Tapuykuna

◼ Jehovamanta sutʼinchaqkuna umallirichiykunamanta grabacionesta chayri qillqasqasta, ¿tukuyman jaywananku allinchu kanman?

Bibliamanta umallirichiykunaqa sunquchawanchik, kallpachawanchik ima (Hech. 15:32). Chayrayku tukuypis, pikunachus umallirichiyta mana uyariqkunaman chayachiyta munanchik. Umallirichiykunataqa grabaytawan, wakkunaman yaqha chay ratopacha apachiyta atikun. Wakinkunapta, unay watasmantapacha achkha umallirichiykunamanta grabaciones kapun, chaytataq amigosninku uyarinankupaq mañanku chayri grabapunku. Wakinkunataq Internetman churanku, pillapis uraqachinanpaq.

Tukuypis umallirichiykunataqa, paypaq chayri familianpaq grabayta atinku. Ancianosqa, qutuchakuymanta hermanos unquyninkurayku tantakuyman mana riyta atiqkunapaq, umallirichiykunata grabapunankuta ninkuman. Chaywanpis, umallirichiykunamanta grabacionesta chayri qillqasqasta, imaraykuchus mana tukuyman jaywanapaqchu kasqanta qhawarina.

Umallirichiykunataqa sapa qutuchakuypaqjina wakichikun, chay umallirichiymanta wak hermanos ichapis pantasqata yuyankuman, imaptinchus mana yachanchikchu chay qutuchakuypi imachus necesitakusqanta. Chantapis, pichus, maykʼaqchus umallirichisqanta, chantá musuq yachachiychus, chiqachus manachus kasqanta mana yachasunmanchu (Luc. 1:1-4). Chantapis, umallirichiykunamanta grabacionesta chayri qillqasqasta tukuyman jaywaptinchikqa, ichá umallirichiqta jatunpaq qhawankuman chayri chay hermano jatunchachikuyta munanman (1 Cor. 3:5-7).

Allin kamachi yuyayniyuqqa, sumaq yachachiykunata, maychus kaqta ‘tiemponpitaq’ mikhunatajina quwananchikpaq, mayta llamkʼachkan (Luc. 12:42). Chay sumaq yachachiykunaqa, qutuchakuykunapi umallirichikusqan, chantá Internetpi www.jw.org nisqaman uraqachinapaq grabaciones ima kanku. Allin kamachi yuyayniyuq, Diospa Llaqtanta Kamachiqkunasnin ima, iñiyninchikta kallpachanapaq, necesitasqanchikta quwasunpuni (Hech. 16:4, 5).