Imaynatá edificiospi ‘tukuyman willayta’ atisunman
1. ¿Imatawantaq niyta munan ‘allin willaykunata tukuyman willay’?
1 Apóstol Pablo ‘allin willaykunata tukuyman willayta’ munarqa (Hech. 20:24, NM). Ñuqanchikpis payjina ruwayta munanchik. Chayrayku tukuy imata ruwanchik allin willaykunata tukuyniqpi willanapaq, chaytaq niyta munallantaq edificiospi willananchikta. Edificiospiqa may chhika runas kanku, chaypi Diosmanta willariyqa may sumaq kanman, chaywanpis chay runasman chayayqa mana atikullanchu. ¿Imaptintaq?
2. Edificiospi, ¿imaptintaq yuyaywan, sumaqta qhawarikuspa ima, willananchik tiyan?
2 Imaptinchus kunanqa suwas, saqra runas ima astawan rikhurinku, chayraykutaq may chhika edificiospiqa punku yaykunata llavenku, guardiasta, cámaras de seguridad nisqata ima churanku (2 Tim. 3:1, 2). Chantapis wakkunaqa chay guardiasman kamachinku, mana pillatapis yaykuqta saqinankupaq. Chayri ichá edificiopi kamachiq ripunanchikta mañawasunman, astawanpis chaypi juk kawsakuq chayta niptinqa. Chayrayku yuyaywan, sumaqta qhawarikuspa willananchik tiyan.
3. ¿Maykʼaqtaq edificiospi waliq kanman Diosmanta willariy, chantá imaptintaq?
3 Maykʼaqtaq willaq risunman. Edificiospi, ima horapichus runasta tariyta atisunman chaypi risunman. Mana wasisninkupi kaptinku risunchik chayqa, pantasqata yuyayta qallarinkuman. Achkha hermanosqa llamkʼana tukukuynin horapi rinku chantapis sábados, domingos tardesninpi. Sutʼiyaymanta willaq riyqa, sábado chayri domingo mana waliqchu kanman, imaptinchus chay edificiospi, pichus kamachiqman mana yaykuqta saqinawanchikta mañankuman.
4, 5. Edificiop punkun llavesqa kaptin, ¿imaynatá willarisunman?
4 Imaynatá yaykusunman. Edificiopi kamachiqwanqa ama parlaychu nitaq chaypi llamkʼaqkunawan, niraq willayta qallarichkaspaqa. Juk edificio llavesqa kaptinqa, timbre nisqata ñitʼiwaq uyarinasunkupaq, ajinamanta maskʼawaq pichus uyariyta munaqta, chay edificioman yaykunaykipaq. Ichapis yaykuyta atispaqa chay runawan parlariyta tukuytawan, wak punkustañataq takayta atiwaq. Wakin kutitaq, waliq kanman lluqsipunayki watiqmanta wak timbretañataq ñitʼinaykipaq. Machkha timbrestachus chay runaswan parlarinaykipaq ñitʼinaykitaqa, yuyaywan qhawarikunayki tiyan.
5 Wakkunaqa timbreniqta tapuriwanchik imapaqchus waqyarisqanchikta. Jina kaptinqa kʼachamanta sutinchikta willana kanman. Sutinmanta parlarina wasiyuqta timbrepi sutin kaptinqa. Pisillapi willariwaq imamantachus parlariyta munasqaykita. Wakin hermanosqa, imaynatachus parlariyta qallarinankupaqqa, kay Razonamiento libromanta usqhayllata ñawiripunku.
6. Juk edificiopi portero kaptin, ¿imatá ruwasunman?
6 Edificiopi portero kaptin, manataq yaykuqta saqiwaptinchikqa paywan parlariyta atisunman. Imaptinchus may chhika publicacionesninchikta ñawiriyta munanku. Ichá Bibliamanta yachachiyta qallariwaq, edificiop yaykunallanpi. Portero juk wasita waturikunaykita saqisuptinqa, mana waliqchu kanman qamllamanta wak punkusta takanayki.
7. Bolsata chayri maletinta apanamanta, ¿imatataq yuyarikunanchik tiyan?
7 Pʼachallikuyninchik, puriyninchik ima. Mana wakkuna manchikuywan qhawanawanchikpaq, allin kanman mana jatun bolsayuq chayri maletinniyuq rina, chayri mana apanachu kanman. Wakin willaqkunaqa sillpʼa carpetapi pisi publicacionesta apanku, Bibliatataq makinkupi chayri bolsillonkupi apanku.
8. ¿Imaynatá edificiospi qutus willasunman?
8 Kikillantataq nisunman kaymanta, mana waliqchu kanman may chhika tantakuna edificiop yaykunanpi, nitaq maypichus autosninkuta jallchʼanku chaypi. Chantapis, maypichus saqra runas kanku chaypi sumaqta qhawarikunanchik tiyan (Pro. 22:3). Ichá tawa chayri suqtalla, juk pisopi mana karunchanakuspa willankuman, chantapis iskay juk punkuta takaptinkuqa wakin hermanosqa suyankuman tukunankukama chantá paykunañataq takarinkuman wak punkuta.
9. ¿Imaynamanta kʼacha runas kasqanchikta rikuchinchik? ¿Imaptintaq chayta ruwananchik tiyan?
9 Edificioman yaykuspaqa, zapatosniykita picharikuy, punkutataq sumaqta wisqʼay. Chayta ruwaptinchikqa, edificiopi kawsakuqkunaqa mana qhasillamantaqa phiñakunqankuchu. Ukhupiña kaspaqa, usqhayllata ascensor nisqaman riy, chayri ima pisomanchus richkanki chayman, ama qhipakuychu edificiop yaykunanpiqa. Ajinamanta guardiasqa ni ima pantasqata yuyanqankuchu.
