Maychus kaqta sumaq willaykunata willanachik
1. ¿Ima sumaq willaykunatataq runaman willanchik?
1 Kay pachapi may chhika mana allin willaykuna tiyan, chaywanpis ñuqanchikqa “Diospa qhasilla kʼacha yanapaynin evangeliomanta” tukuyman willanchik (Hech. 20:24). Wakin willaykunaqa kaykuna kanku: kay ‘qhipa pʼunchaykunamanta’, qhipaman Jehová parlasqanmanjina juk musuq pachata apamunqa, chaypitaq kayta nisunchik: “ñawpaj kaj imasqa manaña kanqachu”, nispa (2 Tim. 3:1-5; Apo. 21:4). Chantapis willariyta munanchik manaña unquykuna kananta (Isa. 33:24), Diospa yuyayninpi kaqkuna wañusqaspis familiankuwan, munasqa masisninkuwan ima tinkunankupaq kawsarimunankuta (Juan 5:28, 29), tukuy Jallpʼantintaq kʼacha paraisoman tukunanta (Isa. 65:21-23), ¡wak achkha sumaq willaykunata ima!
2. Señorpa cenanta yuyarina tiempopi, ¿imaraykutaq astawanraq kay sumaq willaykunata willarisunman?
2 Marzo, abril, mayo killaspi, kay sumaq willaykunata astawanraq willayta atisunchik, imaraykuchus achkha llaqtaspi kay tiempopiqa aswan jatuchaq pʼunchaykuna kanqa, manataq anchata paranchu, nitaq anchata chirinchu, chayrayku aswan horasta runaman willayta atikunqa. Chantapis, marzo killapi sábado 22 pʼunchayninpi, Inti yaykupusqantawan Señorpa cenanta yuyarikunqa, chaymin pachantinpi imamantapis aswan sumaq ruwayqa kanqa. Chayrayku, kunanmantapacha wakichikuna kanman, astawan chay killaspi willarinanchikpaq.
3. ¿Imataq kay killaspi familianchikta astawan willarinanpaq yanapanqa?
3 Precursorado auxiliar. Kay kimsa killaspi juk killallatapis precursor auxiliar kanaykipaq, ¿tiempochakuwaqchu? ¿Manachu familiaykiwan Bibliata yachakuchkaspa chaymanta parlariwaqchik? Ichapis, familiaykipi tukuyniykichik puraqmanta yanapanakuptiykichikqa, wakinkuna chayri jukllapis precursor kayta atinqanku (Pro. 15:22). Jehovaman chay munasqaykichikta willaychik, paytaq yanapasunqachik (Pro. 16:3). Ichapis chay killaspi mana familiamanta jukllapis precursor kayta atinqachu, chaywanpis tukuy astawan willanankupaq kallpakunkuman, jinamanta precursoresjina llamkʼaqkunata astawan yanapanqanku.
4. ¿Imaynatá tiempochakuwaq precursor auxiliar kanaykipaq diantinta llamkʼaspapis?
4 Diantinta llamkʼaptiykipis, allinta tiempochakuspa precursor kayta atiwaq. Ichapis, khuskan pʼunchaypi samarichkaspa, runaman willariwaq. Chantapis, maypichus llamkʼanki, chayri maypichus tiyakunki chayniqpi, qampaq juk territorio nisqata mañakuwaq, jinamanta manaraq llamkʼachkaspa, chayri llamkʼayniykimanta lluqsispa, ichapis juk horata chayri astawan runaman willarinapaq. Wakjinamantapis tiempochakullawaqtaq, ichapis wakin ruwanasniykita qhipan killaspaq suchuchiwaq, jinamanta semana tukukuyninpi astawan willariwaq. Chantapis, wakinkunaqa llamkʼayninkumanta jukta chayri iskay pʼunchayta vacacionesta urqhunku, astawan willarinankupaq.
5. ¿Imaynatá machitusta, unqusqastapis yanapawaq precursores auxiliares kanankupaq?
