Ashkha runas tiyan chaypi waj jinasmantawan willakonqa
1. ¿Imaynasmantataj ñaupa cristianos willaj kanku?
1 Ñaupa tiempopi cristianosqa, mana wasimanta wasillachu willaj kanku, manaqa maypichus ashkha runas tiyan chaypipis (Hech. 20:20). Sutʼinchanapaj, temploman rej kanku, ashkha runas chaypi kasqankurayku (Hech. 5:42). Apóstol Pablopis, Atenaspi kashaspa plazapi sapa pʼunchay yachachej (Hech. 17:17). Kunanpis sumaj willaykunataqa, wasimanta wasi astawan willanchej. Chaywanpis maypichá runa tiyan chaypipis willallanchejtaj, nisunman maypichus autosta saqenku chaypi, negociospi, parquespi, runamanta juntʼa callespi ima. Tukuyninchej maynejllapipis willayta atinchej, chaywanpis ashkhas iskaynejmantawan willayta atisun.
2. Kay 2011 noviembre killamantapacha, ¿imaynatá willakuyta qallarerqa?
2 Jatun llajtaspi waj jinamantawan willakushan. Anuario 2013 libro 16, 17 paginaspi sutʼincharqa jina, 2011 noviembre killamantapacha Nueva York llajtapi waj jinamantawan willakuyta qallarerqa. Ashkha runas purinku chay lugarespi, jatuchaj letrerosniyoj mesaspi, publicacionesta tiyachinapaj carritospi ima, tukuy laya qalluspi librosta, revistasta ima churakorqa. Ashkha runastaj chaykunata sapa pʼunchay rikorqanku, mana yaykojta saqekunchu chay edificiospi tiyakojkuna, mana wasinkupi sayajkunapis. Ajinata willasqankupi, may sumaj rerqa. Uj killallapi 3.797 revistasta, 7.986 librostawan runaman jaywakorqa. Chantapis ashkhas, Bibliamanta yachakuyta munasqankuta nerqanku. Chaypajpunitaj willakusqanrayku, yachakuyta munajkunaj sutinkuta, maypichus tiyakusqankuta ima qhelqaytawan, uj hermano yachachimunanpaj wasinku qayllapi qotuchakuykunaman apacherqanku.
3. ¿Maykunaspiwantaj Nueva York llajtapi jina willakushallantaj?
3 Jinata willasqankupi may sumaj risqanrayku, Jallpʼantinmanta jatuchaj llajtaspi kikinta ruwakushallantaj. Ñaupajtaqa, sapa sucursal mayqen llajtapichus willakunanta ajllan. Astawanqa may llajtaspichus ashkha runas puriykachanku chaykunata ajllanku, ichapis ashkha paradasniyoj chayri ashkha edificiosniyoj kasqanrayku. Chantá sucursalqa, chay willaypi yanapakunankupaj ajllasqa qotuchakuykunaman, kamachiykunata apachin. Chaypi willanankupaj precursores especialesta, regularesta ima astawan ajllakojtinpis, wakin kutisqa precursores auxiliarespis yanapakullankutaj.
4. ¿Imaynatá publicacionesniyoj mesaswan chayri carritoswan willanku?
4 ¿Imaynatá willakun? Publicacionesniyoj mesaswan chayri carritoswan willaj precursoresqa, runa paykunaman qayllaykunanta suyanku, chantá mayqen publicacionllatapis apakunanta ninku. Tapuykunasninkumantaj Bibliawan sutʼinchanku. Pillapis uj publicacionta apakuyta munan chaytaj, mana qolqeta churananta ninkuchu. Chaywanpis ima qolqewanchus Jallpʼantinpi willakusqanta tapukojtenqa, publicacionespi rikhurej direccionman qolqeta apachiyta atisqanta willanku. Sapa atikojtintaj tapurinku: “¿Bibliamanta wasiykipi yachachisunankuta munawajchu?” Chayri “Mana pagaspalla Bibliamanta yachakuyta, ¿munawajchu?”, nispa.
5. Publicacionesta tiyachispa willasqankumanta, ¿imatá uj qhariwarmi nin?
5 Publicacionesta mesapi chayri carritopi tiyachispa willayqa, mayta kusichikun. Uj qhariwarmi nerqa: “Publicacionesniyoj mesa qayllapi sayaspaqa, ashkha runasta pasajta rikuyku. Nikuykutaj: ‘Tukuy runas Diosmanta yachanankupaj maytapuni llankʼakushan’, nispa. Jehová tukuy chay runasmanta llakikusqanta reparayqa, sumaj willaykunata kausayniykupi ñaupajman churanallapajpuni kallpachawayku. Runas chaynejta pasajtinku, tʼukuriyku: ‘Jehovaqa imachus sonqonkupi kasqanta qhawaykushan, sumaj willaykunata japʼikunankupaj jinachus kasqankutapis’, nispa. Ni jaykʼaj jina angelespa yanapayninta reparayku”.
6. 1) ¿Imaynatataj wakin qotuchakuykuna maypichus ashkha runas purinku chaypi willashanku? Chantá, ¿imapitaj jatun llajtaspi willakusqanmanta waj jina? 2) Maypichus ashkha runas tiyan chaypi willanapaj, ¿imaynatá qotuchakuykuna yanapanakunanku tiyan?
