Telefononiqta runasman willanapaq kallpachakuna
1. ¿Imaraykutaq telefononiqta runasman willayta munanchik?
1 Telefononiqta runasman willay may allin, imaraykuchus jinamanta chiqa kaqmanta yachakunankupaq, salvacionta tarinankupaq ima, runasta yanapayta atillanchiktaq (2 Ped. 3:9). Diospa Reinonmanta wasimanta wasi runasman willaspapis, wasinkupi mana kaqkunaman wak horariopi telefononiqta willayta munallanchiktaq (Mat. 24:14; Luc. 10:1-7; Apo. 14:6).
2. Telefononiqta willanapaq, ¿imaynatá wakichikusunman?
2 ¿Imaynatá wakichikusunman? Imaynatachus wasimanta wasi willanapaq territorios nisqata wakichikun, jinallatataq telefononiqta willanapaq territoriostapis wakichikun. Chayrayku telefononiqta willayta munanki chayqa, territorios nisqata mañakuwaq, sapallayki manaqa juk chayri iskay willaqkunawan telefononiqta runasman willanaykipaq. Mayniqmantachus willanki chaypiqa, mana chʼaqwa kananchu tiyan. Wakin hermanosqa, telefononiqta willanapaq qayllitapi juk Biblia, juk cuaderno, publicaciones ima kanan, may allin kasqanta ninku.
3. ¿Imaynatá telefononiqta willasunman?
3 Imaynatachus willanata. Reinomanta Willayninchik hojitapi, Razonamiento nisqa libronchikpi, Chiqa kaqta yachayta munawaqchu tratadopi ima, telefononiqta willanapaq sumaq yuyaychaykunata tarinki. Qallarinapaq imamantachus parlayta munasqaykita akllanayki tiyan, chantá ima tapuytachus ruwanaykita, Bibliamanta ima pʼititachus ñawirinaykita ima, akllanallaykitaq tiyan. Ima publicacionwanchus wasimanta wasi willakuchkan chay publicacionllawantaq willanayki allin kanman. Runaswan parlarichkaspa parlasqaykimanjinalla parlay. Ñawpaq kutillataraq telefononiqta willaqkunaqa, ichapis imatachus niyta munasqankuta juk papelmanta ñawiriyta munankuman, chaywanpis parlasqankumanjinalla ñawirinanku tiyan manataq juk papelmantapis ñawirichkankumanjinachu. Telefononiqta runaswan parlachkaspa kʼachamanta parlay, chantá imatachus kutichisusqanta allinta uyariy, kutichisusqantataq allinpaq qhawasqaykita niy. Telefononiqta librosta vendechkasqaykita mana yuyachinaykipaq, juk publicacionmanta parlaytawan ama sutʼinchaychu qullqita munasqanmanjina quyta atisqanta.
4. ¿Pikunawantaq telefononiqta parlayta atisunman?
4 Telefononiqtaqa, wasimanta wasi willachkaptinchik pikunachus unqusqas kasqankurayku wasinkumanta mana lluqsimuyta atiqkunawan, chayri llamkʼayninkurayku wasinkupi mana kaqkunawan wak horariopi parlayta atinchik. Chantapis mayniqpichus guardias, wasisman qayllaykuqta mana saqiwanchikchu, chay wasispi tiyakuq runasman telefononiqta willayta atillanchiktaq. Chayrayku Diospa Reinonmanta telefononiqta runasman willanapaq kallpachakuna.