Diospa Gobiernonta kunan maskʼana
Uj terremoto kananpi piensarina. Autoridadesqa kayta ninkuman: “WASIYKICHEJMANTA LLOJSIYCHEJ. PAKAKOJTAJ AYQEYCHEJ”, nispa. Chayta uyarispaqa chay rato waj ladoman ayqekusunman, ¿icharí?
Chay “terremotopi jina” tukuy runas aswan qhepaman rikukusun. Chaytataj Jesusqa “manchay ñakʼariy” nispa suticharqa (Mateo 24:21). Chay llakiymanta mana ayqekuyta atispapis, pakakuyta atinchej. ¿Imatá chaypaj ruwasunman?
Jesucristoqa Orqopi Yachachishaspa kayta ruwananchejta nerqa: “Ñaupajtaqa Diospa Gobiernonta, cheqan kaynintawan maskʼallaychejpuni”, nispa (Mateo 6:33). ¿Ima niyta chaywan munasharqa?
‘Ñaupajtaqa Diospa Gobiernonta maskʼallaychejpuni’. Kayqa niyta munan Diospa Gobiernon tukuy imamanta aswan importante kasqanta (Mateo 6:25, 32, 33). Chayta ninchej, imajtinchus runasqa mana atinchejchu problemasta chinkachiyta. Chaytaqa Dioslla chinkachiyta atin.
‘Diospa cheqan kayninta maskʼallaychejpuni’. Chaytaj niyta munan Diospa kamachiykunasninta, yuyaychaykunasninta ima kasukuna kasqanta. Imajtinchus yuyasqanchejman jinalla imatapis ruwajtinchejqa, llakiyllapi rikukusun (Proverbios 16:25). Chaywanpis Jehová Diospa kamachiykunasninta kasukuspaqa, payta kusichisun, allintaj riwasun (Isaías 48:17, 18).
¿Imaraykutaj Jesús nerqa “ñaupajtaqa Diospa Gobiernonta, cheqan kaynintawan maskʼallaychejpuni” nispa? Imaraykuchus wakin runasqa yuyashankuman karqa waj imaspi, ashkha qolqeyoj kaspa kusisqa kausakunankupi ima. Wakintaj anchata llakikushankuman karqa necesitasqankuta tarinankumanta. Jinamanta mana tiemponku kanmanñachu karqa Diospa Gobiernonta maskʼanankupaj (Mateo 6:19-21, 25-32).
Chaywanpis, Jesús nerqa Diospa Gobiernonta ñaupajman churajkunaqa ni imamanta pisichikunankuta, aswan qhepamantaj may chhika bendicionesta japʼinankuta (Mateo 6:33).
Jesuspa discipulosnenqa Diospa Gobiernonta, cheqan kaynintawan maskʼajtinkupis, sajra imas kasqanta rikullarqankupuni. Jinapis paykunaqa sajra imasmanta jarkʼasqa jina karqanku.
Paykunaqa Diospa kamachiykunasninta kasukusqankurayku, Diosta mana kasukojkunamanta nisqaqa pisi llakiyniyojlla karqanku. Paykunaqa Diospa Gobiernon jamunantapuni creerqanku, chaytaj yanaparqa sinchʼi llakiykunapi rikukojtinku. Diostaj paykunaman qorqa ‘may sumaj atiyta’ problemasninkuta atipanallankupajpuni (2 Corintios 4:7-9).
DIOSPA GOBIERNONTA ÑAUPAJTA MASKʼAY
Jesuspa tiemponmanta cristianosqa, Jesús kamachisqanman jina Diospa Gobiernonta ñaupajta maskʼarqanku. Chayrayku maypichus tiyakorqanku chaypi, Diospa Gobiernonmanta sumaj willaykunata willarqanku (Colosenses 1:23). Kay tiempopirí, ¿pikunataj Diospa Gobiernonmanta willashanku?
Jehovaj testigosnin. Paykunaqa yachanku Diospa Gobiernon tumpamantawan sajra kausayta chinkachinanta. Chayrayku mayta kallpachakushanku Jesuspa nisqanta kasukunankupaj. Jesús nerqa: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa (Mateo 24:14).
¿Imatataj ruwanki Diospa Gobiernonmanta sumaj willaykunata willarisojtinku? Chaypajqa ñaupa tiempo Macedoniamanta Berea llajtayoj runas jina ruwawaj. Paykunaqa apóstol Pablo Diospa Gobiernonmanta sumaj willaykunata willashajtin, “tukuy sonqo japʼikorqanku”. “Diosmanta Qhelqasqatataj sapa día allinta leej kanku, jinachus manachus kasqanta yachanankupaj”, chayman jinataj kausakorqanku (Hechos 17:11, 12).
Qanpis paykuna jina ruwawaj. Diospa Gobiernonta, cheqan kaynintawan ñaupajta maskʼajtiykeqa, kay tiempopi allinta kausakunki, aswan qhepamanpis ajinallatataj wiñaypaj kausakunki.