Chʼisisnin willayman llojsinapaj kallpachakuna
1. Uj libro nisqanman jina, ¿ima horastataj Pablo wasimanta wasi willaj rej?
1 Uj libro nisqanman jina, apóstol Pabloqa, “tardesnin las cuatromantapacha tutayaykunankama” wasimanta wasi willaj rej (Daily Life in Bible Times). Mana yachanchejchu Pablo chay horastapuni willaj risqanta, chaywanpis yachanchej “evangeliorayku” tukuy imata ruwasqanta (1 Cor. 9:19-23). Chaytaj rikukorqa, runas ima horaschus wasinkupi kaj kanku chay horasta willaj rinanpaj tiempochakusqanpi.
2. ¿Imaraykutaj may sumaj chʼisisnin willaj riy?
2 Ashkha lugarespi hermanosqa, paqarillanpi wasimanta wasi willaj rinku. Willanchej chaynejpi, ¿paqarillanpichu runasta wasinkupi tarinchej? Uj precursor nin: “Runastaqa, pʼunchaypi mana wasinkupi taripayta atillanchejchu, chʼisisninpitajrí taripallanchej”, nispa. Runasqa, chʼisisninpi samarishanku, parlariytapis munallanku. Chantapis qharisman astawan willayta atillasun. Ancianosqa, atikusqanman jina, willayman llojsinapaj tantakuykunata chʼisisninpaj wakichiyta atinku.
3. ¿Imaynatá allin yuyayniyoj kasqanchejta chʼisisnin willaspa rikuchinchej?
3 Allin yuyayniyoj kana. Chʼisisnin willashaspa allin yuyayniyoj kasqanchejta rikuchina. Sutʼincharinapaj, uj wasiman mikhushajtinkupuni willaj chayasunman chayqa, allin kanman kutinanchejta ninanchej. Laqhaña kajtintaj sutʼipi sayana rikunawanchejpaj, pichus kasqanchejta, imamanchus risqanchejta imataj willanapacha. Chantapis iskaymanta iskaypuni willayman llojsina, qotuj qayllanpitaj kana, manataj laqha callespi willanachu. Nitaj ancha tutakama willanachu, imaraykuchus ichá runas puñushankumanña (2 Cor. 6:3). Chantapis mana allinchu kanman, suwas kanku chaynejpi tutakama willananchejqa (Pro. 22:3).
4. ¿Ima bendionestataj japʼisunchej chʼisisnin willaspa?
4 Bendiciones. Runaswan Diosmanta parlarispa astawan kusikunchej. Runasman astawan willamusunchej chayqa, ashkha runasta yanapasunchej cheqa kajta rejsinankupaj, salvakunankupaj ima (1 Tim. 2:3, 4). Chayrayku chʼisisnin willayman llojsinapaj kallpachakunachej.