Willaypi ama tiemponchejta usuchinachu
Jehovaj testigosnenqa 1.945.487.604 horasta 2013 septiembre killamanta, 2014 agosto killakama willarqanchej. Chayqa rikuchin Jehovaj testigosnin tukuy tiemponchejta willamunapaj churasqanchejta (Sal. 110:3; 1 Cor. 15:58). “Pisi tiempollaña” kasqanrayku, willaypi kashaspa ashkha runaswan parlarisunman (1 Cor. 7:29).
Willaypi tiempota mana usuchinapajqa, mana yuyasqanchejman jinapunichu ruwana. Willaj chayri yachakuyta munajman chayri yachachej rishaspa ni piwan parlarejtinchejqa, ichá ashkha runaswan parlarinapaj kallpachakusunman. Mana tukuynejpichu kikinta ruwakojtinpis, kay yuyaychaykuna yanapawasun tiempota mana usuchinapaj, kallpachakusqanchejtaj mana qhasipajchu kanqa (1 Cor. 9:26).
Wasimanta wasi willaspa. Hermanosqa watastaña, wasimanta wasi willayman yachasqa kanku. Chaywanpis, ashkha runas pʼunchaypi trabajanku, chayrayku ichá tardenpi chayri chʼisisninpi wasimanta wasi willasunman. Chay horasta runasqa wasinkupi kashanku, tiempoyojllataj. Chantapis callespi chayri negociospi tutamanta willaspaqa aswan allin riwasunman.
Ashkha runas kanku chaypi willay. Publicacionesniyoj mesasta, carritosta ima ashkha runas purinku chaynejman churakunan tiyan. Maypichus qotuchakuyninchej willan chayllapitaj (2013 julio killamanta Reinomanta Willayninchej hojitapi, 5 paginanta qhawariy). Manaña chaynejta ashkha runas purinkumanchu chaytaj, qotuchakuyniykimanta Comité de Servicio nisqa, maynejtachus runas astawan purinku chaynejpi publicacionesniyoj mesasta churakunanta ninman.
Yachakuyta munajkunaman kutispa, Bibliamanta yachachispa. Wakin pʼunchaykunapi willashajtinchej mana allinchu riwasunman. Chay horaspi ichá yachakuyta munajkunaman kutisunman, Bibliamantataj yachachej risunman. Sutʼincharinapaj, sábado paqarinta wasimanta wasi willaypi allin riwajtinchejqa, tardenpi chayri chʼisinpi Bibliamanta yachakojkunaman risunman. Chayri Bibliamanta yachakuyta munajkunata waturej rispaqa, chaynejllapitaj Bibliamanta yachachisqanchej runas tiyakojkunaman risunman, jinamanta tiemponchejta mana usuchinapaj.
Mashkha tiempotachus willaypi kasqanchejta yupakuspapis, allin riwajtinchejqa aswan kusisqa kasun. Ima horaschus willaypi mana allinchu riwajtinchej ichapis mayqenpichus allin riwasqanchejta ruwasunman. Jehová Diosmanta mañakunachej, pichus “Cosechaj dueñon”, willaypi yanapanawanchejpaj tiemponchejta mana usuchinapaj (Mat. 9:38).