Wakichikunapuni: Diosmanta yachakuyta munaqkunaman kutinapaq
1. ¿Imaynatataq Diospa Reinonmanta willay tukuy suyusman chayanan karqa?
1 Jesusqa, discipulosninta, Diospa ‘Reinonmanta evangeliota’ willamunankupaq wakichirqa (Mat. 4:23; 9:35). Chay discipulosninqa, Palestina jallpʼallapi Diospa Reinomanta willarqanku, chaywanpis Jesús manaraq janaqpachaman kutichkaspa, “tukuy laya runas [tukuy suyusmanta]” discipulosninman tukunankuta, nirqa (Mat. 28:19, 20, Qheshwa Biblia).
2. ¿Imatá ruwaspataq Jesuspa kamachisqanta juntʼasun?
2 Jesuspa kamachisqanta, Diospa Reinonmanta allin willaykunata yachakuyta munaqkunaman kutispa juntʼanchik, jinamanta Jesucristop yachachisqanta, yachachispa yanapasunchik. Chayrayku allinta wakichikunanchik tiyan, Diosmanta yachakuyta munaqkunaman kutispa Bibliamanta yachachinapaq.
3. ¿Imatataq ñawpa kutipi runawan parlarispa ruwanku, watiqmanta kutinankupaq?
3 Allinta wakichikuy. Wakin publicadoresqa, runawan parlarisqankumanta, manaraq ripuchkaspa juk tapuyta ruwanku, kutispa chay tapuyman kutichinankutataq ninku. Kutispataq Yachachin librowan chay tapuyta ruwasqankuman kutichinku, jinamanta chay runaman Bibliamanta yachachiyta qallarinku
4. ¿Imaraykutaq mana musuq revista chayamunanta suyananchikchu tiyan runaspa wasinkuman kutinapaq?
4 Chayrayku, Torremanta Qhawaq revista sapa kimsa killalla lluqsimusqanqa, mana ninayanchu chay runasman sapa kimsa killalla kutinanchikta. Astawanpis, Diosmanta yachakuyta munasqanta wiñachinapaq, ima revistachus kapunña chaymanta kutispa ukhuncharisunman.
5. ¿Imapitaq runap wasinman manaraq kutichkaspa tʼukurina tiyan?
5 Imamantachus yachachiyta munasqaykipi tʼukuriy. Runap wasinman manaraq kutichkaspa, allin kanman cuadernoykipi qillqasqaykita qhawarinayki, chantá imamantachus yachachiyta munasqaykipi tʼukuriy, ima publicaciontachus saqisqaykimanta juk yachaqananta ukhunchariy, chayri wak publicacionta imamantachus chay runawan ñawpaqpi parlasqaykimanjina saqiwaq. Chantá juk tapuyta saqinki chayqa, kutispa chay tapuyman Bibliata ñawirispa kutichiwaq.
6. ¿Imaraykutaq runaspa wasinman kutinchik?
6 Imaraykutaq kutinchik. Ñuqanchikqa runaman Bibliamanta yachachiyta qallariyta munanchik. Juk hermano juk runaman Bibliamanta yachachiyta munaptin, runaqa mana munarqachu. Chaymanta hermano musuq revistaswan kutispa chay runata nirqa: “Watiqmanta kayniqpi kachkayku, runaspa tapuyninman Bibliap nisqanwan kutichispa” nispa. Chantá kutichinanta suyaspa, Bibliamanta juk pʼitita, Yachachin libromanta juk parrafotawan ñawiripurqa. Jinamanta Bibliamanta yachachiyta qallarirqa.
7. ¿Imaynatá ñawpaqmanta wakichikusqayki, runata Bibliamanta yachachiyta qallarinaykipaq yanapasurqa?
7 Bibliamanta yachakuyta munaqkunaman kutinapaq wakichikuyqa may allin: Jinamanta willayninchikpi kusikusunchik, chantá ichapis pikunachus ‘wiñay kawsaypaq kaqkunata’ yanapasunman (Hech. 13:48, Qheshwa Biblia).