10. ¿Imaynamanta juk pisopi, mana wasiyuqkuna phiñakunankupaq willasunman?
10 Edificiopi pillawanpis parlasqanchik, imatachus nisqanchik ima, ichá wakkuna uyarinankupaqjina kanman. Chayrayku mana sinchitachu parlananchik tiyan, manaqa uyarinawanchikpaqjinalla. Wak hermanoswan parlaspaqa sutʼita parlay, ama thutuspallachu, jinamanta wakkunaqa mana pantasqata yuyanqankuchu. Wakkuna mana punkumanta punku rinkuchu, manaqa juk punkuta takaspa wak karu punkumanñataq rinku, ajinamanta mana chay pisopi kawsakuqkunata phiñachinkuchu. Chantapis kallpawan punkuta takaqtinchikqa, wasiyuqkunaqa mancharikunkuman.
11. Wasi ukhumanta rikumunankupaq kaptinqa, ¿imaynamanta paykunaman willarisunman?
11 Wasinku ukhumanta rikumunasunkupaqjina kaptinqa, qam, compañeroyki ima sutʼita rikuchikuychik. Maymantachus qhawamunku chayta qhawariy, pillapis qayllaykamuptin napaykuy kʼachamanta, paywantaq parlariyta qallariy. “¿Pitaq?” nispa tapuptintaq, waliq kanman sutiykita, compañeroyki sutintapis willarinayki. Ichá ajinamanta mana manchachikuspa punkunta kicharisunqa. Mana ajina kaptinpis punkullamanta willarisunman.
12. Publicacionesta punku urapi saqispa, ¿imata ruwasunman mana pipis phiñakunanpaq?
12 Mana wasipi kaptinku. Edificiopi llamkʼaqkunaqa, willayta tukuptinchik may chhika papelesta uqharinanku kaptin phiñakunku. Publicacionesta punku urapi saqispaqa, mana qunqanachu wasi ukhumanpuni yaykunanta, ajinamanta mana qʼupajinachu qhipakunqa.
13. ¿Imatá ruwasunman wasiyuq phiñakuptin?
13 Wasiyuq phiñakuptin. Wasiyuq phiñakuptin, ichá guardia nisqata waqyaptin, waliq kanman ripunayki, wak kutipi kutirinaykipaq. Mana guardias phiñakunankupaq ichá waliq kanman edificiomanta ripuna. Kay runaswan tinkuspaqa, sumaq kanqa qillqana ima wasichus karqa, ajinamanta mana watiqmanta hermanos chayman rinankupaq. Chantá ancianos qutuchakuymanta, chay wasista watiqmanta waturikunkuman ichapis juktawan manaña kutinapaq.
14, 15. Edificiopi llamkʼaqkuna ripunanchikta mañawaptinchik, ¿imatá ruwasunman?
14 Ripunanchikta mañawaptinchik. Edificiopi willachkaptinchik, ichá guardia, pichaqkuna, allinchaqkuna chayri pillapis ripunanchikta mañawaptinchik, usqhayllata ripuna kanman. Ni imarayku paykunawan rimanakuyta munanchikchu, ichá paykunaqa abogadoswan chayri policiawan japʼichiwasunman. Edificiospi llamkʼaqkunaqa mana Jehovamanta sutʼinchaqkunawanchu churanakunku, manaqa imatachus ruwanallankuta ruwachkanku.
15 Atikuptinqa pichus niwanchik ripunanchikta, payman yuyaywan, munakuywan ima sutʼincharisunman imaraykuchus chaypi runasta waturikuq risqanchikta (1 Ped. 3:15). Edificiopi jarkʼasqas, kusisqas ima kasqankuta, allinpaq qhawasqanchikta nisunman, ichá jinata parlariptinchik qhipakuyta atisunman, mana ajina kaptinrí usqhayllata ripuna. Atikunman chayqa edificio yaykunapi mesa patapi publicacionesta saqiriyta atinsunman chayri buzones nisqapi (Col. 4:6). Kay chʼampaykunasmanta superintendente de servicio nisqaman willarina tiyan.
16. Mana edificioman yaykuyta atispa, ¿imatá ruwasunman?
16 Pisi tiemponman, ichá chay edificioman watiqmanta kutirisunman. Mana ni imaynamanta willanapaq yaykuy atikuptinqa, wakjinamanta paykunaman parlayta atisunman, ichá telefononiqta chayri cartasta qillqaspa. Wakin willaqkunaqa ñanpi, edificiop qayllanpi paqarinpi, tardenpi ima willanku, edificiopi kawsakuqkuna llamkʼayninkuman richkaptinku chayri wasinkuman kutipuchkaptinku parlarinankupaq.
17. ¿Imaptintaq willananchikpuni tiyan edificiospi?
17 Kay Pachap tukukuynin qayllapiña kachkan, pikunachus Jehovap sutinta uqhariqkunalla salvakunqanku. Chaywanpis, “imaynatataj sutinta oqharenqanku, mana paypi creespari? Imaynatataj creenqanku, paymanta mana uyarispari? Imaynatataj uyarenqanku, paykunaman mana pipis willajtinri?” (Rom. 10:13, 14.) May chhika “wiñay kawsaypaj ajllasqa kajkunaqa”, edificiospi kawsakunku (Hech. 13:48). Sumaq yuyaywan, sumaqta qhawarikuspa ima, chay runasman willayta atisunman.