Familiaq allinninpaq

1. Samarikuna pʼunchay, ¿imaynatá israelitasta yanaparqa?

¹ Jehová israelitasman samarikuna pʼunchayta qusqan, familiap allinninpaq karqa: israelitasqa chay pʼunchay ruwaykunasninkumanta samariq kanku, jinamanta Jehovaman qayllaykusqankupi, kʼacha kayninpi ima, tʼukurinankupaq tiempoyuq karqanku. Tatasmanpis wawasnikuman Tata Diospa Kamachiykunasninta yachachinankupaq yanaparqa (Deu. 6:6, 7). Jinamanta israelitasqa sapa semana, sábado pʼunchayta Jehovata yupaychanankupaq tiempoyuq karqanku.

2. Jehová, juk pʼunchay samarinankuta kamachisqan, ¿imata yachachiwanchik?

² Jehovaqa, familiasta manaña sábado pʼunchayta samarinankuta kamachinchu. Chaywanpis, chay kamachiyqa Diospa llaqtan qayllallanpipuni kananpaq mayta interesakusqanta yachachiwanchik (Isa. 48:17, 18). Kunanpis, Familiapi Diosta Yupaychanapaq Chʼisiniqta mayta interesakusqanta rikuchiwanchik.

3. ¿Imapaqtaq Familiapi Diosta Yupaychanapaq Chʼisi ruwakun?

³ ¿Imapaqtaq Familiapi Diosta Yupaychanapaq Chʼisi ruwakun? 2009 enero killamantapacha Libromanta Yachaqanapaq, Diosmanta Parlayta Yachanapaq, Willayta Yachanapaq tantakuykuna jukllapi ruwakuyta qallarirqa. Jinata ruwakusqanqa, Familias sapa semana juk chʼisita khuska, Jehovata yupaychanankupaq astawan qayllaykunankupaq ima, yanapananpaq. Ima chʼisichus Libromanta yachaqanapaq tantakuy karqa, chay chʼisi chayri wak chʼisi Bibliamanta ukhunchanankupaq familiasta kallpachakurqa, jinamanta familia necesitasqanmanjina Bibliamanta ukhunchananpaq.

4. Familipi Diosta Yupaychanapaq Chʼisi, ¿juk horallapichu ruwakunan tiyan? Sutʼinchariy.

⁴ Libromanta Yachaqanapaq tantakuyman rinapaqqa, kʼachanchakunapaq, pʼachallikunapaq, chayman chayanapaq ima, tiempo necesitakuq. Wakinkunataq juk hora tantakuypaq, karuta viajaq kanku. Tantakuykuna waqjinamanta ruwakusqanqa, familias Diosta yupaychanankupaq, astawan tiempota qun, chayrayku kay tantakuyqa mana juk horallapunichu ruwakunan tiyan. Astawanqa familia imatachus necesitasqanpi tʼukurina tiyan, chaymanjina ruwanapaq.

5. ¿Khuskapunichu juk yachaqanata, tukuy tantakuypi ukhunchana kanman? Sutʼinchariy.

⁵ ¿Khuskapunichu juk yachaqanata, tukuy tantakuypi ukhunchana kanman? Familias chayri qhariwarmi mana wawasniyuq, Bibliata khuska ukhunchaspaqa puraqmanta kallpachanakunku (Rom. 1:12). Chaytaq, familiata astawan jukchan. Chayrayku, Familiapi Diosta Yupaychanapaq Chʼisi, Bibliap yachachiykunasninta ukhunchanapaq kanan tiyan. Chantapis sapallanku Bibliata ukhunchankuman. Sutʼincharinapaq, familia khuska ukhunchayta tukuytawan, sapa juk, ichá tantakuykunapaq wakichikuspa, chayri revistasta ñawirispa pachallanpi qhipakunkuman. Wakin familiaspi chay chʼisi teleta ni pi qhawanchu.

6. ¿Imaynata Familiapi yupaychayta ruwakunman?

⁶ ¿Imaynatá ruwakunman? Mana tapuykunallawanchu, kutichiykunallawanchu ruwakunan tiyan. Wakin familiasqa gustachikunankupaqjina, suyanankupaqjina, qutuchakuymanta juk tantakuypijina achkhaman tʼaqaspa ruwanku. Sutʼincharinapaq, khuska Bibliata ñawirinku, tantakuykunapaq juk chhikanta wakichikunku chantá imaynatachus Diosmanta willanata amañanku. Kay 6 paginapi astawan yuyaychaykuna rikhurin.

7. ¿Imaynatá tatas kay tantakuyta wakichinkuman?

