Qharisman Diosmanta willananchikpuni tiyan

1. Diospa llaqtan wiñachkasqanrayku, ¿imataq necesitakun?

¹ Kay pʼunchaykunapi Diospa llaqtan wiñachkallanpuni, chayrayku qharis necesitakun, qutuchakuyta apaykachanankupaq (Mar. 4:30-32; Hech. 20:28; 1 Tim. 3:1-13). Wakin kuti Reinomanta willaytaqa, warmis astawan uyarispa kasukunku, qharismanta nisqaqa. Wakin lugarespiqa, warmislla wawasninkuman Diosmanta, religionmanta ima yachachinku. Qharis sunqunkupi Diosmanta pisisqas kasqankuta reparakunankupaq, ñuqanchikwan khuska Diosta yupaychanankupaq ima, ¿imatá ruwasunman?

2. Pablo, Pedro ima, qharisman willasqankurayku, ¿pikunatawan yanaparqanku?

² Maskʼana tiyan. Familiamanta uma kaq, Diosmanta willayta uyarispa kasukun chayqa, kikillantataq familianpis ruwayta atinman. Sutʼinchanapaq, Pablowan, Silaswan carcelpi wiskʼasqas kachkaspa, carceleroman Diosmanta willarqanku. Chayraykutaq, carcelero, tukuy familian ima, bautizakurqanku (Hech. 16:25-34). Corinto llaqtapi, Pablo willasqanrayku, “sinagogapi kamachej Crispo creerqa Señorpi, tukuy familianwan” (Hech. 18:8). Chantapis Jehovaqa, Pedrota, Cornelioman willananpaq kacharqa, Cornelioqa batallonpi capitan, “Diosta manchachikoj, cheqanta ruwaj runa karqa”. Chantá Cornelio, familiaresnin, amigosnin ima, bautizakurqanku (Hech. 10:1-48).

3. Felipejina, mayqin ‘autoridadmantaq’ Diosmanta willayta atiwaq?

³ Qhari ‘autoridadesman’, Diosmanta willasqanchikqa, achkha runas yachanankupaq yanapanman (1 Tim. 2:1, 2, Mosoj Testamento 1985). Felipeqa, angelpa kamachisqanta kasukuspa, juk “Candace nisqa reinaj qhapaj kapuyninta waqaychaj” runaman Diosmanta willarqa. Felipeqa, chay runa “imachus profeta Isaiaspa qhelqasqampi kashan, chayta leeshajta” uyarirqa, chantá Jesusmanta allin willaykunata sutʼincharqa. Chay etiopiamanta runaqa, Jesuspa discipulonman tukurqa, llaqtanman kutipuspataq chay allin willaykunamanta runasman willarqachá. Chantapis, reinaman, kamachina wasipi llamkʼaqkunaman ima, allin willaykunata ichá willarqa, chay runasqa ichapis ni jaykʼaq chay willayta uyarinkumanchu karqa (Hech. 8:26-39).

4. Qharis allin willaykunata uyarinankupaq, ¿imastá ruwasunman?

⁴ Maypitaq, imaynatataq taripasunman. Qharis, pʼunchaypi llamkʼayninkuman risqankurayku, ¿ima horapitaq willaq rinanchik kanman? Ichá tardesninpi, chayri sabadospi, domingospi, feriadospi ima, willaq rinapaq kallpachakusunman. Maypichus vendenku chayman willaq rispaqa, ichá astawan qharisman willayta atisunman, imaraykuchus wasinkupi mana taripayta atinchikchu. Hermanospis llamkʼayninkupi, compañerosninkuman Diosmanta willanankupaq kallpachakunanku tiyan. Wasimanta wasi willachkaspa, maypichus achkhataña willanchik chaypiqa, allin kanman qharita waqyarichinanchik, paywan parlarinapaq.

5. Juk hermana Bibliamanta yachakuyta munaq qhariwan tinkuptin, ¿imatá ruwanan tiyan?

⁵ Juk hermana willaypi, Bibliamanta yachakuyta munaq qhariwan tinkuptin, yachachinanpaqqa, mana sapan kutinanchu tiyan. Manaqa, qusanwan chayri juk hermanowan, chayri hermanawan kutinan tiyan. Chay qhari, yachakullaytapuni munaptintaq, allin kanman juk wakichisqa hermano yachachinan.