6 Qotuchakuykuna jatuchaj llajtaspi jina willanapaj wakichinku. Jatuchaj llajtaspi imaynatachus willakushasqanta yachanchejña. Chaywanpis ashkha qotuchakuykunapi ancianosqa, maypichus qotuchakuyninku willan chaypi kikinta willakunanpaj wakichishallankutaj. Chaypajqa maynintachus ashkhas runas purinku chaypi, publicacionesta mesapi chayri uj carritopi tiyachinku. Chaywanpis jatun llajtaspi willakusqanmanta waj jina, imaraykuchus chaypeqa ashkha qotuchakuykunamanta hermanos yanapakunku, sucursal ajllasqan lugarpitaj (“Yanapanakuna tiyan”, nisqa recuadrota qhawariy).
7. Maypichus ashkha runas tiyan chaypi willamunapaj, ¿imaynatá ancianos wakichinku?
7 Ancianosqa qotuchakuyninku willan chaypi, publicacionesta mesapi manaqa carritopi tiyachinapaj jina lugar kanchus manachus chayta qhawarinku. Chantapis ajinata willakunan qotuchakuyninkupaj allinchus manachus kananpi tʼukurinku. Ichapis auto sayanaspi, plazaspi, parquespi, may callespichus ashkha runas purinku chaypi, jatuchaj tiendaspi, universidadespi, aeropuertospi, chayri maypichus ashkha runas tantakunku chaypi, publicacionesniyoj mesata chayri carritota churankuman. Allin kanman uj cheqallapi, kikin pʼunchaykunapi, kikin horaspitaj chayta ruwananku. Chantapis uj jatun tiendaj ñaupaqenpi churanankumantaqa, maypichus runa rantikuytawan ripunpacha, aswan allin kanman maypichus ashkha tiendas ujllapi tantasqa tiyan, chay ukhuman churananku. Wakin lugarespeqa, may juntʼa callespi jina, mesata churanamantaqa, uj carritollata churana kanman. Chaykunawan willakunanpaj, La Atalaya, ¡Despertad! revistasmanta, Enseña libromanta ima letrerosta wakichikun. Ancianostaj chaykunata Internetmanta uraqachiyta atinkuman. Chay willaypi yanapakojkunaqa, imaynatachus jatuchaj llajtaspi willakun ajinallatataj willanku. Chantapis superintendente de servicio nisqa hermanota kasukunku. Uj runa yachakuyta munajtin, manataj maypichus qotuchakuyninku willan chaypi tiyakunchu chayqa, usqhayllata Sírvase visitar (S-43) nisqa formulariota juntʼachinku. Chantá qotuchakuymanta secretarioman jaywanku.
8. Qotuchakuyninchej publicacionesniyoj mesata chayri carritota mana churajtinpis, ¿maypichus ashkha runas tiyan chaypi willasunmanchu? Sutʼinchay.
8 Ashkha runas tiyan chaypi tukuy willasunman. Ichá qotuchakuyninchej maypichus willan chaypi, publicacionesniyoj mesata chayri carritota churanapaj jina lugar mana kanchu. Jinapis maypichus ashkha runas kanku chaypi willayta atisunman. ¿Mayllapipis ashkha negocios kanchu? Ichapis uj tienda tiyan, maymanchus ashkha runas rinku. Manaqa ichá ashkha runas parqueman, plazaman chayri waj lugarman rinku. Chayri tiempomanta tiempo uj lugarpi tantakunku. Jina kajtin, chay lugarespi willayta atisunman.
9. ¿Imaraykutaj runaman mayllapipis willanapaj kallpachakunanchej tiyan?
9 Jehova Diosqa “munan tukuy runas salvasqa kanankuta, cheqa kajtataj rejsinankuta” (1 Tim. 2:4). Chayrayku niraj tukukuy chayamushajtin, Reinomanta sumaj willaykunata tukuy runaman chayachinanchejpaj kallpachakushanchej (Mat. 24:14). Ashkha lugarespi, runata wasinpi mana tariyta atillanchejchu. Chaywanpis ichá wajnejpi taripajtinchej, sumaj willaykunata uyariyta atenqa. Chayrayku mayllapipis runaman willanapuni. Jinamanta imatachus ruwananchejta allinta juntʼasunchej (2 Tim. 4:5).
[5 paginapi recuadro]
Yanapanakuna tiyan
Yachakusqanman jina, ashkha qotuchakuykunamanta hermanos uj cheqallapi willanku, nisunman kikin callespi, kikin auto saqenaspi, kikin negociospa chimpanpi, kikin paradaspi ima. Manaqa kikin suyakuna salaspi revistasta saqenku, chayri kikin vendejkunallamantaj willanku. Chayta waj horaspi ruwajtinkupis, runasta saykʼuchinku. Chayrayku maypichus ashkha runas tiyan chaypi willayta munaspaqa, qotuchakuyninku maypichus willan chayllapi willananku aswan allin.
Mayqen hermanollapis maypichus waj qotuchakuy willan chaypi willayta munan chayqa, ñaupajta qotuchakuyninmanta superintendente de servicio nisqawan parlarinan tiyan. Paytaj ujnin qotuchakuymanta superintendente de serviciowan parlarenqa. Waj qalluspi qotuchakuykuna kikin lugaresllapitaj willananku kajtenqa, runata mana saykʼuchinankupaj superintendente de servicio nisqa hermanos parlarikunanku tiyan. Yanapanakojtinkoqa, “tukuy imata allinta ruwa[nqanku], maychus kananta jina” (1 Cor. 14:40).
[6 paginapi dibujo/foto]
[6 paginapi dibujo/foto]