Kʼacha runasta maskʼanallapuni
1. Cristop sutinpi willaqkunajina, ¿imatá ruwananchik tiyan?
1 Jesusqa, llampʼu sunqu runasman sumaq willaykunata willananpaq tukuy imata ruwarqa (Isa. 61:1, 2). Cristop sutinpi willaqkunajina, ñuqanchikpis kʼacha runasta maskʼayta munaspa, tukuy runasman willamunapaq tukuy imata ruwananchik tiyan (Mat. 10:11; 2 Cor. 5:20).
2. Tukuy runasman willananpaq, ¿imatá Pablo ruwarqa?
2 Tukuy runasman willananchikpaq tukuy imata ruwana. Apóstol Pabloqa, juk llaqtaman chayaspa judiospa sinagogankuman riq, judiosman, mana judío kaqkunamanpis evangeliomanta willananpaq (Hech. 14:1). Chaywanpis Filipos llaqtaman chayaspaqa, Diosmanta mañakuna kaq, chayman Silaswan rirqa, runasta maskʼanankupaq, chayman chayaspataq juk qutu warmisman Diosmanta willarqanku. Paykunamanta juknintaq, Lidia sutiyuq karqa, paytaq Pablop nisqanta tukuy sunqu japʼikurqa (Hech. 16:12-15).
3. ¿Ima lugarespitaq willayta atillasunmantaq?
3 Sumaq willaykunata tukuy runasman willananchikpaq, terminalespi, parquespi, callespi, plazaspi, mercadospi ima willasunman. Chantapis edificiospi tiyakuq runasman, chayri mayniqpichus guardias wasisman mana qayllaykuqta saqiwanchikchu chay wasispi tiyakuq runasman, cartaniqta, chayri telefononiqta, Diospa Reinonmanta sumaq willaykunata willallasunmantaq. Tukuy runasman willananchikpaq tukuy imata ruwaspaqa, “Señorpa ruwaynimpi” mana saykʼuspa llamkʼallasunchikpuni (1 Cor. 15:58).
4. Tukuy runasman willayta munaspa, ¿imatá wakin hermanos ruwanku?
4 Wakin hermanosqa, suyunkupi chayri wak suyupi, ima qutuchakuypichus pisi willaqkuna kanku chayman yanapaq ripunku. Wakinkunataq, wak qalluta parlayta yachakunku, chay qalluta parlaqkunaman Diospa Reinonmanta sumaq willaykunata willanankupaq.
5. Kay pachap tukukuynin qayllitapiña kasqanrayku, ¿imapi tʼukurinanchik tiyan?
5 Juk rikchʼanachinawan runasman yachachichkaspa Jesús nirqa: “Jallpʼaqa kay pacha”, nispa (Mat. 9:37; 13:38). Kay pachap tukukuynin qayllitapiña kasqanrayku, tukuyninchik imaynasmantachus runasman astawan willayta atisqanchikpi tʼukurinanchik tiyan. Jehová Diosninchikqa, Reinonta ñawpaqman churananchikpaq kallpachakuptinchik mayta bendeciwasunchik (Mat. 6:33).