¿Imaynatá willasunman publicacionesniyoj carritoswan mesaswan ima?

Publicacionesniyoj mesaswan chayri carritoswan willayqa, ashkha runasta yanapashan cheqa kajmanta yachakunankupaj (Juan 6:44). Chayrayku ancianosta kallpachakorqa qotuchakuyninku willasqan lugarespi ashkha runas tiyan chaynejpi willayta wakichinankuta. Carritos apaykachanapaj jinalla kasqanrayku mana autoridadesmanta permisota mañakunanpunichu tiyan. ¿Pikunataj chaykunawan willankuman? Allin yuyayniyoj, maychus kajta pʼachallikoj, nitaj parlayta manchachikoj hermanoslla. Kunantaj qhawarisun imastachus ruwakunan kasqanta, imastatajchus mana. Chay yuyaychaykunaman jina ruwajtinchejqa, aswan sumaj willayninchejpi riwasun.

¿Imatá ruwana?

Chaynejta pasaj runaswan kʼacha kay, nitaj waj ladota qhawaykachashaychu. Kʼachamantataj chay runasta napaykuriy. Qhawaspa qhepakojmantaj, jinata niwaj: “Munaspaqa mayqellantapis aparikuy”.
Carritomanta maychus kajllapi sayay. Wakin lugarespi hermanosqa reparanku qayllallapi sayay aswan allin kasqanta, jinapis chayqa mana tukuynejpichu allin kanman. Jina kajtin aswan karitupi sayay allin kanman pillapis publicacionesta qhawarej chimpaykamunankama. Chay rato parlariyta qallariy jinata tapurispa: “¿Maykʼajllapis chayta tapukorqankichu?”.
Bibliata atikusqanman jina leeripuypuni.
Imaynatachus Bibliamanta yachachisqanchejta sutʼinchay Yachachin librota jina apakojman. Chantá mayqen aparatollapipis ¿Imaraykutaj Bibliamanta yachakuna? videota qhawarichiy.
Astawan yachakuyta munan chay, atikojtenqa maypichus tiyakusqanta tapuriy. Mana qotuchakuyniyki willan chaynejpi tiyakojtenqa, Persona que mostró interés (S-43) nisqa hojitata juntʼachiy, qotuchakuyniykimanta secretario nisqa ancianomantaj jayway.