Ashkha runas tiyan chaypi willayqa may sumaj
1. ¿Ima ruwanankupajtaj qotuchakuykunata kallpachakorqa?
1 Qotuchakuykunataqa ashkha runas tiyan chaypi, publicacionesniyoj mesaswan chayri carritoswan willamunankupaj kallpachakorqa. Carritowan willakushajtenqa, uj hermanollapis sayasqa chayri chukusqa chay carritoj ladonpi kanan tiyan. Publicacionesniyoj mesaswan willakushajtintaj, iskay willajkuna kananku tiyan. Kʼachas kanankupajtaj kallpachakunanku tiyan. Pillapis qayllaykamojtin, ujnin kaj willajqa ninman: “¿Maykʼajllapis tapurikorqankichu Biblia imatachus kay tapuyman kutichisqanta?”, nispa. Chantapis uj chayri iskay hermanos chay carritomanta mana ancha karupichu, willayta atillankutaj.
2. Publicacionesniyoj mesaswan willay, ¿imaynatá uj sipasta Bibliamanta yachakunanpaj yanaparqa?
2 Publicacionesniyoj mesaswan chayri carritoswan willasqanchejrayku, ashkha runas Bibliamanta yachakushanku. Sutʼincharina, universidadpi yachakoj sipasqa, Jehovaj testigosninmanta qhelqayta munaspa, maypichus tantakunchej chay wasita maskʼarqa, nitaj tarerqachu. Uj semananmantaj universidadnillanpitaj publicacionesniyoj mesata rikorqa, Bibliamantataj yachakuyta qallarerqa. Kunantaj bautizakunña, chantapis carritosllawantaj willashan.
3. Carritoswan willasqankumanta, ¿imatá iskay hermanas ninku?
3 Uj hermana chay publicacionesniyoj mesaswan chayri carritoswan willasqanmanta nin: “Wakenqa mosoj revistasta apakunankupaj qayllamunku, wakinrí ni jaykʼaj Jehovaj testigosninmanta uyarisqankuchu. Ajinamanta willaspaqa, aswan ashkha runasta yanapakushan”, nispa. Uj hermana nillantaj: “Carritoswan willayqa may sumajpuni, imajtinchus runasqa qhawarejllapis qayllamuwanchejpuni”, nispa.
4. ¿Imaraykú allin kanman kikin horasllapi, kikin pʼunchaykunallapi, chantapis uj cheqallapi carritoswan willananchej?
4 Publicacionesniyoj mesaswan chayri carritoswan willashaspaqa, allin kanman kikin horasllapi, kikin pʼunchaykunallapi, chantapis uj cheqallapi willakunan. Ajinamanta runasqa, mana manchikonqankuchu revistasta, folletosta ima mañakuyta nitaj tapuriytapis. Ashkha runas tiyan chaypi willakunanpaj qotuchakuyniyki, ¿wakichikushanchu? Qanpis carritoswan willanaykipaj kallpachakuy. Imajtinchus ajinata willayqa, Diospa Reinonmanta tukuynejpi willakunanpaj yanapashan (Luc. 9:60).