Diosmanta willayqa, kallpachawanchik
1. ¿Imastá Diosmanta willamuspa tarinchik?
1 Jehová Diosta kusichiyta munasqanchikrayku, allin willaykunata willamullanchikpuni. Chantapis, “Diospa Palabranta willaraypuni” nisqa kamachiyta kasukuspaqa, Diospa bendicionninta japʼinchik, kallpachakunchik, aswan kusisqastaq kanchik (2 Tim. 4:2; Isa. 48:17, 18). Diosmanta willamuy, ¿imaynatá kallpachawanchik, kusichiwanchik ima?
2. ¿Imaynasmantá Diosmanta willamuspa kallpachakunchik?
2 Kallpachawanchik, bendicionestataq apamuwanchik. Diosmanta willamuspaqa, Reinop bendicionesninpi astawan tʼukurinchik, chʼampaykunallapi tʼukurinanchikmantaqa (2 Cor. 4:18). Chantapis, wakkunaman Bibliamanta yachachispaqa, Diospa nisqanpi iñiyninchikta kallpachanchik, chiqa yachachiytataq, astawan munakunchik (Isa. 65:13, 14). Jinallataq, juk runata, Diosta riqsinanpaq, ‘kay saqra pachamanta’ tʼaqakunanpaq ima, yanapayqa, ñuqanchiktapis, kay saqra pachamanta tʼaqasqallapuni kananchikpaq kallpachawanchik (Juan 17:14, 16; Rom. 12:2).
3. ¿Imaynamantá Diosmanta willamuy, kʼacha kaykunata kawsayninchikpi wiñachinapaq yanapawanchik?
3 Diosmanta willamuq riyqa, kʼacha kaykunata kawsayninchikpi wiñachinapaq yanapawanchik. Sutʼinchanapaq, runas “imaynachus kasqankuman jina tuku[spaqa]”, astawan llampʼu sunquyuq kayta yachakunchik (1 Cor. 9:19-23). Runasta ‘saqirpayasqa ovejastajina’ qhawaspaqa, paykunamanta khuyakunchik, yanapaytataq munanchik (Mat. 9:36). Mana chayllachu, runa mana uyariyta munawaptinchik, churanakuwaptinchik ima, willamullaptinchikpuniqa, kusiyninchik wiñan, aswan sinchita sayanapaqtaq kallpachawanchik (Hech. 20:35).
4. ¿Imatá Diosmanta willamuymanta niwaq?
4 ¡May bendecisqapuni kanchik! Imaraykuchus, willamuq rispaqa, Jehová Diosta jatunchanchik, kallpachakunchik ima. Arí, ‘allin willaykunata tukuyman willanankupaq’ kallpachakuqkunaqa, achkha bendicionesta tarinku (Hech. 20:24, NM).