Dioslla kamachishajtenqa tukuy ima ujchasqa, allintaj karqa.

¿Imaraykutaj Diospa Gobiernonta necesitanchej?

Qallariypeqa Jehová Dioslla Gobierno karqa, sumaj gobiernotaj karqa. Chayrayku Diosqa runas tiyakunankupaj Edenpi uj kʼacha huertata ruwarqa. Chay huertapeqa ashkha mikhuna karqa. Chantapis sumaj llankʼayniyoj karqanku (Génesis 1:28, 29; 2:8, 15). Diosllapuni gobernanawanchejta saqesunman karqa chayqa, tukuy runas kusisqas kausakushasunman karqa.

Evaqa mana mikhunanku poqoyta Adanman qoshan, Adantaj chayta japʼishan. — Adanwan Evawanqa Diosta kamachejninkuta jina qhesacharqanku.

Bibliaqa nin uj sajra ángel Diospa Gobiernonman churanakusqanta. Paytataj Kuraj Supay Satanás sutiwan rejsikun. Satanasqa nerqa runas kusisqa kausakunankupaj mana Dios gobernanantapunichu necesitasqankuta. Adanwan Evawantaj Satanaspa llullakusqanta creespa, paywan khuska Diospa contranpi sayaykorqanku (Génesis 3:1-6; Apocalipsis 12:9).

Adanwan Evawanqa Jehová Diosta kamachejninkuta jina qhesachasqankurayku paymanta karunchakorqanku. Paraisomantapis qharqochikamorqanku, manañataj wiñaypajchu kausakorqanku (Génesis 3:17-19). Chaymantapachataj runasqa juchasapas kanchej, wañunchejtaj. Chayrayku Bibliaqa nin Adanpa juchanrayku ‘jucha kay mundoman yaykumusqanta, jucharaykutaj wañuypis kasqanta’ (Romanos 5:12). Chantapis waj llakiypi rikukullanchejtaj. “Runaqa runa masinta chakisnin uraman churan paypa mana allinnillampaj” (Eclesiastés 8:9). Arí, runaslla gobernanakojtinkoqa problemas kallanqapuni.

RUNA GOBERNAYTA QALLARIN

Nimrodqa payllapis runa kanman jina sayashan. Wasa ladonpitaj runasqa uj torreta sayachishanku. — Nimrodqa Diospa contranpi sayaykorqa.

Biblia nisqanman jinaqa Nimrod sutiyoj runa jallpʼapi kamachiyta qallarerqa. Payqa Diospa kamachiyninman churanakorqa. Chaymantapacha, gobiernosqa atiyniyoj kasqankurayku munasqankuta ruwanku. Chayrayku 3 mil watas ñaupajta jinaña rey Salomón nerqa: “Jinallataj rikorqani wajcha runaspa waqasqankuta, manataj pipis sonqochaykurej kasqantawan. Enemigosninkoqa may atiyniyoj karqanku, nitaj pipis paykunata sonqochaykurej karqachu”, nispa (Eclesiastés 4:1).

Kunankamapis ajina llakiyllapuni. Kay 2009 watapi Naciones Unidasmanta uj willay nisqanman jinaqa, runas sapa kuti astawan cuentata qokunku mana allin gobiernos gobernasqankurayku “kausay astawan sajrayashasqanta”.

¿IMATÁ DIOS RUWANQA?

Runasqa necesitanchej sumaj gobiernosta, sumajta gobernanankutataj. Diostaj chay jina gobierno kananta nin.

Fotos: Runa kamachisqanrayku kaykuna tiyan. 1) Asiamanta uj warmi uj chʼichi callepi wawitan japʼirisqa kashan, wawantaj manchayta waqashan. 2) Uj awelito hospitalpi kashan. 3) Soldados guerrapi kashanku. 4) Ashkha runas marchata ruwashanku. 5) Uj warmi imillitanwan wasi punkunkoj ventananta pʼakisqata taripanku. 6) Uj llajta qʼoshñi juntʼa kashan, ashkha chʼipasqa cablesniyojtaj. — Ni mayqen sumaj gobiernopis runaj llakiyninta chinkachiyta atinchu.

Chaypajtaj Diosqa Gobiernonta sayarichin. Chay Gobiernotaj tukuy gobiernosta jallpʼamanta chinkachenqa, ‘wiñaypajtaj sayanqa’ (Daniel 2:44). Ashkha runastaj chay Gobierno jamunanta mañakunku (Mateo 6:9, 10). Jinapis chay Gobiernopeqa mana Dioschu gobernanqa. Astawanqa chay gobiernopi gobernananpaj wajta ajllarqa. Payqa jallpʼapi runa jina tiyakorqa. ¿Pitataj ajllarqa?