5 Qam, ¿machituchu, unqusqachu, pisi kallpayuqchu kanki? Jina kaptinpis, qam precursor kayta atiwaq, chaypaqqa sapa pʼunchay juk ratullata runaman willarinayki tiyan. Jehovamanta ‘may sumaj atiyninta’ mañakuy (2 Cor. 4:7). ¡Juk hermana 106 watasniyuq precursora kayta atirqa! Payqa, cristiano familianpa yanapayninwan, jinallataq qutumanta hermanospa yanapayninwan ima, wasimanta wasi willarqa, allinta uyariqkunamantaq kutirqa, Bibliamanta yachakuqkunaman rirqa, wak ruwaykunatapis ruwallarqataq. Chantapis, chunka runasta tarirqa Bibliamanta yachachinanpaq. Pay jinata nin: “Precursora kasqaymanta yuyarikuptiyqa, sunquypiqa Jehovata, Churinta, llaqtantapis, mayta munakuni, anchatataq pachis nini. Tukuy sunquywan Jehovaman pachis niyta munani”, nispa.
6. ¿Imaynatá waynaspis sipaspis yachay wasipi kaspapis precursores auxiliares kayta atinkuman?
6 Bautizasqaña kaqkunaqa, yachay wasillapiraq kaspapis, precursores auxiliares kayta atinkuman. Diantinta llamkʼaqkunajina, paykunapis tiempochakunkuman, semanap tukukuyninpi astawan willarinankupaq, chantapis qutuwan semanapi wakin pʼunchaykunata lluqsispa juk horata chayri astawanpis willarinkuman. Feriados kaptin, chay pʼunchaykunapi lluqsiyta atinkuman. Precursor auxiliar kayta munaptinku tatasninkuwan chaymanta parlarinkuman.
7. ¿Imaynatá ancianos Señorpa cenanta yuyarina tiempopi aswan hermanos precursores kanankupaq yanapankuman?
7 Precursores kanankupaq yanapana. Qutumanta ancianos ruwasqankuwan, hermanospa sunqunkuta aysarinqa (1 Ped. 5:2, 3). Pikunachus llamkʼanku, yachay wasipi estudianku, paykunapaq tutamanta chayri tardespi willaq lluqsinankupaq wakichikunqa. Superintendente de servicio nisqa, kamachinqa allin wakichisqas hermanosta willaq urqhunanpaq, chantapis chay killaspi territorio, publicaciones ima, mana pisiyananpaq.
8. ¿Imatataq juk qutupi ruwakusqan yachachiwanchik?
8 Juk qutupi, ancianosqa may ñawpaqmanta hermanosta yanaparirqanku precursores auxiliares kanankupaq, tantakuykunapi sapa semana pikunachus precursores auxiliares kasqankuta qutuman willaq kanku. Jinamanta, astawan willayta munaq hermanosqa, chay killaspi precursores kanankupaq yanapay kasqanqanta rikurqanku. Chantapis ancianosqa, sutʼiyaymanta, chʼisiyachkaptin ima, willaq lluqsinankupaq tantakuykunata ruwarqanku. Chayrayku abril killapi 53 precursores auxiliares karqanku, ¡khuskan qutujina!
9. ¿Imaraykutaq nisunman Señorpa cenan qayllamuchkaptin Dios kamachisqanmanjina kawsaqkuna willaq lluqsiyta qallarinankupaq allin tiempo kasqanta?
9 Wakkunatapis willanankupaq yanapay. Qutupi musuq kaqkuna chayri hermanospa wawasninku willaq rinankupaq aprobasqaña kaqkunata, achkha watastaña willaq hermanoswan kachankuman. Señorpa cenan qayllamuchkaptin, achkha hermanos astawan willaq lluqsinqanku, chayrayku musuq kaqkunata chay tiempopi sumaqta yanapakunman. Qam Bibliamanta yachachinki chay runa, ¿allintachu ñawparichkan, Jehovap kamachisqanmanjinachu kawsachkan? ¿Wawasniyki kasukunkuchu, qutupi allintachu ñawparichkanku, chaywanpis maraqchu willaq lluqsichkanku? Paykunamanta mayqillanpis willaq lluqsiyta munasqanta nisuptinqa, qam rikusqaykimanjinataq pay willaytaña atiptin, qutumanta mayqin ancianollawanpis parlayta atiwaq. Superintendente presidente nisqa, iskay ancianosta kamachinqa, qamwan, wawaykiwan chayri Bibliamanta yachakuqwan parlarinankupaq.
