Bibliata familiapi, jukninchik ima, ñawiriyqa may allinpuni
1. ¿Imaraykutaq kay tiempomanta Diospa Llaqtanta Kamachiqkuna interesakunku, chantá imaraykutaq?
1 Diospa Llaqtanta Kamachiqkunaqa, ñawpa siglopijina, Jehovap llaqtanpa allinninta maskʼanku (Hech. 15:6, 28, 29). Yachanchikjina, jatun ñakʼariy pʼunchayqa, may qayllitapiña kachkan, chayrayku tukuy publicadores, astawan Jehovaman kʼaskananchik tiyan. Chantá, Libromanta yachaqanaman riq kanchik, chay tiempopi ¿imatá ruwasun? Tukuy allinta ruwasunman, familianchikwan khuska Diosta yupaychaspa. Chayjinamanta Diospa palabranta sumaqta ukhuncharisunchik, chay kawsayman pusaq yachaytataq sumaqta japʼikusunchik (Sal. 1:1-3; Rom. 11:33, 34).
2. ¿Imaynamantataq wakichikusunman familiapi chʼisinpi Diosta yupaychanapaq?
2 Familiajina Diosta yupaychanapaq chʼisi. Jehovap nisqanmanjina, tatasta familiankuwan Bibliamanta yachakunankuta, mana saqispa tantakunankuta yuyarichiyku (Deu. 6:6, 7). Chantá, pikunachus sapallanku kaqkuna, chay tiempopi Bibliamanta astawan yachakunanku, ukhuncharinanku tiyan. Chayrayku, sapa jukninchik tiempo “kashajtillanraj”, allinta yachakuna, tʼukurina ima. Ajinamanta Diosta yupaychanapaq, kallpachasqa kasunchik, imaptinchus “pʼunchaykunaqa mana allinchu” kachkanku (Efe. 5:15, 16).
3, 4. ¿Imasmantataq yachakuyta atisunman, chantá imaraykutaq?
3 Imamanta yacharikusunman. Familiapi Bibliamanta yachakuspa kusiyta tarinapaqqa, kay Índice de las publicaciones Watch Tower, chantá CD-ROM Watchtower Library nisqamanta ima, sumaq yachaqanasta urqhusunman. Chantá Torremanta Qhawaq revistapi, kay “Familiaspaq yuyaychaykuna”, “Wawasta yachachinapaq”, “Waynaspaq sipaskunapaq” nisqa yachaqanasmanta ima, urqhullasunmantaq. Chantapis, !Despertad¡ revistamanta, wakin yachaqanasninmanta, kay “Waynaspata sipaskunapta tapuyninku” chayri, tʼukunapaqjina Dios ruwasqasninmanta.
4 Bibliata allillamanta ñawiriyqa, sumaqta yuyayninchikpi, sunqunchikpi ima japʼinapaq yanapawasun (Heb. 4:12). Chantá, Diospa llaqtan videosta urqhusqankuta qhawarisunman, chaymanta khuska parlarinapaq. Chantapis, wakjinasmanta ruwallasunmantaq yachakuchkasqanchikpi, kusiyta tarinapaq. ¿Imaptintaq familiaykita mana tapurinkichu, imamantachus yachakuyta munasqankuta?
5. ¿Imaptintaq sapallanchikpi, familiapi ima, Bibliamanta ukhunchariy may allin?
5 Imaraykutaq mana jaykʼaqjina chay tantakuyta ruwana. Diosta yupaychanapaq, jinata kallpakusun chayqa, kay kʼamiriyta juntʼanapaq wakichisqa kasunchik: ‘sumaqta sayaychik, rikunkichiqtaq, Dios salvasusqaykichiqta’ (Éxo. 14:13). Tatasqa, wawasninkuta, “sajra juchasapa runaspa chawpimpi” uywanankupaq, Diospa yuyaychayninta necesitanku (Fili. 2:15). Wawaspis, yachaywasipi khuchi kawsaymanta karunchakunankupaq, yanapata necesitallankutaq (Pro. 22:3, 6). Casarasqa kaqkunapis, ‘kimsanchasqa chʼankullajina’ Jehovawan kasqankuta, astawan sinchichananku tiyan (Ecl. 4:12). Chayrayku, tiemponchikta mana usuchispa apaykachana, ‘llimphu santo kaj creesqanchikta’ kallpachanakunapaq (Jud. 20).