‘Kusikuyniyuqmin ñakʼariykunapi sinchʼita sayaqqa’
1 Tukuy cristianopis imaymana llakiykuna jamuptin, unquykuna kaptin, qullqi pisiyaptin, saqra ruwayman tanqasqa kaptin, chayri qhatiykachachikuptin, sinchʼita sayanan tiyan (2 Tim. 3:12). Kay ñakʼariykunawanqa, Satanás mana ñawpaqman rinanchikta, mana runaman willamunanchikta, Diosmanta karunchakunanchikta ima munan (Job 1:9-11). Chaywanpis, ¿imaraykutaq ñakʼariykunata muchuspa kusikusunman? (2 Ped. 2:9.)
2 Ñakʼariykunata muchunapaq wakichikuna. Jehovaqa, Biblianiqta Jesuspa yachachisqanta rikuchiwanchik. Chayrayku, Jesús nisqanta uyariptinchik, kallpachakusunchik ñakʼariykunata muchunapaq (Luc. 6:47-49). Mana chayllachu, Jehovaqa kallpachakunanchikpaq hermanosta, tantakuykunata, llaqtanniqta yachachiykunata ima, quwanchik. Astawanpis, paymanta kallpata mañakuyta atinchik (Mat. 6:13).
3 Jehovaqa juk suyakuyta qullawanchiktaq. Jehovap nisqanpi iñiptinchik, chay suyakuyqa “ancla nisqa barco sayachina gancho jina [kanqa,] creesqanchejpi mana iskayrayachisqa sinchʼita sayananchejpaj” (Heb. 6:19, 20). Unayqa, mama quchaman rinankupaq barcosqa, mana parachkaptinpis, kay ancla nisqata apaqpuni kanku. Jinamanta sinchi wayrawan paramuyta qallariptin, anclata yakuman wikchʼuykuq kanku, barcota sayachinapaq, mana qaqaman qukunanpaq. Kikillantataq kay saqra pʼunchaykunapi llakiykuna kaptinqa, Diospa nisqanpi iñiyninchik, sinchita sayananchikpaq yanapawasunchik. Ñakʼariykunaqa jukllapi rikhurinkuman. Listra llaqtapi, Pablowan, Bernabewan willayta qallarichkaptinku, runaqa allinta uyarichkarqa, chaywanpis churanakuq judíos chayamuptinku, jukllapi runa manaña uyariyta munarqachu (Hech. 14:8-19).
4 Ñakʼariykunata muchuy kusichiwanchik. Runa churanakuchkaptinpis willamullaptinchikpuni, sunqu tiyasqa kanchik. Cristop sutinrayku ñakʼariptinchik mayta kusikunchik (Hech. 5:40, 41). Ñakʼariypi kachkaspa sinchita sayaptinchik, kʼacha kaykunata puquchinchik, kʼumuykukuyta, kasukuyta, sinchi sayayta ima (Deu. 8:16; Heb. 5:8; Sant. 1:2, 3). Astawanraq Jehovapi, nisqanpi ima, atienekuyta yachanchik; paypitaq jarkʼayta maskʼanchik (Pro. 18:10).
5 Ima ñakʼariypis, mana wiñaypaqchu kanqa (2 Cor. 4:17, 18). Ñakʼariykunata muchuspaqa Jehovata mayta munakusqanchikta rikuchinchik. Chantapis, Satanás llulla kasqanta rikuchinchik. Chayrayku mana saykʼunanchikchu tiyan. “Kusikuyniyojmin pichus imaymana mana allin kaj jamojtin sinchʼita sayajqa, imaraykuchus chay mana allin kajta atipasqanmanta payqa wiñay kawsay pilluta japʼenqa.” (Sant. 1:12.)