10. ¿Imatá ancianos ruwankuman manaña willaq lluqsiq hermanosta yanapanankupaq?
10 Chantapis qhipan killaspi, manaña willaq lluqsiqkunata yanapanapaq allin tiempollataq kanqa, jinamanta qutuman kutimunankupaq. Qutupi Librota Yachaqanapaq tantakuymanta superintendentes nisqas, qutumanta wak ancianospis, chay hermanosta waturichunku, chantapis paykunawan khuska willaq lluqsinankupaq waqyarinkuman. Juk hermano unaytaña mana willaq lluqsiptinqa, ñawpaqtaqa iskay ancianos chay hermanowan parlarinqanku, willaq lluqsiyta atinmanchus manachus chayta yachanankupaq (km 11/00 pág. 3).
11. ¿Mayqintaq “Diospa qhasilla kʼacha yanapaynin” tukuy runapaq?
11 Señorpa cenanpaq wakichikuy. Jesús ñuqanchikrayku wañusqanqa, “Diospa qhasilla kʼacha yanapaynin” (Hech. 20:24). Marzo killapi sábado 22 pʼunchaypi, Inti yaykupuptin, tukuy pachantinpi Cristop wañusqanta yuyarinankupaq may chhika runas tantakunqanku. Tukuy runasta waqyarikuyta munanchik, kay Diospa qhasilla kʼacha yanapayninmanta yachanankupaq, chantapis paykuna jamunankupaq tukuy imata ruwananchik tiyan.
12. ¿Pikunatataq Señorpa cenanman waqyarikusunman?
12 Allin kanman tʼukurinayki pikunatachus waqyarinaykita, juk cuadernopi paykunap sutisninkuta qillqawaq. Chaypi, familiaresniykip, vecinosniykip, llamkʼaq masiykip, yachaqi masiykip, Bibliamanta yachachisqaykip, wak riqsisqasniykip ima, sutisninta qillqawaq. Paykuna Señorpa cenanmanta imallatapis tapusuptinkuqa, ¿Imatapunitaq Biblia yachachin?, libromanta yapanta 206-208 paginasta allin kanman ñawiriy. Ichapis ajinamanta chay runasman Bibliata yachachiyta qallariwaq, imaraykuchus paykunaqa riqsinqankuña ima librowanchus runata Bibliamanta yachachisqanchikta.
13. ¿Imaynatá Jehová tʼinkan, wak runasta Señorpa cenanman waqyariqkunata?
13 Juk hermana cuadernonpi, 48 familiaspa sutisninta qillqarqa. Chay cuadernonpi jukmanta juk chay runasta waqyariytawan, chay runasta waqyarisqantaña qillqaqpacha, jinallataq ima pʼunchaypichus waqyarisqanta qillqaq. ¡Maytapuni kusikurqa, chay runasmanta Señorpa cenanman 26 risqankumanta! Juk hermano paypaq llamkʼaq runata waqyarirqa, chay runaqa ñawpaqta sacerdote kasqa. Chay runaqa, waqyarisqanta japʼikurqa, tantakuyman rispataq nirqa: “Kimsa chunka wataspi Iglesia Católica nisqapi Bibliamanta mana yachakusqayta, juk horallapi yachakuni”, nispa. Juk chhika tiempomantataq Bibliata Yachachin, librowan yachakuyta qallarirqa.
14. ¿Ima campañataq pachantinpi qallarikunqa marzo killap qallariyninmantapacha?