⁷ ¿Imaynatá tatas kay tantakuyta wakichinkuman? Wawasqa munakuywan, mana kʼamirisqalla astawan yachakunku. Tiempo allillan kaptinqa, jawapi ruwakunman, mana wasi uqhupipunichu. Chantapis kay tantakuy mana saykʼuchikunanpaq wakin ratos samariyta atikun. Wakin familiasqa ima mikhuytapis wakichinku, tantakuy tukukusqantawan mikhunankupaq. Tatasqa ichapis, wawasninkup chʼampaykunasninkuta allinchanankupaq chayri imapichus pantanayachkasqankumanta kʼaminankupaq tiempochakunanku kanqa, Familiapi Diosta Yupaychanapaq Chʼisipi, mana allinchu kanman kʼaminaykiqa. Wawaykita kʼamiriyta, yuyaychayta munaptiykiqa sapallanpi mana pʼinqachinaykipaq, wak pʼunchaypi parlariwaq. Familiapi Diosta Yupaychanapaq Chʼisiqa mana puñuyta chʼutunapaqjinachu kanan tiyan, manaqa kusikunapaqjina imaraykuchus kusisqa Diosta yupaychanchik (1 Tim. 1:11, NM).

8, 9. ¿Imaynatá tata kay tantakuypaq wakichikunan tiyan?

⁸ ¿Imatá tata familiapi ruwanman? Familiapi tataqa, Diosta Yupaychanapaq Chʼisipi, imaschus ukhunchakunqa, imaynatachus ruwakunqa ima, tiempowan wakichikuptinqa tukuy familiata yanapanqa (Pro. 21:5). Kay tantakuy ruwakunanpaq qusaqa allin kanman warminta tapurinan (Pro. 15:22). Chantapis, wakin kutisqa wawasniykichikta imaynatachus ruwakunapaq tapuriwaqchik. Jinamanta imatachus yachayta munasqankuta chayri imachus llakichisqanta, yachankichik.

⁹ Wakin kutisqa tatas mana unaytachu wakichikunanku kanqa. Ichapis familiaqa sapa semana kikillantapuni ruwayta munanqa, jinamanta tataqa sapa semanapaq mana kutin kutinta wakichikunanchu kanqa. Kay tantakuy tukukusqantawan tata imapichus familia kallpachakunanta reparaspa, ichapis qhipan semanapaq wakichikunman. Wakin tatasqa familiapi imachus ukhunchakunqa papelpi qillqanku chaytataq maypichus tukuy rikunankupaqjina kʼaskaykuchinku. Chaytaq familia kay tantakuyta wakichikunanpaq may kusiywan suyananpaq ima yanapan.

10. Sapallanku kaqkuna, ¿imatá Diosta Yupaychanapaq Chʼisipi ruwankuman?

¹⁰ Sapallay kaptiy, ¿imatá ruwayman? Sapallanku kaqkuna Diosta Yupaychanapaq Chʼisipi Bibliata ukhunchankunman. Sumaqta ruwanankupaqtaq, Bibliata, Torremanta Qhawaq, ¡Despertad! revistasta ima ñawirinkuman, tantakuykunapaqpis wakichikunkuman. Wakin hermanosqa juk yachaqanata astawan ukhunchanku. Wakin kutispitaq juk hermanota chayri juk familiata waqyarinkuman khuska Bibliamanta yachakunankupaq.

11, 12. Familiapi Diosta Yupaychanapaq Chʼisita ruwallaptinchikpuni, ¿imaynatá yanapawasun?

¹¹ Familiapi Diosta Yupachanapaq Chʼisita ruwallaqtinchikpuni, ¿imaynatá yanapawasun? Sunqumantapacha Diosta yupaychaqtinchik astawan Jehovaman qayllaykunchik. Familiatapis jukchasqa kananpaqpuni yanapan. May sumaq tʼinka kasqanmanta juk matrimonio nirqa: “Iskayniyku precursores kayku mana wawas kapuwaykuchu chaywanpis Familiapi Diosta Yupaychanapaq Chʼisitaqa mayta suyayku, jukchasqa kanaykupaqpis yanapawayku, Tata Diosmanpis astawan qayllaykuyku. Tantakunayku pʼunchaytaq, tutamanta rikchʼarispa puraqmanta ninakuyku: ‘¿Imatachus kunan ruwananchikta yuyarikunkichu? ¡Familiapi Diosta yupaychayta ruwanachik tiyan!’”.

¹² Familias may ruwanasniyuq kaptinkupis, Diosta yupaychanankupaq kallpachakuptinkuqa mayta yanapan. Juk precursora, sapallan iskay wawasninta uywachkaq nin: “Unayqa familiaypi mana Bibliata ukhunchaqchu kayku, may saykʼusqa kasqayrayku sapa yuyarispalla ruwaq kayku. Mana tiempochakuyta atiqchu kani. Kunanqa Familiapi Diosta Yupachanapaq Chʼisi ruwanapaq yuyaychakusqanmanta may agradecesqa qhillqamuykichik. Sapa semana ruwachkayku chaytaq mayta yanapachkawayku”.

13. ¿Imaynatá kay tantakuy ruwasqanchikmanjina yanapawasun?

