¡Qutuchakuypaq revistaqa aswan sumaq!
Qutuchakuypaq revistata, wakjinatañataq ruwakun. Kunanqa aswan kʼachitu, Diospa Palabranta ukhunchanapaqtaq astawan yanapawasun (Sal. 1:2; 119:97).
Tawa watastaña Torremanta Qhawaq revistata, iskay laya revistaspi urqhukun: jukqa tukuypaq, juknintaq Jehovamanta sutʼinchaqkunapaq, Bibliamanta yachakuspa ñawpariqkunapaq ima.
Unaymantaña Diosta yupaychaq hermano jinata qillqamuwarqayku: “¡Sumaqtapuni chiqa kaqta sutʼinchan! Ajinata nirqani qutuchakuypaq Torremanta Qhawaq ñawpaq kaq revistata ukhunchachkaspa. Bibliap chiqa yachachiykunasninta sutʼinchasqanqa sunquykamapuni chayan. Mayta agradeceykichik kay revistamanta”, nispa. Wak qillqamullarqataq: “Qutuchakuypaq revistata sapallaypi Biblia con referencias nisqa Bibliaywan aswan unayta ukhunchayta munachkani”, nispa. Qampis kikillantataqchá yuyanki.
Kay Torremanta Qhawaq revistataqa, 1879 watamantapacha urqhukun. Chaytaq Jehovap bendicionninrayku, espíritu santonwan yanapasqanrayku imalla atikurqa (Zac. 4:6). Chaymantapacha 133 watasña pasan, tapantaq achkha kutispi tikrakurqa. Kay 2012 watapiqa, sapa revistap tapanpi achkha coloreswan pintasqa dibujo rikhurinqa. Chaytaq willayninchikmanta kanqa. Ajinamanta Jehovap Reinonmanta tukuy runasman willananchik kasqanta mana qunqakusunchu (Hech. 28:23). Iskay kaq paginapiqa, ima fotomantachus chay dibujo urqhukusqan rikhurinqa. Maypichus urqhukusqanmantataq tumpata sutʼinchakunqa. Ajinamanta Jehovamanta sutʼinchaqkunaqa, allin willaykunata “tukuynejpi” willananchik kasqanta sapa killa yuyarikusun (Mat. 24:14).
¿Imaspiwantaq kay revista wakjina? Yuyarinapaq tapuykunaqa, sapa yachaqanap qallariyninpi kachkan. Ajinamanta qallariymantapacha imastachus japʼiqanayki kasqanta yachanki, kay revistata wakichikuchkaspataq chaykunata maskʼayta atinki. Kay tapuykunataqa, tantakuypi ukhunchaytawan tapukullanqapuni. Chantapis revistap kantusninpi mana qillqasqa kaqqa, aswan ancho kachkan, paginaspa, parrafospa numerosninpis aswan sutʼi.
Chantapis kay revistapiqa, iskay musuq imasmantawan parlakunqa. Jukqa “Waqaychakusqanmanta” nisqa kanqa. Kay revistapi sutʼinchakuchkanjina, Jehovamanta sutʼinchaqkuna rikhurisqankumantapacha imastachus ruwasqankuta yuyarinapaq kanqa. Juknintaq “Tukuy sunqu ruwarqanku” nisqa sutikunqa. Chaypitaq kay tiempomanta cristianos, Reinomanta willaqkuna necesitakun chaypi yanapakuspa, kusiyta tarisqankumanta parlakunqa.
Kay revista, Diosninchikpa Palabranta ukhunchaspa astawan gustachikunaykipaq yanapasunanta munayku.
Qillqaqkuna
[3 paginapi dibujo/foto]
1879
[3 paginapi dibujo/foto]
1895
[3 paginapi dibujo/foto]
1931
[3 paginapi dibujo/foto]
1950
[3 paginapi dibujo/foto]
1974
[3 paginapi dibujo/foto]
2008