Familiapi tantakuyta ¿kusikunapaj jina ruwawajchu?

Brasil suyumanta uj tata nin: “Familiapi Diosta Yupaychanapaj tantakuy may sumaj kajtenqa, tiempoqa uj ima jina ripun”, nispa. Japonmanta uj tataqa, 10 watayoj wawan, familiapi Diosta yupaychashaspa tiempo pasasqanta mana reparasqanta nin, yachakullaytapunitaj munasqanta ima. ¿Imaraykú? Chay tata nin: “Wawayqa chay tantakuywan miskʼirichikun, chayraykutaj mayta kusikun”, nispa.

Chaywanpis mana tukuy wawaschu, familiapi Diosta yupaychanapaj tantakuywan miskʼirichikunku. Chaymanta parlaspa Togo suyumanta uj tata nin: “Jehová Diosta yupaychayqa mana saykʼuchinapaj jinachu kanan tiyan”, nispa. Chay tantakuy saykʼuchinapaj jina kajtenqa, ichá mana miskʼichikunapaj jinachu ruwakushan. Isaiasqa, samarikuna pʼunchay kusikunapaj kasqanta nerqa, ashkha familiasqa, familiapi Diosta yupaychanapaj tantakuy kusikunapaj jinallataj kanan kasqanta reparanku (Isa. 58:13, 14).

Chayrayku cristiano tatasqa, chay tantakuywan familian miskʼirichikunankupaj jinapuni, wakichinanku kasqanta reparanku. Ralfqa kinsa warmi wawasniyoj, uj qhari wawayoj ima. Pay nin: “Familiapi Diosta yupaychanapaj tantakuytaqa, tukuyniyku parlarikunaykupaj jina, miskʼirichikunaykupaj jinataj wakichini”, nispa. Chaywanpis chay tantakuytaqa, mana familiapi sapa ujta miskʼirichinapaj jina wakichiyta atikullanchu. Uj mama nin: “Chay tantakuytaqa mana miskʼirichikunapaj jina ruwayta atillanichu, mayta munaspapis”, nispa. ¿Imaynatá tatas chay chʼampayta atipankuman?

TUKUY IMAYMANAMANTA RUWANA

Alemaniamanta iskay wawasniyoj uj tataqa nin: “Tatasqa tukuy imaymanamanta wawasman yachachina tiyan”, nispa. Iskay wawasniyoj Nataliataj nin: “Familiapi Diosta yupaychanapaj tantakuytaqa tukuy imaymanamanta ruwayku, chaytaj mayta yanapawayku”, nispa. Wakin familiasqa chay tantakuypi mana uj yachachiyllamantachu parlarinku. Brasilmanta iskay wawasniyoj Cleiton nin: “Chay tantakuypi uj yachachiyllamanta mana parlasqaykoqa sapa ujniykuta astawan yachakunaykupaj yanapawayku”, nispa. Wawas tukuy edadniyoj kajtinku allin kanman sapa ujninkupaj imatachus yachakuyta munasqankuman jina chay tantakuyta wakichina. Chayrayku tatasqa sapa uj wawankupi tʼukurinanku tiyan, imaynatachus, imamantachus yachachinankupi ima.

¿Imaynasmantataj wakin familias chay tantakuyta ruwanku? Wakenqa Jehovaman takispa qallarinku. Mexicomanta Juan nin: “Ajinata qallareyqa, kusisqa kanapaj, sumajta yachakunapaj ima yanapan”, nispa. Familianqa chay tantakuypi imamantachus yachakonqanku chayman jina, takiykunata ajllan.

Wakin familiasqa tantakuyninkupi Bibliapi parlaj runaspis kankuman jina leerinku. Japonmanta uj tataman qallariypi chayta ruwayqa mana allinchu rijchʼarqa. Chaywanpis iskaynin wawasnin kusikorqanku tatasninkuta kusisqata rikuspa chayta ruwasqankumanta. Wakin familiastaj, Bibliapi parlaj ñaupa tiempomanta runas jina pʼachallikunku, dramasta jina wakichinankupaj. Sudafricamanta iskay wawasniyoj Roger nin: “Bibliamanta imatachus tatas mana reparaykuchu chaykunata wawasqa reparanku”, nispa.

