Torremanta Qhawaj revista entiendeyta atikunanpaj jina ¿Imaraykutaj orqhokun?

ASHKHA watastaña Jallpʼantinmanta qharis, warmis ima Torremanta Qhawaj revistata orqhokusqanwan mayta yanapachikunku. Kay 2011 wata julio killamantapachataj, entiendeyta atikunanpaj jina inglespi orqhokuyta qallarerqa, mayqentachus uj watata jina orqhokunanta nikorqa.

Kunantaj, may kusiywan willayta munayku chay revistata orqhokunallantapuni. Aswan qhepamantaj, castellanopi, francespi, portuguespiwan orqhokonqa.

MAYTA AGRADECEKUNKU

Entiendeyta atikunanpaj jina inglespi mosoj revistata orqhokusqanmanta, Pacífico Sur nisqaj llajtasninpi tiyakoj hermanos nerqanku: “Hermanosqa Torremanta Qhawaj revistaj nisqanta aswan sutʼita entiendeyta atinku”, nispa. Waj cartapi kayta qhelqamorqanku: “Ñaupajtaqa mana entiendey atina rimaykunata entiendenaykupaj tiempochakunayku, kallpachakunaykutaj karqa. Kunantaj, Bibliamanta textos imaynamantachus revistapi yachachiykunawan khuskachasqa kashasqanta ukhunchanallaykupajña tiempochakuyku”, nispa.

Estados Unidospi, uj profesionniyoj hermana nin: “Chunka pusajniyoj watastaña, yachayniyoj runas jina parlarqani, qhelqarqanitaj. Imaynatachus yuyasqay, parlasqaypis wajkunapaj mana entiendey atina karqa. Chaywanpis, niña ajinatachu parlanayta reparakorqani”, nispa. Kunantaj chay hermana nin: “Entiendeyta atikunanpaj jina parlaypi Torremanta Qhawaj revista orqhokusqanqa mayta yanapawan. Imaynachus qhelqasqa kasqanqa, wajkuna entiendenankupaj jina parlanayta rikuchiwan”, nispa.

Inglaterramanta uj hermana, pichus 1972 watapi bautizakorqa, jinata nerqa: “Chay mosoj revistata ñaupaj kutirayku leeshaspaqa, Jehovapis ojllaykuwaspa leepushawanman jina karqa, imaynatachus uj tata wawitanpaj uj cuentota leepun ajinata”, nispa.

Estados Unidosmanta uj betelita, pichus 40 kuraj watastaña bautizasqa kashan, entiendeyta atikunanpaj jina revista orqhokusqanmantaraj wakin imasta sumajta entiendesqanta nin. Sutʼincharinapaj, 2011 watamanta 15 septiembre killapi orqhokusqan revistapi, Hebreos 12:1 versiculota “Wakin rimaykunata sutʼinchakusqan” nisqa recuadropi, entiendenapaj jina rimaykunawan sutʼinchakorqa. Pay nin: “Chay versiculota aswan sutʼita entienderqani”, nispa. Qotuchakuypi revistata ukhunchakusqanmantataj nin: “Uj wawita entiendeyta atikunanpaj jina revistamanta leespalla kutichejtinpis, Torremanta Qhawaj ujnin revistayoj kajkunaqa mayta miskʼichikunku”, nispa.

Waj betelita jinata qhelqarqa: “Tantakuykunapi wawitas kutichisqankuwanqa mayta miskʼichikuni. Chay mosoj revistaqa tukuy sonqo kutichinankupaj paykunata yanapan. Kutichisqankoqa mayta kallpachawan”, nispa.

Uj hermana, pichus 1984 watapi bautizakorqa, ajinata agradecekorqa: “Noqapi yuyaspapis qhelqakunman jinapuni kashan. Kunanqa imatachus leeshasqayta entiendeyta atiniña, qotuchakuypi revistata ukhunchakushajtinpis, mana manchachikuspa kutichiyta atini”, nispa.

TATASPAJ SUMAJ YANAPA

Qanchis watitayoj qhari wawitaj maman, jinata nerqa: “Tantakuypaj Torremanta Qhawaj revistata wakichikushaspaqa, ashkha rimaykunata wawaykuman sutʼinchanayku karqa, chaypajtaj mayta tiempochakunayku, kallpachakunaykutaj karqa”, nispa. ¿Imaynatá chay mosoj revista yanaparqa? Pay nin: “Wawitay parrafosta leespa sutʼita entiendesqanta rikoyqa, tʼukunapaj jina. Imaynachus qhelqasqa kashasqan entiendenapaj jinalla kasqanrayku, mayta miskʼirichikun. Chantapis, sapitallan kutichinanpaj wakichikun, qotuchakuypi revistata ukhunchakushajtintaj sumajta uyarin”, nispa.

Uj hermana, jisqʼon watitayoj warmi wawitanmanta nin: “Kutichiykunata wakichikunanpajqa niña yanapanaykuchu tiyan. Wakin kutilla uj yachaqanata entiendenanpaj sutʼinchayku. Chay revista paypaj jina wakichikusqanrayku, Torremanta Qhawaj revistata ukhunchakushajtin, tukuy sonqo uyarikun”, nispa.

WAWASRÍ, ¿IMATATAJ NINKU?

Ashkha wawas, chay mosoj revista paykunapaj jinapuni wakichikusqanta ninku. Rebecca, pichus 12 watitayoj, nerqa: “¡Orqhollaychejpuni ari! Wakin rimaykunata sutʼinchaj recuadro mayta gustawan. Wawasqa chaypi sutʼinchakusqanta sumajta entiendeyta atiyku”, nispa.

Nicolette, pichus qanchis watitayoj imillita nillantaj: “Torremanta Qhawaj revistataqa mana entiendeyta atejchu kani. Kunantaj, sapitallaymantaña astawan kutichiyta atini”, nispa. Emma, pichus jisqʼon watitayoj, nin: “Noqata, sojta watitayoj hermanitoytawan, aswan sumajta entiendenaykupaj yanapawayku. ¡Mayta agradecekuyku!”, nispa.

Rikunchej jina, entiendeyta atikunanpaj jina parlaypi qhelqasqa revistaqa ashkhasta yanapashan. Maytapuni necesitakusharqa, chayraykutaj chay revistata, ujnin revistatawan khuska orqhokullanqapuni, mayqenchus 1879 watamantapacha ashkha runasta yanapan.