Chakrasqa cosechanapaq puqusqaña kachkanku
1. ¿Ima llamkʼaytaq kunan tiempo usqhayta ruwakuchkan?
1 Samariapi, juk warmiman willaytawan, Jesusqa discipulosninman nirqa: “Qhawariychej chajrasta; cosechanapaj poqosqaña kashanku”, nispa (Juan 4:35, 36). Jesusqa, runas Diosmanta astawan yachakuyta munasqankumanta, parlachkarqa, payqa Jallpʼantinpi cosecha uqharikunanta yacharqa. Yachallarqataq imaynatachus kay profecía juntʼakunanta. Jesusqa janaqpachamantapacha cosechapi llamkʼachkallanpuni (Mat. 28:19, 20). Kay pachap tukukuynin qayllapiña kasqanrayku, ¿imaraykú nisunman cosechapi, astawan llamkʼana kasqanta?
2. ¿Imastaq rikuchiwanchik, Jallpʼantinpi cosecha ruwakuchkasqanta?
2 Jallpʼantinpi cosecha. Kay 2009 watapi, Jallpʼantinpi willaqkuna 3,2% nisqaman yapakurqanchik. Wakin suyuspi, maypichus mana Diosmanta willayta saqikunchu, chaypi 14% nisqaman yapakun. Chantapis sapa killa 7.619.000 runas Bibliamanta yachakurqanku, kay yachakuqkunaqa, Jehovamanta sutʼinchaqkunamanta, astawanraq kanku, qayna watamanta nisqaqa, yaqha khuskan junujina yapakunku. Kay llamkʼay yapakusqanrayku tukuyniqpi astawan Galaadmanta misioneros necesitakun. Chantapis, wak qalluspi willakusqanrayku, cosechaqa wiñachkallanpuni. Chayrayku nisunman Jehová, usqhayta kay llamkʼay ruwakunanpaq, llaqtanta tanqachkan (Isa. 60:22). Manachu kay llamkʼaypi, ¿yanapakuyta munawaq?
3. Llaqtankupi cosecha ruwakuchkasqanmanta, ¿imatá yuyanku?
3 Llaqtanchikpi cosecha. Wakinkunaqa, ichapis ninkuman: “Llaqtaypiqa manaña uyariyta munankuchu”, nispa. Chayqa chiqa, wakin llaqtaspiqa uyarinku, wakinpitaq mana, imaraykuchus manaña ñawpajinachu. Chayrayku wakin hermanos, yuyanku llaqtankupi cosecha tukukusqantaña, chayri puchuqllataña, uqharikuchkasqanta. Chayqa, ¿jinachu?
4. ¿Imaynatá willayninchikta qhawana kanman?
4 Cosechapiqa qallariymantapacha, tukukuyninkama mana samarispa llamkʼakun. Qhawariy Jesuspa nisqanta: “Cheqatapuni cosechaqa ashkha, oqharejkunarí pisi kanku. Mañakuychej ari cosechaj dueñon Señormanta, astawan oqharejkunata cosechanman kachamunampaj”, nispa (Mat. 9:37, 38). Jehovalla, dueñojina, maykʼaqchus maypichus, cosecha kananta yachan (Juan 6:44; 1 Cor. 3:6-8). ¿Imaynatá yanapakusunman? Biblia niwanchik: “Tutamanta mujuta tarpunki, chʼisiyaykuytapis ama tiyaykullaychu”, nispa (Ecl. 11:4-6). Cosecha tukukuchkaptin, mana llawchhiyaspa, astawanraq llamkʼana kanman.
5. ¿Imaraykutaq kusisqallapuni mana uyariwaptinchik, willamunanchik tiyan?
5 Cosechaqa mana tukukunchu. Kutin kutita willaptinchikpis, chayri mana uyariwaptinchikpis, maypichus willanchik chaypi, kusisqas, usqhayllata willamuna (2 Tim. 4:2). Wakinkunaqa, may jatuchaq chʼampaykunata qhawasqankurayku, yuyayninkuta tikrachinku, aswan qhipapitaq mayta tʼukunku. Waynas, sipaskunaqa wiñasqankumanjina, allin kawsayta tariyta munanku, mana ima chʼampaypi kawsakuspa. Mana saykʼuspa willasqanchikpis, mana uyariyta munaqkunaman, uyarinawanchikpaq yanapanman. Chantapis, yachachkaspa, manapuni uyariyta munaqkunapis, willasqas kananku tiyan (Eze. 2:4, 5; 3:19).
6. Mana willayta atikuptin, ¿imatá ruwayta atisunman?
6 Llaqtanchikpi mana willayta atikuptin, ¿imatá ruwayta atisunman? Mana wasimanta wasillachu willamuna kanman, manaqa ichá qhatuspi, telefononiqta ima willamusunman. Chantapis imaynatachus, willayta amañasqanchikta, wakjinamanta ruwasunman. Manaqa, runata wasinpi tarinapaqjina, chay horata lluqsiyta atisunman. Ichá wak qalluta ima yachakuyta atisunman, jinamanta aswan runasman allin willaykunata willayta atisunman. Precursor regularta urqhukuspataq astawan willaypi llamkʼarisunman. Maypichus pisi willaqkuna kanku, chayman yanapaq risunman. Jehovajina cosechata qhawasun chayqa, tukuy imaymanamanta kallpachakusun, astawan willamunapaq.
7. ¿Maykʼaqkamataq cosechapi llamkʼasun?
7 Tarpuqkunaqa, cosecha tiempo pisi kasqanta yachanku. Chayrayku, mana saykʼuspa, jumpʼi suruyta, cosecha tukukunankama llamkʼanku. Kunan tiempo, Diosmanta runaman yachachiypis, kikillantaq, usqhayta llamkʼana tiyan. ¿Maykʼaqkamataq kay llamkʼayta ruwasunrí? “Kay pacha tukukunankama” (Mat. 24:14; 28:20). Jehovap, aswan sumaq kamachin Jesusjina, ñuqanchikpis, llamkʼayninchikta tukuchayta munanchik (Juan 4:34; 17:4). Chayrayku sunqu kʼajaywan, kusiywan, kay pacha tukukunankama willamunallapuni (Mat. 24:13). ¡Cosechaqa manaraq tukukunchu!
[2 paginapi sutʼinchaynin]
Cosechapiqa qallariymantapacha, tukukuyninkama mana samarispa llamkʼakun