Allin kanman familia jina imatapis ruwana. Wakin tatasqa wawasninkuwan Noej arcanta jina chayri Salomonpa templonta jina ruwanku. Chaypajtaj Bibliata astawan ukhunchanku, kusiytataj tarinku. Asiapi phishqa watitayoj imillita, tatasnin, abuelitan ima, apóstol Pabloj purisqasninpi yuyaychakuspa uj pujllanata jina ruwarqanku. Chayman rijchʼakojllatataj wakin familiaspis Éxodo libroj nisqasninmanta ruwanku. Togo suyumanta 19 watasniyoj Donald kayta nin: “Familiapi Diosta yupaychana tantakuypi tukuy imaymanamanta yachakusqaykoqa, mayta kusichiwayku”, nispa. Chay tantakuy astawan miskʼirichikunapaj jina kananpaj, ¿imatawan ruwasunman?

WAKICHIKUNAPUNI

Familiapi Diosta yupaychashaspa sumajta yachakunapajqa, tukuyninku wakichikunanku tiyan. Wakin kuteqa chay tantakuywan waynas saykʼunkuman, chayrayku tataqa sumajta tʼukurinan tiyan imamantachus yachachinanpi, wakichikunanpajtaj tiempochakunan tiyan. Uj tata nin: “Sumajta wakichikojteyqa, tukuypis chay tantakuywan mayta miskʼirichikunku”, nispa. Alemaniamanta uj tataqa, familianman willarin ñaupajmantaña imasmantachus qhepan semanaspi yachakunankuta. Benín suyupitaj, uj tata 6 wawasninwan familiapi Diosta yupaychashaspa wakin kutis uj videota qhawanku. Allinta wakichikunankupajtaj, chay tataqa ñaupajmantaña tapuykunata uj listata jina qon. Cheqamantapuni tukuyninku sumajta wakichikojtinkoqa, chay tantakuy miskʼirichikunapaj jinapuni kanqa.

Imamantachus yachakunankuta ñaupajmantaña yachaspaqa, semanantinpi chaymanta familiaqa parlarinman, ajinamanta chay tantakuyta kusiywan suyakonqanku. Chay tantakuypi sapa uj ima yachachiyllamantapis parlarejtinkoqa, paykunapajpuni chay tantakuy kasqanta yuyanqanku.

MANA SAQESPA RUWANA

Ashkha familiasqa, chay tantakuyta sapa semana mana ruwayta atillankuchu.

Ashkha tatasqa, familiankurayku ashkhata llankʼanku. Mexicomanta uj tataqa sutʼiyayta llankʼaj rin, chʼisiyaykuytataj kutinpun. Chay tantakuytaqa, jatun tantakuy kajtillan chayri qotuchakuyman waturej hermano jamojtillan waj pʼunchaypi ruwakunman.

Chay tantakuytaqa mana saqespa ruwananchej tiyan. Togomanta, 11 watayoj imillita Loïs sutiyoj nin: “Wakin kutis familiapi Diosta yupaychanapaj tantakuyta horanpi mana qallarejtiykupis, chay tantakuytaqa ruwaykupuni”, nispa. Chay tantakuyta mana saqespa ruwanapajqa, semana qallariypi ruwayta atisunman, jinamanta ima kajtinpis chay semanamanta waj pʼunchaypi ruwanapaj.

Familiapi Diosta Yupaychanapaj Chʼisipeqa, Jehová Diosta yupaychanchej. Chayrayku tatas mayta kallpachakuychej Jehovata familiaykichej sapa semana “yupaycha[nanpaj]” (Ose. 14:2). Chay tantakuytaqa, kusikunapaj jina ruwaychej, imaraykuchus “Diospa kusikuynenqa kallpachawanchej” (Neh. 8:9, 10).