¹³ Jehová israelitasman samarina pʼunchay qusqanqa familias allinninkupaq karqa, kikillantaq Familiapi Diosta Yupaychanapaq Chʼisi Jehovamanta juk sumaq regalo (Sant. 1:17). Israelmanta familias samarikuna pʼunchayta apaykachasqankumanjina Jehovaman astawan qayllaykuyta atinkuman karqa. Kikillantaq kunanpis chay tantakuyta ruwasqachikmanjina inaynatachus yanapawasqanchikta rikusunchik (2 Cor. 9:6; Gál. 6:7, 8; Col. 3:23, 24). Familiaykipi maychus kaqta ruwanki chayqa salmistajina ninki: “Noqari Diosman qayllakusaj. Noqapajqa chaymin aswan sumajqa. Tukuy Atiyniyoj Tata Dios, qanmin pakakunay kanki”, nispa (Sal. 73:28).

[5 paginapi sutʼinchaynin]

Familiapi Diosta Yupaychanapaq Chʼisiqa mana puñuyta chʼutunapaqjinachu, manaqa kusikunapaqjina, kusisqa Diosta yupaychasqanchikrayku

[6 paginapi recuadro]

KAYQA APAYKACHANAPAQ

Familiapi Diosta Yupaychanapaq Yuyaychaykuna

Biblia:

• Bibliamanta sapa semanapaq ñawirikunanmanta juk chhikanta ñawiriychik. Atikuptintaq, juk ñawirinman, qhillqasqapi wak runañataq parlaqtintaq familiamanta wakñataq ñawirinman, chay runaspis kankumanjina.

• Bibliata ñawirisqaykichikmanjina rikuchiychik.

• Sapa semanapaq Bibliamanta ñawirinapaq wakichisqa tʼaqasta, ñawpaqmanta sapa juk ñawirispa, jukta chayri iskay tapuykunata qillqachun. Chantá khuska kutichiykunasta ukhunchaychik.

• Sapa semana Bibliamanta juk pʼitita papelpi qillqaychik, yuyanaykichikpaq, sutʼinchanaykichikpaq ima. Chayjina papelesta jallchʼaychik, sapa semanataq yuyayniykichikpi japʼinaykichikpaq ñawiriychik.

• Bibliamanta grabacionesta uyarispa, Bibliaykichikpi qhatiychik.

Tantakuykuna:

• Tantakuypaq khuska juk chhikanta wakuchikuychik.

• Tantakuykunapaq Reinomanta takiykunasta khuska amañaychik.

• Qutuchakuypi Diosmanta Parlayta Yachanapaq tantakuypi, mayqillanpis umallirichinqa chayqa, chayri Willayta Yachanapaq tantakuypi juk rikuchiyta ruwanan tiyan chayqa, imaynatachus ruwananta yuyanchariychik chayri wakichikusqantaña rikuchichun.

Familia imapichus llamkʼanan tiyan:

• Waynaspata sipaskunapta tapukuyninku chayri Aprendamos del Gran Maestro librowan yanapachikuychik.

• Yachaywasipi imaynatachus chʼampaykunata atipanankupaq, rikuychiykunata ruwaychik.

• Wawas tatas kankumanjina juk yachachiymanta ukhunchachunku, qamkunataq tatas wawaspis kankichikmanjina yuyaychachikuychik.

Reinomanta Willamunapaq:

• Semana tukukuyta, imaynatachus willaypi parlanankuta rikuchiychik.

• Vacacionpi, chayri Señorpa Cenan killapi, imaynatachus astawan willanaykichikpaq parlariychik.

• Willaypi mana kutichiy atina tapuykunasta sapa juk ukhunchachun, imaynatachus kutichinanta rikuchichun.

Wak yuyaychaykuna:

• Kunallanraq lluqsimuq revistamanta juk yachaqananta khuska ñawiriychik.

• Familiapi sapa juk, kunallanraq lluqsimuq revistasmanta juk yachaqana gustasqanta ñawirispa imatachus japʼiqasqankuta parlarichunku.

• Familiapi Diosta Yupaychayman, juk hermanota chayri qhariwarmi hermanosta waqyariychik, ichá cristiano kawsayninkumanta tapuriwaqchik.

• Diospa llaqtanmanta videosta qhawaytawan, tapunarikuychik.

• ¡Despertad! revistamanta “Los jovenes preguntan” chayri “Actividades para la familia”, yachaqanasta ukhunchariychik.

• Torremanta Qhawaq revistamanta “Wawasta yachachinapaq” chayri “Waynaspaq sipaskunaspaq” yachaqanasta ukhunchariychik.

• Kay watamanta Anuario, chayri jatun tantakuypi kunallanraq lluqsimuq librota ñawirispa ukhunchariychik.

• Kunallanraq mayqin jatun tantakuymanchus risqaykichikmanta imasmantachus parlakusqanta yuyariychik.

• Jehovaq ruwaykunasninta qhawaspa, imatachus yachachisqanmanta parlariychik.

• Maquetata, mapata, chayri dibujota, khuska ruwaychik.