14 Campaña. Marzo killapi sábado 1 pʼunchaymanta 22 pʼunchaykama juk campaña kanqa, chaypitaq tukuy pachantinpi juk sumaq waqyarikuyta runaman jaywakunqa. ¿Tukuyninchikchu chaypi yanapakusun? Allin kanqa, kay waqyarikuyta runap makinpipuni saqinanchik, runap wasin punkullanpi saqinamantaqa. Chaywanpis, qutupta may jatun territorio willananpaq kaptinqa, ancianos niwasunchik imaynatachus chay waqyarikuyta saqinanchikta, wasipi mana nipi kaptin, ichapis punkupi saqisunman. Chantapis, sapa sábado domingo ima, revistasta jaywanallapuni kanqa.
15. ¿Imaynatá Señorpa cenanman runata waqyarisunman?
15 Kay campaña nisqa pisi tiempolla kanqa, chayrayku allin kanman runawan pisillata parlariy, chantapis siminakuqkunamanta allinllawan usqhayta ripuy. Runata waqyarichkaspa ichá jinata nisunman: “Kay waqyariyta familiaykiman, munasqa masisniykiman ima, jaywariytapuni munayku, marzo killapi 22 pʼunchayninpi juk sumaq ruwayta yuyarikunqa. Kay waqyariytaq qampaq. Kaypi mayniqpichus ima horachus kananta willachkan”, nispa. Wakin runaqa ichapis tapuwasunchik, wakkunataq ichapis japʼikullanqanku, chayri chay tantakuyman rinankuta niwasunchik. Pikunachus allinta uyariwanchik, paykuna maypichus tiyakusqankuta qillqasunman, wak pʼunchaytaq kutisunman.
16. ¿Imaraykutaq allinpuni kanman campañapi Señorpa cenanman runata waqyarikuy, imaynatá chayta yachanchik?
16 Qayna wata, juk soldado wasinpa punkunpi Señorpa cenanman rinanpaq juk waqyariyta tarirqa. Chayman riyta munaspataq, sargentonwan parlarqa. Sargentotaq chay waqyariyta rikuytawan tʼukulla qhipakurqa, chaymantataq tatasnin Jehovamanta sutʼinchaqkuna kasqankuta nirqa, chantapis paykunawan ñawpaqta tantakuykunaman risqanta nillarqataq. Chayrayku, mana chay soldado kachallarqachu, astawanpis paywan khuska Señorpa cenanman rirqa.
17. ¿Imaynatá Diospa qhasilla yanapayninta japʼisqanchikta juntʼayta munasqanchikta rikuchisunchik?
17 Pachis nisqaykita rikuchiy. 2008 watapi Señorpa cenanta yuyarinapaq tiempo qayllamusqanmanjina, Diospa qhasilla yanapayninpi tukuypis allinta tʼukurinanchik tiyan. Apóstol Pablo qillqarqa: “Qankunata mañayku ama qhasipajchu kananta Diospa qhasilla kʼacha yanapayninta japʼisqaykichejqa” (2 Cor. 6:1). Diospa qhasilla kʼacha yanapayninta japʼisqanchikta juntʼaytapuni munanchik, chaywanpis ¿imaynatá chayta rikuchisunman? Pablo jinata kutichiwanchik: “Astawanqa munayku tukuy imapi rikuchikuyta Diospa kamachisnin jina”, nispa (2 Cor. 6:4). Ari, kawsayninchikwan, sunqu kʼajaywan willaspa ima, Jehovaman tukuy imata quwasqanchikmanta pachis nisqanchikta rikuchinchik. Kay Señorpa cenan qayllamuchkaptin astawanraq runaman willayta atisunchik, jinamanta sumaq willaykunata maychus kaqmanjina willasunchik.
[3 paginapi recuadro]
¿Pikunataq precursores auxiliares kanankupaq tʼukurinkuman?
◼ Familiamanta tukuy kaqkuna
◼ Diantinta llamkʼaqkunapis
◼ Unqusqakunapis, machituspis
◼ Yachay wasipi kaqkunapis
[4 paginapi recuadro]
Señorpa cenanpaq waqyariykunata jaywachkaptiyki:
◼ Juk chhikallata parlay, kusiywantaq
◼ Pikunachus allinta uyarinku, paykunap sutinta qillqay, kutiytaq
◼ Semanap tukukuyninpi revistasta runaman jaywallaypuni