqkuna wakpa allinninta maskʼaptinku, kawsayninkuta may sumaqpaq qhawachinku.