Uyariqkunata tʼukurichina
1. ¿Imataq runasman allinta willananpaq yanapawasunchik?
1 ¿Imataq allinta willanapaq yanapawasunchik? ¿Runas ñuqanchikjina yuyanankuta munasqanchikchu? Mana. Apóstol Pabloqa, Tesalonicamanta judiosta sumaqta tʼukurichirqa, chayrayku “paykunamanta wakinkuna cree[ntesman tukurqanku]” (Hech. 17:2-4). Chaywanpis, ¿ima ninayantaq runasta tʼukurichiy?
2. Allin willaykunata willachkaspa, ¿imaynatá Pablojina ruwasunman?
2 Runa imatachus yuyasqanta yachananchik tiyan. Maypichus willanchik chaypi runasta tʼukurichinapaqqa, imatachus yuyasqankuta yachananchik tiyan. Pablo Areopagopi griesgowan parlarinanpaqqa, imatachus yachasqankumanta, imapichus creesqankumanta ima parlariyta qallarirqa (Hech. 17:22-31). Ñuqanchikpis willayman lluqsinapaq wakichikuchkaspa, runas imapichus creesqankuta, imaraykuchus mana uyariyta munawasqanchikta ima reparana (1 Cor. 9:19-22). Uyariyta mana munawaptinchik, ¿imatá ruwasunman? Imamantachus parlayta munasqankumanta parlarisunman.
3. Allin tapuykunata ruway, ¿imapaq yanapawanchik?
3 Tʼukurichinapaqjina tapuykunasta ruwana. ¿Nicharí pitapis maymanpis chayananpaq telefononiqta yanapayta atisunmanchu, maymanchus richkasqanta mana yachaspaqa? Jinallataq juk runata, imatachus yuyasqanta mana yachaspaqa, mana yanapayta atisunmanchu. Jesús niraq runasta tʼukurichichkaspa, imatachus yuyasqankuta yachananpaq tapuykunata ruwaq. Sutʼinchanapaq, Jesusta juk runa “imata ruwaspataj wiñay kawsayniyoj kasajri?”, nispa tapuptin, payqa kutichinanpaq, imaraykuchus jinata tapuchkasqanta allintaraq tʼukurirqa (Luc. 10:25-28). Wak kutipitaq Jesusqa, Pedrota pantasqata yuyachkasqanta reparachinanpaq, allin tapuykunata ruwarqa (Mat. 17:24-26). Chayrayku uyariqkuna imatachus yuyasqankuta niwaptinchik, pantasqata yuyaptinku ima, paykunata tʼukurichinapaq tapuykunata ruwana.
4. ¿Imaraykutaq runasta tʼukurichinanchik tiyan?
4 Pillatapis tʼukurinanpaq yanapachkanchik chayqa, Sumaq Yachachiq Jesusjina, ñawpa tiempomanta allin yachachiq cristianosjina ima ruwachkanchik. Chantapis uyariqkunata jatunpaq qhawachkanchik (1 Ped. 3:15). Ajinata ruwaptinchik, runasqa watiqmanta kutinanchikta ichá munanqanku.