La Atalaya jukjinamanta urqhuqunka
1 Kay wata qallarichkaptin, qutuchakuykunaman juk may sumaq willayta willakurqa: 2008 watapiqa enero killamantapacha, La Atalaya revistaqa jukjinamanta urqhukunqa. Jukninqa tukuy runakunapaq kanqa, juknintaq hermanospaq. Ichapis tapukunki: “¿Imayna jukjinataq kay revistas kanqanku? ¿Imapitaq mana kikinchu kanqanku? ¿Ima musuqkunataq kanqa?”, nispa.
2 Mana kikinchu kanqanku. Sapa killapi, ñawpaqta lluqsiq revistaqa, tukuypaq urqhukusqa, nispa sutichakunqa, chaymanjinataq kay revistata urqhukunqa. Kay revistataqa hermanostapis yanapanqa. Astawanpis, Bibliata jatunpaq qhawaq runaqa, kay revistata ñawirispa astawan yachakunqa. Sapa killamanta 15 pʼunchaymanta revistaqa, qutuchakuypaq urqhusqa, nispa sutichakunqa, runaman willamuptinchik kay revistata mana runaman jaywakunqachu. Kay revistapiqa killantinpi tantakuykunapi yachaqananchikpaq kanqa, chantapis wak yachachiykuna hermanospaq kallanqataq. ¡Despertad! revistaqa, Diosmanta mana yachakuyta munaqkunata, wak religionniyuq runata ima, yanapallanqapuni.
3 Aswan sumaq kanqa. Qutuchakuypaq urqhusqa revistapiqa, manaña tukuy imata sutʼinchakunqachu. Kunanqa “precursor”, nispa rikhuriptin, runa entiendenanpaq sutʼinchakun. Astawanpis, kay revistapiqa Jehovamanta sutʼinchaqkunapaq, paykunawan yachakuqkunapaq ima, astawan yachachiykunata urqhukunqa. Tukuypaq urqhusqa revistataq, tukuy runapaq ruwasqa kasqanrayku, paykuna, ñuqanchikjina, tukuy nisqanta allinta japʼiqanqanku. Killantintataq, kikin La Atalaya, ¡Despertad! revistaswan ima willaptinchikqa, tawa semanapi astawan sumaqta chay revistaswan willayta atisunchik.
4 Musuq kanqa. Tukuypaq urqhusqa revistaqa musuq kanqa. Chaypiqa runa yachayta atinanpaqjina yachachiykunata sutʼinchakunqa. Wakinkunapiqa familiapaq yuyaychaykunata urqhukunqa. Astawanpis, waynakuna, sipaskuna Bibliata ukhunchanankupaq tapuykuna urqhukullanqataq. Chantapis, sapa revistapiqa Bibliap pʼitinkunata wakichikunqa, astawan allinta Jehovata riqsinanchikpaq.
5 Jehovamanta mañakuyku tukuy kay tikraykunapi yanapananpaq. Munayku kay revistas La Atalaya, ¡Despertad! ima, Diosmanta yachakuyta munaq runaman yanapanallantapuni (Mat. 10:11).