¿Imaynatá allinta kutichisunman?
1. ¿Imaraykutaq Jesusjina kutichinanchik tiyan?
1 Kunan tiemponchikkama, runaspa tapuykunasninkuman Jesús sumaqta kutichisqanmanta achkha runas tʼukuchkaq qhipakunku. Ñuqanchikpis runasman willachkaspa, tapuykunasninkuman sumaqta kutichinapaq Jesusmanta yachakusunman (1 Ped. 2:21).
2. Runaspa tapuykunasninkuman allinta kutichinapaq, ¿imatá reparananchik kanman?
2 Allinta uyarinachik. Jesusqa, imata yuyaspachus juk runa payta tapusqanta reparaq. Jesusjina juk runa imata yuyaspachus tapuwasqanchikta reparananchikpaq, ichá wak tapuykunata chay runaman ruwana kanman. Sutʼincharinapaq; ichá wakinqa imaraykuchus Navidadta mana ruwasqanchikta yachayta munaspa, tapuwasunman: “¿Qamkuna Jesuspi creenkichikchu?”, nispa. Imata yuyaspachus tapuwasqanchikta reparaspaqa, paykunaman allinta kutichiyta atisunchik (Luc. 10:25-37).
3. Sumaqta kutichinanchikpaq, ¿imastaq yanapawasunman?
3 Bibliap nisqanta ñawiripuna. Runaspa tapuykunasninkuman allinta kutichinapaqqa, Bibliap nisqanta ñawiripunanchik tiyan (2 Tim. 3:16, 17; Heb. 4:12). Razonamiento nisqa libro, chayri Traducción del Nuevo Mundo de las Santas Escrituras nisqa Bibliapi “Temas bíblicos para consideración” nisqa rikhuriqqa, Bibliamanta ima pʼititachus ñawiripuyta munasqanchikta tarinapaq yanapawasunchik. Bibliapi mana creeptinpis, kʼachamanta imatachus Bibliap nisqanta rikuchiytawan, Bibliap yuyasqanpi tʼukurinanta nisunman. Jesusjina runasman kutichispaqa, kutichisqanchik chay runapaq “qolqewan tʼikanchasqa qori manzana jina” kanqa (Pro. 25:11).
4. ¿Ima kutispitaq juk runap tapuyninman kutichiytapuni munay mana allinchu?
4 Kutichiytapuni munay, ¿allinchu? Juk tapuyman imatachus kutichiyta mana yachaspa, kutichiytapuni maskʼanaykimantaqa, aswan allin kanman kayta ninayki: “Mana yachanichu, chaywanpis tapuyniykipaq kutichiykunata maskʼaripusqayki, wak pʼunchay kutimuspataq sutʼincharisqayki”, nispa. Yanapayta munasqaykita reparaspaqa, ichá wak pʼunchay kutinaykita munanqa. Chaywanpis juk runa yachachisqanchikwan churanakuyta munaspalla chayri siminakuyta munaspalla Bibliamanta imatapis tapusuptinqa, Jesusjina ama tapuyninman kutichiytapuni maskʼaychu, astawanqa tiempoykita mana usuchinaykipaq, kʼacha runastataq maskʼanallaykipaqpuni, pisillata parlaytawan ripuy (Luc. 20:1-8; Mat. 7:6).
5. ¿Imatá Jesusmanta yachakusunman?
5 Jesusqa, chiqa kaqmanta willachkaspa runaspa tapuykunasninkuman sumaqta kutichinallanpaqpuni, Jehovapi atienekunan kasqanta yacharqa (Juan 18:37). Arí, ‘wiñay kawsayta tariyta munaqkunap’ tapuykunasninkuman allinta kutichinapaq Jesusmanta sumaqta yachakusunman (Hech. 13:48, NM).