Callespi sumaqta willanapaq
1. ¿Imaynatá Jesusjina ruwasunman?
1 Jesús kay pachapi Diospa Reinonmanta willachkaspa, ñanpi chayri llaqtaspi runaswan tinkuspa mana iskaychakuspa parlaq (Luc. 9:57-61; Juan 4:7). Sumaq willayninta tukuy runasman riqsichiyta munarqa. Kay tiempopi Diospa yachayninta runas riqsinankupaq, callespi willayqa mayta yanapan (Pro. 1:20). Kay llamkʼaypi sumaq rinawanchikpaqqa, ñuqanchikraq parlayta qallarina chantá allin yuyaywan ruwana.
2. Callespi willachkaspa, ¿imaraykutaq ñuqanchikraq parlayta qallarina?
2 Ñuqanchik parlayta qallarina. Callespi willachkaspa runas ñuqanchikman jamunankuta suyanamantaqa, allin kanman ñuqanchik paykunaman qayllaykuna. Qhawarisuptintaq asiriy, allinllamanta, kʼachamanta ima parlayta qallariy. Callespi wak hermanowan willachkankichik chayqa, ichapis allin kanman mana iskayniykichikpunichu runasman qayllaykunaykichik. Chantapis, Diosmanta astawan yachakuyta munaqkunata yanapayta munasqanchikta rikuchina. Atikuptinqa parlayta tukuytawan, paywan imaynamantachus juktawan parlarinaykipaq tapuriy. Chay callepi wak hermanos willallankupuni chayqa, sapa kuti chay runaswan tinkuspa parlallankutaq, ajinamanta astawan yachakuyta munasqankuta wiñachinku.
3. ¿Imaynatá callespi allin yuyaywan willasunman?
3 Allin yuyaywan ruwana. Maypichus chayri pimanchus willanaykitaqa allinta reparaspa sumaqta akllay. Mana tukuy runaswanchu parlanayki tiyan. Sumaqta qhaway. Sutʼincharinapaq, usqhayllata riqkunataqa mana sayachinachu. Juk negociop ñawpaqinpi willachkanki chayqa, atikusqanmanjina willay, gerente mana phiñakunanpaq. Chay negociomanta lluqsiqkunawan parlayqa aswan sumaq. Nitaq mancharichinapaqjina qayllaykunachu. Chantapis yachana tiyan pikunamanchus publicacionesta saqiyta atisqanchikta. Pisita yachakuyta munaqkunaman revistasta saqinaykimantaqa juk tratadota saqiwaq.
4. ¿Imaraykutaq callespi willay may sumaq?
4 Callespi willayqa chiqa yachachiykunata pisi tiempopi mujutajina tarpunapaq yanapawanchik (Ecl. 11:6). Wasimanta wasi willachkaptinchik wasisninkupi mana tarikuqkunawan ichapis callespi tinkunchik. Callespi sumaqta willanapaq, ¿manachu allin kanman kallpachakunayki?