Sumaj willaykunata willanapaj tratadosta apaykachana
1. ¿Imaynatá Diospa llajtan tratadosta apaykacharqa?
1 May unayña Jehová Diospa llajtanqa, tratadosta apaykachan sumaj willaykuna tukuynejman chayananpaj. Kay 1880 watamantapacha Bibliamanta Yachaqajkunaqa, nisunman C. T. Russell, yanapajkunasnin ima, tratadosta orqhoyta qallarerqanku, Watch Tower revistata leejkuna tukuy runasman tratadosta jaywanankupaj. Willayninchejpi tratados yanapawasqanchejraykutaj hermano Russell, 1884 watapi Zionʼs Watch Tower Tract Society nisqa sutiwan corporación legal nisqata kicharerqa, chay corporacionpa sutinmantaj tract (“tratado”) rimaytawan churarqa. Kunantaj chay corporacionta Watch Tower Bible and Tract Society of Pennsylvania sutiwan rejsikun, chaytaqa mana qolqechakunanpajchu, manaqa Diospa Reinon ñaupajman rinallanpajpuni kicharqa. Kay 1918 watapajtaj, Bibliamanta Yachaqajkunaqa, 300 millonesmanta astawan tratadostaña runasman jaywarqanku. Kay tiempopipis tratadosqa, willanapaj yanapashallawanchejpuni.
2. ¿Imaraykutaj tratados willaypi yanapawanchej?
2 ¿Imaraykutaj tratados willaypi yanapawanchej? Tratadosqa, leeyta munanapaj jina, kʼachitustaj kanku. Willaynintaj runa yachakuyta munananpaj jina, pisi parlayllapi sumajta sutʼinchan. Runasqa, revistamanta, libromanta nisqaqa tratadota astawan qhepachikuyta munanku. Mosoj willajkuna, wawas ima tratadoswan willayta atillanku. Juchʼuysitu kasqanraykutaj apaykachayta atillanchej.
3. Cheqa kajta tratadonejta rejsisqaykimanta chayri publicacionespi cheqa kajta hermanos tratadonejta rejsisqankumanta parlariy.
3 Ashkha runas cheqa kajta uj tratadonejta yachakorqanku. Sutʼincharinapaj, Haití suyumanta uj warmi, tratadota callepi tarikorqa. Oqharispataj leerqa, chantá nerqa: “¡Cheqa kajta tarini!”, nispa. Chantá Tantakuna Wasiman rerqa, Bibliamanta yachakuyta qallarerqa, bautizakorqa ima. Tukuy chayta ruwarqa, Diospa Palabranmanta chay tratado orqhosqa kasqanrayku.
4. Tratadoswan willana kajtin, ¿imatá ruwasunchej?
4 Wasimanta wasi willaypi. Tratados willanapaj sumaj yanapa kasqanrayku, noviembre killamantapacha wakin killas tratadoswan willamusunchej. Chaywanpis tratadostaqa, mana jaywallasunchu, manaqa chaykunawan parlarinanchej tiyan. Wasiyoj, ñaupaj kutirayku parlarejtinchej chayri kutejtinchej Diosmanta yachakuyta munajtenqa, Yachachin librowan chayri waj publicacionwan imaynatachus yachachisqanchejta sutʼinchasunman. ¿Imaynatá tratadosta saqesunman? Imaymana tratados kapuwanchej runaman saqenapaj, chayraykutaj chay tratadosta sumajta rejsinanchej tiyan.
5. ¿Imaynatá wasimanta wasi willaypi tratadosta saqesunman?
5 Tratadoswan imaynatachus willananchejqa, mayqen tratadowanchus, maypichus willasunchej chayman jina kanqa. Ñaupajtaqa, runaman tratadota jaywarisunman, ichapis tratadoj sutinta qhawarispa yachakuyta munanman. Manaqa, imaymana tratadosta rikuchisunman, mayqenmantachus yachakuyta ajllananpaj. Punkuta mana kichariyta munankuchu chaynejpi willashanchej chayqa, ichá uj tratadota sutinta rikunanpaj jina japʼisunman, manachayrí punkoj uranta jaywarisunman, imatachus chay tratadomanta yuyasqantataj tapurisunman. Manachayrí tratadoj sutin uj tapuy kajtenqa, imatachus chay tapuymanta yuyasqanta tapurisunman, manaqa noqanchej waj tapuyta ruwasunman yachakuyta munananpaj. Chantataj ichá uj chhikallanta tratadomanta leeripusunman, tratadopi rikhurej tapuykunaman kutichinanpaj chayri imatachus yuyasqanta ninanpaj. Allin kanman Bibliamanta uj chayri iskay versiculollatapis leeripunanchej. Parlariytawantaj maykʼajchus kutinanchejta nisunman. Qotuchakuy, runata wasinkupi mana taripaspa Bibliamanta publicacionesta saqeyta yachan chayqa, calleta purej runas mana rikunanpaj jina saqesunman.
6. ¿Imaynatá tratadoswan callespi willasunman?
6 Callespi willashaspa. ¿Callespi willanapaj tratadosta apaykachanchejchu? Wakin runasqa, usqhayllata purishanku, nitaj parlariyta munankuchu, chayraykutaj Bibliamanta yachakuyta munasqankutachus manachus mana yachayta atillanchejchu. Kunallanraj llojsimoj revistata saqenanchejmantaqa, allin kanman tratadollata saqenanchej, imaraykuchus mana yachanchejchu leenqankuchus manachus. Tratado juchʼuysitulla kasqan, sutin ima, ichá runata leenanpaj yanapanman. Noqanchejwan parlarej qhepakun chayqa, tratadomanta astawan parlarisunman.
7. Wakin hermanos imaynatachus tratadoswan willasqankuta sutʼinchariy.
7 Mayllapipis willashaspa. Tratadoswanqa, mayllapipis willayta atikullan. Uj hermano wasinmanta llojsispa tratadosta apakunpuni. Pillawanpis tinkuspataj uj tratadota leenanpaj jaywarin. Uj qhariwarmitaj Nueva Yorkman rispa, Naciones nisqa folletota, ashkha tratadosta ima, tukuy qalluspi apakorqanku, tukuy suyusmanta runaswan tinkunankuta yachasqankurayku. Parquespi, restaurantespi ima, waj qalluta parlajta uyarispa, qallunkupi uj tratadota saqerqanku, jinallatataj callespi ranqhajkunamanpis saqerqanku.
8. ¿Imaraykutaj tratadosta, mujuwan kikinchakun?
8 Mujuta tarpuy. Tratadostaqa, mujuwan kikinchakun. Chajrata tarpojkunaqa, mujuta tʼakanku mana yachaspalla maypichus sumajta poqonanta. Chayraykuchá Eclesiastés 11:6 nin: “Tutamanta mujuta tarpunki, chʼisiyaykuytapis ama tiyaykullaychu, imaraykuchus mana yachankichu mayqenchus aswan allin kananta, kaychus, jaqaychus, chayri iskayninchus allin kananta”, nispa. Chayrayku “yachayta tukuyman” tratadoswan apanallapuni (Pro. 15:7).
[3 paginapi sutʼinchaynin]
Tratados willanapaj sumaj yanapa kasqanrayku, noviembre killamantapacha wakin killas tratadoswan willamusunchej