6. Apóstol Pablojina “ashkha runasta Cristoman” pusamunapaq, ¿imatá ruwasunman?

⁶ ¿Imamantá parlasunman? Apóstol Pabloqa, pikunamanchus yachachinanpiraq tʼukuriq, chaymanjinataq yachachik, jinamanta “aswan ashkha runasta Cristoman” pusananpaq (1 Cor. 9:19-23). Ñuqanchikpis, qharis imasmantachus parlayta munasqankupi tʼukurinanchik tiyan, jinamanta allinta wakichikuspa parlariyta atisunchik. Sutʼincharinapaq, qharisqa tukuy ima wicharisqanmanta, suyuta sumaqta kamachinankumanta, familiankuta allinta jarkʼanankumanta ima, astawan llakikunku. Chantapis ichá tapukunku, ¿imapaqtaq kawsachkanchik? ¿Kay pachapaq imataq aswan qhipaman kanqa? ¿Imaraykutaq Dios ñakʼariy kananta saqin? Diospa Reinonmanta willarichkaspa, kaykunamantawan parlariyqa allinta uyarinawanchikpaq yanapawasun (Pro. 16:23).

7. Tantakuyman Diosta mana yupaychaq qusas jamuptinku, ¿imaynatá qutuchakuymanta hermanos yanapankuman?

⁷ ¿Imaynatá, Diosta mana yupaychaq qusasta yanapasunman? Hermanap allin ruwaykunata ruwasqanqa, ichá Diosta mana yupaychaq qusanta yanapanman, chaywanpis qutuchakuymanta hermanospis yanapayta atillankumantaq (1 Ped. 3:1-4). Tantakuyman hermana qusanwan jamuptinqa, kʼachamanta napaykusqanchikqa, Diosmanta yachakuyta munananpaq yanapanman. Jamusqanqa, Diosmanta yachakuyta munasqanta rikuchichkan, ichá Bibliamanta yachakuytapis munanqa.

8. Qusas Diosmanta tunpata yachakuyta munaptinku, ¿imaynasmanta qutuchakuymanta hermanos yanapayta atinkuman?

⁸ Wakin qharisqa mana chay ratochu Diosmanta yachakuyta munanku, chaywanpis pisimanta pisi, allinta riqsinakusqan hermanowan, ichá Bibliamanta yachakuyta munanman. Juk qutuchakuymanta, juk familiapiqa mana tukuyninkuchu Diosta yupaycharqanku, hermanostaq sapa kuti chay familiap wasinman rispa, Diosta mana yupaychaq qusawan imamantachus parlayta munaq chaymanta parlariq kanku. Ajinamanta Diosmanta parlayta qallariskanku, kunantaq chay qusaqa bautizasqaña. Juk hermano, Diosta mana yupaychaq qusata, wasinpaq cercata ruwaysisqa. Jinata hermano yanapasqanrayku, chay qusa Bibliamanta yachakuyta qallarisqa (Gál. 6:10; Fili. 2:4). Qharis kaqkuna, ¿Diosta mana yupaychaq qusasta yanapariyta atisunmanchu?

9. Qutuchakuymanta qharista wakichikuptin, ¿imaynasmanta paykuna yanapankuman?

⁹ Wakichina tiyan. Qharis Diospa Reinonmanta willayta uyarispa kasukunku chayqa, qutuchakuypi astawan llamkʼanankupaq wakichina tiyan, ichapis Dios chay qharista “regalostajina” churanman: ancianosjina imatachus ruwayta atisqankuwan, yachakusqankuwan ima, qutuchakuyta yanapanankupaq (Efe. 4:8, NM; Sal. 68:18). Chay qharisqa, Diospa llaqtanta kusiywan, tukuy sunqu ima, qhawanqanku (1 Ped. 5:2, 3). Chaytaq Jallpʼantinpi hermanospaq, ¡may sumaq bendicion kanman!

10. Ananías, Pablota yanapasqan, ¿imaynatá achkha runasta yanapan?

¹⁰ Saulomanta yuyarikuna, payqa “mana judio kajkunaman kachasqa apóstol” karqa, chaywanpis aswan ñawpaqtaqa cristianosta qhatiykacharqa (Rom. 11:13). Chayrayku Jesús, Ananiasta, Sauloman willaq rinanta niptin, Ananiasqa mana riyta munarqachu. Chaywanpis rirqa, ajinamanta chay yachakuqqa apóstol Pabloman tukurqa. Watas pasasqanmantaq Pablop willasqanqa, achkha runasta yanaparqa. Kunankamapis cartasninpi qillqasqanmantaqa yachakuchkallanchikpuni, imaraykuchus chay cartasqa Diospa yuyaychasqan Bibliapi kachkan (Hech. 9:3-19; 2 Tim. 3:16, 17).

11. Qharisman willamunapaq, ¿imaraykutaq tukuy imata ruway may allin kasqanta nisunman?

¹¹ Chayrayku, qharisman willamunapaq, tukuy imata ruwana. Mayta kallpachakuchkasqanchiktaqa, Jehová Dios bendecinqapuni, imaraykuchus munayninta ruwayta, llaqtan wiñananta ima, munanchik.